13 އޮކްޓޯބަރ 2019 - 06:24
ދާދި ފަހުން ޑައިރެކްޓަރު މާޓިން ސްކޮސީ މާވެލްގެ ސުޕަހީރޯ ފިލްމުތަކަށް ނިސްބަތްކޮށް ދެއްކި ވާހަކަތަކާ ގުޅިގެން އޭނާ އަށް ގިނަ ބައެއްގެ ފާޑުކިޔުންތައް އަމާޒުވެފައި ވަނިކޮށް، މަޝްހޫރު ބަތަލާ ޖެނިފާ އެނިސްޓަން ވެސް މާވެލްގެ ފޭނުން ރުޅިއަރުވާލައިފި އެވެ.
ވެރައިޓީ އަށް ދިން އިންޓަވިއުއެއްގައި، 50 އަހަރުގެ ބަތަލާ ބުނީ މާވެލް އިން ސިނަމާ މިހާރު ހަލާކުކޮށްލާފައިވާ ކަމަށާއި ސިނަމާތަކަށް ގޮސް ފިލްމުތައް ބެލުމަށް ވުރެ މިހާރު ސްޓްރީމިން ކޮންޓެންޓްތަކަށް ބެލުންތެރިން ދޭ ތަރުހީބު މާ ބޮޑު ކަމަށެވެ.
މަޝްހޫރު ސިޓްކޮމް "ފްރެންޑްސް" އިން ވިދައިލި ބަތަލާ ބުނީ ގްރީން ސްކްރީން ދަމައިގެން އެކްޓްކުރުމަށް ވުރެ، ހަގީގީ ސިނަމާ އަށް ބެލުންތެރިން މާ ބޮޑަށް ލޯބިކުރާ ކަމަށެވެ. އަދި ސްޓްރީމިން ހިދުމަތްދޭ ކުންފުނިތައް އިތުރުވަމުން އަންނަ އިރު، އެ ޕްލެޓްފޯމްގެ ކޮންޓެންޓްތައް އެއް ދުވަހުން އަނެއް ދުވަހަށް މިހާރު ވަރުގަދަވެ، އެ ދިމާއަށް މިސްރާބު ޖަގާ ތަރިން ވެސް އިތުރުވަމުން އަންނަ ކަމަށް ބުންޏެވެ.
އެނިސްޓަން ބުނޮތިގައި ނެޓްފްލިކްސް އާއި އަލަށް ތައާރަފުކުރާ އެޕަލް ޓީވީ+ ޕްލަސް ފަދަ ޕްލެޓްފޯމްތަކުގެ އުފެއްދުންތަކުގައި މަސައްކަތްކުރަން މިހާރު ގަޔާވާ ކަމަށެވެ.
"އަހަރެން ދެކޭ ގޮތުގައި މާވެލްގެ ސަބަބުން ސިނަމާތަކަށް ގޮސް ފިލްމު ބަލާ މީހުން މިހާރު ވަރަށް ބޮޑަށް މަދުވެއްޖެ. އަދި ފިލްމު ވިޔަފާރި ވެސް ވަރަށް ބޮޑަށް ދަށްވެއްޖެ،" ދާދި ފަހުން ނެޓްފްލިކްސް އިން ގެނެސްދިން "މާޑާ މިސްޓްރީ" ގެ ބަތަލާ ބުންޏެވެ. "ކުރިން ސިނަމާތަކުން ދެއްކި ޖާދޫ މިހާރަކު ނެތް. މިސާލަކަށް އަހަރެން ވަރަށް މިސްވޭ މިހާރު ސިނަމާއިން މެގް ރަޔަން ކަހަލަ ތަރިންގެ ފިލްމުތައް."
ސްކޮސީ ބުނިގޮތަށް މާވެލް އިން ގެނެސްދޭ ސުޕަހީރޯ ފިލްމުތަކަކީ އަސްލު ސިނަމާ ނޫން ކަމަށް ބުނެ އެނިސްޓަން ދެއްކި ވާހަތަކާ ގުޅިގެން ވަރަށް ގިނަ ބަޔަކު އޭނާ އަށް ޓްވިޓާގައި ފާޑުކިޔާފައިވެ އެވެ.
ބައެއް މީހުން ބުނީ އެނިސްޓަން އެފަދަ ވާހަކައެއް ދެއްކީ މާވެލްގެ ފިލްމަކުން ފުރުސަތު ނުލިބޭތީ އެކަން ހަޖަމުނުވެގެން ކަމަށެވެ. އަދި އެނިސްޓަން ކަހަލަ ތަރިން މާވެލް އަށް ބޭނުންނުވާ ކަމަށާއި އެތަނަކީ މިހާރު ވެސް ވަރުގަދަ އެތައް ތަރިންނެއް އުފައްދާފައިވާ ސްޓޫޑިއޯއެއް ކަމަށް ވެސް ބައެއް މީހުން ބުނެފައިވެ އެވެ.