05 އޮކްޓޯބަރ 2019 - 06:54
އަހަރެމެންނަށް މޫދަކީ ކޮންމެ ދުވަހަކު ފެންނަ ތަނަކަށް ވިޔަސް އެ ނަސީބު ނުލިބޭ މީހުން ބައިވަރެވެ. އަދި އަމުދުން މޫދަށް އެރިކަން ނުލިބޭ މީހުން ގިނަ އެވެ.
އެމެރިކާގެ ފްލޮރިޑާގައި ދިރިއުޅޭ ވޭން ނޮސްޓްރޭންޑް އަލަށް މޫދަށް މި އެރުނީ 93 އަހަރުގަ އެވެ. އެއީ މިދިޔަ އާދީއްތަ ދުވަހު އެވެ.
އޭނާ ފްލޮރިޑާގެ ސަންޝައިން ސްޓޭޓްގައި އުޅޭތާ މިހާރު 20 އަހަރުވެއްޖެ އެވެ. އެންމެ ފުރަަތަމަ 1969 ގައި އޭނާ ބަދަލުވީ ފްލޮރިޑާގެ ފޯޓް ލައުޑަޑޭލްއަށެވެ.
ކައިވެނިކޮށް އަންހެން ދަރިއަކު ލިބުނު ފަހުން އޭނާ ދަރިފުޅު ސަންޑްރާ ފިޝާ ގޮވައިގެން މޫދަށް ގޮސް އުޅުނެވެ.
އެކަމަކު ދުވަހަކު ވެސް މޫދަށް އެރި ފަތާލައި، މޫދުގެ އުފަލެއް ނުހޯދަ އެެވެ. އެކަމަކު ވޭން އަކީ ދެވަނަ ބޮޑު ހަނގުރާމައިގެ ދުވަސްވަރު އެމެރިކާގެ ނޭވީގައި ވެސް މަސައްކަތްކުރި މީހަކަށްވުމެވެ.
އުމުރުން 93 އަހަރު ފުރުނު އިރު އޭނާ އެންމެ ކުރަން ބޭނުންވެ، އެކަމަކު ދުވަހަކު ވެސް ވާނެ ކަމަށް އުންމީދު ނުކޮށް ހުރި ކަމަކީ މޫދަށް އެރިލާނެ ފުރުސަތެއް ލިބުމެވެ. އެ ވާހަކަ ދަރިފުޅު ކައިރީ ދެއްކުމުން ސަންޑްރާ ވަނީ ބައްޕަގެ އެ ހުވަފެން ހަގީގަތަކަށް ހަދައިދޭނެ ކަމަށް ވައުދުވެފަ އެވެ.
އަލަބަމާގައި ދިރިއުޅޭ ސަންޑްރާ އެހެންވެ މި ފަހަރު ބޭނުންވީ ބައްޕަގެ އުފަން ދުވަހު މޫދަށް ގެންގޮސް މޫދުގައި އުޅެލާނެ ވަގުތުކޮޅެއް ހޯދައި ދިނުމެވެ. އުފަން ދުވަސް ފާހަގަކުރަން ބައްޕަ ގާތަށް ގޮސް ދެބަފައިން އެކީގައި ދިޔައީ ފްލޮރިޑާ އަނާ މާރިއާ އައިލެންޑަށެވެ. އެތަނުގެ ހިތްގައިމު މޫދަށް ބައްޕަ ގޮވައިގެން އެރި، މޫދުގެ އުފާ ސަންޑްރާ ވަނީ މުޅިން އަލަށް ބައްޕަ އަށް ހޯދައި ދީފަ އެވެ.
އެ ވާހަކަ އޭނާ ފޭސްބުކްގައި ފޮޓޯތަކާ އެކު އަނާ މާރިއާ އައިލެންޑް ޓެގްކޮށް ހިއްސާކުރުމުން އަނާ މާރިއާ އައިލެންޑް ޗެމްބާ އޮފް ކޮމާސްގެ ފޭސްބުކް ޕޭޖަށް ވެސް އެ ވާހަކަ ގެންގޮސްފައިވެ އެވެ. އެ ޕޯސްޓްގައި ސަންޑްރާ ވަނީ ބައްޕާއެކު މޫދަށް ދިއުމާ ގުޅޭ ގޮތުން ދެކެވުނު ވާހަކަތައް ވެސް ހިއްސާކޮށްފަ އެެވެ.
"ބައްޕަގެ އުފަން ދުވަސް މި ފަހަރު މާ ބޮޑަށް ވެސް ހާއްސަކޮށް ދެވުނީތީ އަހަރެން ވަރަށް އުފާކުރަން،" ސަންޑްރާ ސީބީއެސް ނިއުސް އަށް ބުންޏެވެ. "މޫދުގައި ހޭދަކުރި ކޮންމެ ހިނދުކޮޅަކީ ބައްޕަގެ މޫނުމައްޗަށް ވަރަށް ވެސް ބޮޑު އުފާވެރިކަމެއް ވެރިވެފައި އޮތް ވަގުތުކޮޅެއް. ބައްޕަ މޫދުގައި ވަރަށް އެންޖޯއިކުރި."