16 އޮކްޓޯބަރ 2019 - 10:45
ގައުމީ ފުޓްބޯޅަ ޓީމުތަކުގެ ކަންކަމުގައި އެފްއޭއެމްގެ އެގްޒެކްޓިވް ކޮމިޓީ އަށް ލަފާދިނުމަށް އެކުލަވާލި ގައުމީ ޓީމުގެ ކޮމިޓީ އަށް ފުޓްބޯޅައިގެ ހުރިހާ ކަމެއްގައި ލަފާދީ އެހީތެރިވެދެވޭ ގޮތަށް މެންޑޭޓް ބޮޑުކޮށް އެ ކޮމިޓީ އަށް ބަދަލުތަކެއް ގެނެސްފި އެވެ.
މި ކޮމިޓީ އެންމެ ފުރަތަމަ އެކުލަވައިލީ އެފްއޭއެމްގެ ރައީސް ބައްސާމް އަދީލް ޖަލީލާއި ސްޕޯޓްސް މިނިސަޓަރު އަހުމަދު މަހުލޫފާއި ޓޫރިޒަމް މިނިސްޓަރު އަލީ ވަހީދާއި އޮލިމްޕިކް ކޮމިޓީގެ ރައީސް މުހައްމަދު ޝަވީދާއި ބެޑްމިންޓަން އެސޯސިއޭޝަނުގެ ރައީސް މޫސާ ނާޝިދު ހިމަނައިގެންނެވެ.
އެކަމަކު ޕްރެޝަރު ބޮޑުވެ މަހުލޫފު ވަނީ ކޮމިޓީން ދުރަށް ޖެހިވަޑައިގެންފަ އެވެ. އަދި ފަހުން އެކުލަވަލިއިރު ބައްސާމާއި މޫސާ ނާޝިދު ވެސް ހިމެނިވަޑައިނުގަންނަވަ އެވެ. ބަދަލުގައި ލައްވާފައިވަނީ އެފްއޭއެމްގެ ސީނިއާ ވައިސް ޕްރެޒިޑެންޓް އަހުމަދު ޝަކީބް (ޑޮކް) އާއި ގައުމީ ޓީމު ކޮމިޓީގެ ކުރީގެ މެމްބަރު އަލީ ނާޝިދު (އޮގަރު އައްޔަ) އާއި އަންހެން ގައުމީ ޓީމުގެ ކުޅުންތެރިޔާ މަރިޔަމް މިރުފަތެވެ. އެކަމަކު ކޮމިޓީގެ ޗެއާމަން އަލީ ވަހީދާއި އޮލިމްޕިކް ކޮމިޓީގެ ރައީސް ޝަވީދު ތިއްބަވާނެ އެވެ.
މި ކޮމިޓީ އެންމެ ފުރަތަމަ އެކުލަވަލައިރު ބުނެފައިވަނީ މެންޑޭޓަކީ ޖޫނިއާ އުމުރުފުރާއިން ފެށިގެން ސީނިއާ ޓީމާ ހަމައަށް ގައުމީ ޓީމުތަކުގެ ކުރަންޖެހޭ ހުރިހާ ކަމެއްގައި އެގްޒެކްޓިވް ކޮމިޓީ އަށް ލަފާދިނުމަށާއި ގައުމީ ޓީމުތައް ތައްޔާރުވުމަށް ކުރަން ޖެހޭ އެންމެހާ ކަންތައްތަކުގައި އެހީތެރިވެދިނުން ކަމަށެވެ.
ރޭ ނެރުނު ބަޔާނުގައި ބުނެފައިވަނީ ހުރިހާ ގައުމީ ޓީމުތަކެއް ކުރިއެރުމަށް ސްޓްރެޓެޖީސްތަކެއް ހަދައި ހުށަހެޅުމަށާއި އަދި ގައުމީ ޓީމުގެ ކުރިއެރުވުމާ ގުޅޭ ހުރިހާ ކަމެއްގައި އެގްޒެކެޓިވް ކޮމިޓީއަށް ލަފާ ދިނުމަށް ގައުމީ ޓީމުގެ ކޮމިޓީއެއް އުފައްދާފައިވާ ކަމަށެވެ. އަދި ގައުމީ ޓީމުގެ ތައްޔާރީތަކާއި ހުރިހާ ގައުމީ ޓީމުތަކެއްގެ ހަރަކާތްތަކެއް ބަލައި ސަޕޯޓް ދިނުމަށް ވެސް ކޮމިޓީއަށް މެންޑޭޓްދީފައިވާ ކަމަށް ބަޔާނުގައިވެ އެވެ.
