03 އޮކްޓޯބަރ 2019 - 18:08
ޓެރަރިޒަމް މަނާކުރުމުގެ ގާނޫނަށް ގެނައި އިސްލާހު ފަރުމާކޮށްފައި އޮތީ މި ސަރުކާރު ޖަވާބުދާރީ ކުރުވުން ހުއްޓުވައި ވަކި ބަޔަކަށް އަދަބު ދޭން ކަމަށް ކުރީގެ ރައީސް އަބްދުﷲ ޔާމީން ކ. ދިއްފުށީގައި މިއަދު ވިދާޅުވެއްޖެ އެވެ.
ސަރުކާރު ޖަވާބުދާރީކޮށް، އިދިކޮޅު ޕީޕީއެމަށް މެމްބަރުން އިތުރުކުރަން ކުރައްވާ ސިލްސިލާ ދަތުރުތަކުގެ ތެރެއިން ދިއްފުއްޓަށް ވަޑައިގެން ޔާމީން ވިދާޅުވީ އިސްލާމް ދީނާއި އިލްމުވެރިންނަށް ފުރައްސާރަކޮށް، މީހުންގެ ހައްގުތަކަށް އަރައިގަންނަމުންދާ ކަމަށެވެ. މިފަދަ އެތައް ކަމެއް އާއްމުވެފައިވާ އިރު ސަރުކާރުން ހައްލު ހޯދައިދީފައި ނުވާ ކަމަށް ވިދާޅުވެ ކަންބޮޑުވުން ފާޅުކުރެއްވި އެވެ.
އިސްލާހީ ބަދަލުތަކެއް ގެންނަވާނެ ކަމުގެ ވަރަށް ވަރުގަދަ ވާހަކަތަކެއް ދައްކަވައި ގާނޫނުތައް ފޮނުއްވުމުގެ ބޭނުމަކީ ކަންކަން ރަނގަޅު ކުރުން ކަމަށް ސަރުކާރުގެ އިސްވެރިން ދައްކަވާ ވާހަކަ ގަބޫލެއް ނުކުރެއްވޭ ކަމަށް ޔާމީން ވިދާޅުވި އެވެ.
އެމަނިކުފާނު ވިދާޅުވި ގޮތުގައި އެންމެ ފަހުން ފާސްކުރި ޓެރަރިޒަމްގެ ބިލަކީ، ރައްޔިތުން ހިތްހަމަނުޖެހޭ ކަންކަމުގައި އަޑުއުފުލަފާނެތީވެ އެކަން ހުއްޓުވަން މި ސަރުކާރުން އެޅި ފިޔަވަޅެކެވެ. އެ ބިލް ފަރުމާކޮށްފައި އޮތީ ބިރު ބޮޑު ގޮތަކަށް ކަން ފާހަގަކުރައްވައި ވިދާޅުވީ ޖަވާބުދާރީ ކުރުވުމުގެ ގޮތުން ސަރުކާރަށް އުނދަގޫވާ ވަކި ކަހަލަ ވާހަކަތަކެއް ދެއްކުމަކީ ވެސް ސަރުކާރު ހިންގަން ދަތިކުރުން ނުވަތަ ބިރުދެއްކުން ކަމުގައި މާނަ ކޮށްފާނެ ކަމަށެވެ.
އެއީ، ޖަވާބުދާރީ ކުރުވާ މީހުންނަށް އަދަބު ދޭ ގޮތަށް ގެނައި އިސްލާހެއް ކަމަށް ވެސް ވިދާޅުވި އެވެ.
"އަޅުގަނޑުމެންގެ ސަރުކާރުގައި އިސްލާމްދީނާ ޚިލާފް ވާހަކަ އާއި މީހުންގެ އަބުރާ ބެހުމުގެ ވާހަކަ ފިޔަވައި އެހެން ހުރިހާ ވާހަކައެއް ހުއްދަ. ޓެރަރިޒަމް ހުއްޓުވުމަށް ކުރާ މަސައްކަތުގައި އެންމެ ވަރުގަދަ އަށް ކުރަން ޖެހެނީ ތަހުގީގު މަސައްކަތްތަކެއް، ސަވައިލެންސް މަސައްކަތްތަކެއް، އިންޓެލިޖެންސް މަސައްކަތްތަކެއް،" އިދިކޮޅު ލީޑަރު ޔާމީން ވިދާޅުވި އެވެ.
އެމަނިކުފާނު ވިދާޅުވި ގޮތުގައި ޓެރަރިޒަމް ހުއްޓުވުމަކީ މީހުން ދައްކާ ވާހަކަ ހުއްޓުވުމެއް ނޫނެވެ.
ޓެރަރިޒަމް ހުއްޓުވުމުގެ ގާބިލްކަމާއި ފެންވަރު މުއައްސަސާތަކުގެ ކިބައި އެބަހުރި ކަމަށާއި ގާނޫނަށް އިސްލާހުތަކެއް ގެނެސް މީހުން ދައްކާ ވާހަކަ ހުއްޓުވަން އުޅުމަކީ ޓެރަރިޒަމާ ދެކޮޅަށް ކުރާ މަސައްކަތެއްގެ ގޮތުގައި ގަބޫލު ނުކުރައްވާ ކަމަށް ޔާމީން ވިދާޅުވި އެވެ.
ޔާމީންގެ ވާހަކަފުޅުގައި، ނަން ވިދާޅު ނުވެ ހޯމް މިނިސްޓަރު އިމްރާން އަބްދުﷲ އަށް ވެސް ރައްދު ދެއްވި އެވެ. ޓެރަރިޒަމް ގާނޫނު އޮތް ގޮތުން ދީނީ އިލްމު ފަތުރާ އިލްމުވެރިންގެ ވާހަކަތައް އެކި ގޮތްގޮތަށް މާނަކޮށް ޓެރަރިޒަމަށް ފައްތަފާނެ ކަމުގެ ނުރައްކާ އޮތް ކަމަށް ވިދާޅުވެ ފާޅުކުރަމުންދާ ކަންބޮޑުވުންތަކަށް ޖަވާބު ދެއްވަމުން މިނިސްޓަރު ވިދާޅުވެފައި ވަނީ ނާޖާއިޒު ގޮތެއްގައި އެ ގާނޫނުގެ ބޭނުން ނުހިފާނެ ކަމަށެވެ.
ގާނޫނުގައި އެކަން އެގޮތަށް ލިއެފައި، އެކަން އެހެން ނުވާނެ ކަމަށް މިނިސްޓަރުން ކަށަވަރުކަން ދެއްވަނީ ކީއްވެތޯ ޔާމީން ސުވާލު ކުރެއްވި އެވެ.
"އެ ކަށަވަރު ކަން ދެއްވަންޏާ، ގާނޫނުގައި އެހާ ތިލަކޮށް އެ ކަންކަން އެހެން ލިއެގެން ނުވާނެ. މި ކަހަލަ ހާލެއްގައި ރާއްޖެ މިއޮތީ،" ޔާމީން ވިދާޅުވި އެވެ.
ޔާމީން ވިދާޅުވި ގޮތުގައި، މި ސަރުކާރު ވެރިކަމަށް އައި ފަހުން ރާއްޖޭގެ އެއްވެސް ސަރަހައްދަކުން ތަރައްގީގެ އާ މަޝްރޫއެއް ނުފެނެ އެވެ. ސިއްހީ ދާއިރާ އާއި ތައުލީމީ ދާއިރާ ކުރިއަރާނެ ކަމަށް ބެލެވޭ ފަދަ މަސައްކަތްތަކެއް މިހާތަނަށް ނުފަށާ ކަމަށް ވިދާޅުވި އެވެ.
ތައުލީމީ ދާއިރާގައި ނުރައްކާތެރި ކަމެއް ހިނގަމުންދާ ކަމަށް ވިދާޅުވެ، ތުއްތު ކުދިންގެ މުގައްރަރު އިސްލާހު ކުރުން އިނގިރޭސި ވިލާތުގެ ބަޔަކާ ހަވާލުކޮށްފައިވާ ކަމަށް ވިދާޅުވެ ކަންބޮޑުވުން ފާޅުކުރެއްވި އެވެ. އެޑިއުކޭޝަން މިނިސްޓްރީގެ އިސްވެރިންނާ ބައްދަލުކުރަން ބޭނުންވެގެން ޕީޕީއެމްގެ އިލްމުވެރިން އެކި ފަހަރުމަތިން ހުށަހަޅައިގެން ވެސް ފުރުސަތެއް ނުލިބިވާ ކަމަށް ވިދާޅުވި އެވެ.
"އަޅުގަނޑުމެން ހަމައެކަނި ކަށަވަރު ކުރަން ބޭނުން ވަނީ އެ ބޭފުޅުން މުގައްރަރަށް އެ ގެންނަވާ ބަދަލު ގެންނަވާ އިރު އިސްލާމީ އުސޫލްތަކާ ޚިލާފަށް، އިސްލާމްދީނާ ދުރަށް ކުޑަކުދިން ގެންދިއުމަށް ތަރުބިއްޔަތު ކުރުމަށް މަގުދެއްކުމަށް ފަހިވެދާނެތީ އެ ކަންކަން އެހެން ވިޔަނުދިނުން ކަށަވަރު ކުރަން،" ޔާމީން ވިދާޅުވި އެވެ.
އަންނަ އަހަރު ބާއްވާ ލޯކަލް ކައުންސިލްތަކުގެ އިންތިޚާބަކީ ސަރުކާރު ޖަވާބުދާރީ ކުރުވަން ރައްޔިތުންނަށް ލިބޭނެ ފުރުސަތެއް ކަމަށާއި އެ މަގަށް މަސައްކަތް ކުރަން މި އިންތިޚާބުގައި ޕީޕީއެމްގެ ކައުންސިލަރުން ހޮވައިދޭން ވެސް ޔާމީން މިއަދު އެދިވަޑައިގަތެވެ.