މީގެ އިތުރުން މި ކޮމިޓީން ފުޓްބޯޅައާ ގުޅުން ހުރި ކޮންމެ ކަމެއްގައި، ހާއްސަކޮށް ފުޓްބޯޅައިގެ އޮނިގަނޑާއި ފުޅާ ދާއިރާއެއްގައި ހުރިހާ ގައުމީ ޓީމެއް ކުރިއެރުވުމަށް ޓެކްނިކަލް ކަންކަމާއި ކްލަބްތައް ކުރިއެރުވުމާ ގުޅޭ ގޮތުން ވެސް އެގްޒެކެޓިވް ކޮމިޓީއަށް ލަފާދީ އެހީތެރިވާން ޖެހޭނެ ކަމަށް އެފްއޭއެމުން ބުނެފައިވެ އެވެ.
މި ކޮމިޓީގެ ޗެއާމަނަކަށް އައްޔަންކުރައްވާފައިވާ އަލީ ވަހީދަކީ ފުޓްބޯޅައިގެ ތަޖުރިބާކާރެކެވެ. ސްކޫލް ދައުރުގައި މޮޅަށް ކުޅުއްވި އަލީ ވަހީދަކީ ނިއު ރޭޑިއަންޓުން 2013 ވަނަ އަހަރުގެ ސީޒަނުގެ ހުރިހާ މެޗަކުން މޮޅުވެ ހުރިހާ ތަށްޓެއް ހޯދިއިރު ޗެއާމަނެވެ. އޭގެ ކުރިން ގައުމީ ޓީމުގެ މެނޭޖަރުކަން ވެސް ކުރެއްވި އެވެ.
ކޮރަޕްޝަނުގެ ތުހުމަތެއްގައި ސްޕޯޓްސް މިނިސްޓަރު އަހުމަދު މަހުލޫފުގައި ގޭގައި ހުންނެވި ދުވަސްކޮޅެއްގައި މި އަހަރުގެ ކުރީކޮޅު ވަގުތީ ގޮތުން މިނިސްޓްރީއާ ހަވާލުވެވަޑައިގެން އަލީ ވަހީދު ވަނީ އެފްއޭއެމްގެ މިހާރުގެ އެގްޒެކެޓިވް ކޮމިޓީ އަށް ވަރަށް ބޮޑަށް ފާޑުވިދާޅުވެފައިވެ އެވެ. އެގޮތުން އޭނާ ވިދާޅުވީ ކުޅުންތެރިންނަށް މުސާރަ ނުދޭ ކަމަށް ބުނެ އެފްއޭއެމުން ނިއު ސަސްޕެންޑްކުރުމުގެ ފަހަތުގައި އޮތީ އެހެން ކަމެއް ކަމަށެވެ. އޭނާ ވިދާޅުވީ ނިއު ސަސްޕެންޑްކުރީ އެ އެސޯސިއޭޝަނުގެ ވެރިންގެ އިތުބާރު ނެތްކަމުގެ ވޯޓެއް ނަގަން އުޅުމުން ކަމަށް ގަބޫލުކުރައްވާ ކަމަށާއި އެ ސަސްޕެންޝަން އުވާލައި އިތުބާރު ނެތްކަމުގެ ވޯޓާ ކުރިމަތިލެއްވުމަށް އެފްއޭއެމުގައި އެދޭ ކަމަށެވެ.
މީގެ އިތުރުން އޭނާ ވިދާޅުވީ ވަކި ކަމަކާ ގުޅިގެން ކްލަބްތަކަށް ފިޔަވަޅު އެޅޭ އެޅުން އެއީ އެއްވެސް އިންސާފެއް ނޫން ކަމަށާއި މި ސަރުކާރުން ވެރިކަމަށް އައީ ވެސް ބޭއިންސާފާ ދެކޮޅަށް ކަމަށެވެ. އިތުބާރު ވޯޓަކާ ގުޅިގެން ބަޔަކު މީހުން ސަސްޕެންޑްކޮށް މި ފަސްގަނޑުގައި އަދުލު އިންސާފުން ބޭރުން ނުކުރެވޭނެ ކަމަށާއި އަދި ފީފާގެ އުސޫލުތަކުގައި ވެސް އެކަމެއް ނޯންނާނެ ކަމަށް ވިދާޅުވި އެވެ.
"މާދަމާ އަޅުގަނޑުގެ އިތުބާރު ނެތްކަމުގެ ވޯޓެއް ނަގަން ހުށަހެޅީމާ ރައްޔިތުންގެ މަޖިލީހުގައި ތިބި ހުރިހާ މެމްބަރުން ހައްޔަރުކުރަން އަޅުގަނޑުމެން ގޮސްގެންނުވާނެ،" އަލީ ވަހީދު އޭރު ވިދާޅުވެފައިވެ އެވެ.