02 އޮކްޓޯބަރ 2019 - 14:40
ޕެރިސް (އޮކްޓޯބަރު 2) - ސައުދީ ސަރުކާރަށް ފާޑުކިޔަމުން ދިޔަ ވޮޝިންޓަން ޕޯސްޓުގެ ކޮލަމިސްޓް ޖަމާލް ޚާޝުގްޖީ މަރާލިތާ މިއަދަށް ވަނީ އެއް އަހަރު ފުރިފަ އެވެ. ކައިވެންޏަށް ބޭނުންވާ ލިޔުމެއް ހޯދުމަށް އިސްތަންބޫލްގައި ހުންނަ ސައުދީ ކޮންސިއުލޭޓަށް އޮކްޓޯބަރު 2، 2018 ގައި ޚާޝުގްޖީ ވަން ފަހުން އޭނާގެ ޚަބަރެއް ނުވެ އެވެ. ތިރީގައި މިވަނީ ޚާޝުގްޖީގެ މަރާ ގުޅޭ ގޮތުން ހިނގައިދިޔަ ކަންކަމުގެ ކުރު ޚުލާސާއެކެވެ.
ޚާޝުގްޖީ އެމެރިކާ އަށް ބަދަލުވީ 2017 ވަނަ އަހަރު އެވެ. އޮކްޓޯބަރު 2 ވަނަ ދުވަހު ކޮންސިއުލޭޓަށް ވަން މަންޒަރު ސީސީޓީވީގައި ރެކޯޑްކޮށްފައި ހުއްޓެވެ. އޭނާގެ ތުރުކީ ލޯބިވެރިޔާ ހުރީ ކޮންސިއުލޭޓުގެ ބޭރުގަ އެވެ. ކޮންސިއުލޭޓަށް ވަން ގޮތަށް ޚާޝުގްޖީ ނުކުމެފައެއް ނުވެ އެވެ. ޖެހިގެން އައި ދުވަހު ވޮޝިންޓަން ޕޯސްޓުން ވަނީ ޚާޝުގްޖީ ގެއްލުނު ކަމަށް ރިޕޯޓްކޮށްފަ އެވެ.
ޖެހިގެން ދުވަހު ތުރުކީ ސަރުކާރުގެ ބައެއް އޮފިޝަލުން މީޑިއާތަކަށް މައުލޫމާތު ދެމުން ބުނެފައި ވަނީ އެ މީހުންނަށް ބެލެވެނީ ޚާޝުގްޖީ ވަނީ ކޮންސިއުލޭޓް ތެރޭގައި މަރާލައިފައި ކަމަށެވެ. އަދި އޭނާ މަރާލީ ސައުދީން ތުރުކީ އަށް ދިޔަ ޚާއްސަ ޓީމަކުން ކަމަށް ވެސް ބުނެފައިވެ އެވެ. ނަމަވެސް ސައުދީން އެކަން ދޮގު ކުރެ އެވެ.
އޮކްޓޯބަރު 7 ވަނަ ދުވަހު ވޮޝިންޓަން ޕޯސްޓުން ބުނެފައި ވަނީ ލަފާކުރެވޭ ގޮތުގައި ޚާޝުގްޖީގެ ހަށިގަނޑު ވަނީ ކޮށާލާފައި ފޮއްޓަކަށްލުމަށް ފަހު ގައުމުން ބޭރަށް ފޮނުވާލައިފަ އެވެ. ނިއު ޔޯކް ޓައިމްސް އިން ބުނެފައި ވަނީ އެކަން ކޮށްފައި ވަނީ ވަލީ އަހުދު މުހައްމަދު ބިން ސަލްމާންގެ ސެކިއުރިޓީ ޓީމުގެ މެންބަރުން ކަމަށެވެ.
އޮކްޓޯބަރު 20 ވަނަ ދުވަހު ސައުދީ ސަރުކާރުން ވަނީ ކޮންސިއުލޭޓް ތެރޭ ޚާޝުގްޖީ މަރާލާފައިވާ ކަމަށް އެއްބަސްވެފަ އެވެ. އަދި އެއީ ކޮންސިއުލޭޓް ތެރޭ ހިންގި ތަޅާފޮޅުމެއްގައި ކަމަށް ވެސް ބުނެފައިވެ އެވެ. ސައުދީގެ އޭރުގެ ފޮރިން މިނިސްޓަރު އާދިލް އަލް ޖުބައިރު ފޮކްސް ނިއުސް އަށް އޮކްޓޯބަރު 21 ވަނަ ދުވަހު ވިދާޅުވެފައި ވަނީ ޚާޝުގްޖީ މަރާލުމަކީ ބަޔަކު ހިންގި ވަރަށް ގޯސް އަމަލެއް ކަމަށާއި އެ ބަޔަކު އެކަން ކޮށްފައި ވަނީ "ސައުދީ ސަރުކާރުގެ ބާރުގެ ބޭރުން" ކަމަށެވެ.
ތުރުކީގެ ރައީސް ރަޖަބް ތައްޔިބު އުރުދުޣާން އޮކްޓޯބަރު 23 ވަނަ ދުވަހު ވިދާޅުވީ ޚާޝުގްޖީ މަރާލީ ސައުދީން ތުރުކީ އަށް ދިޔަ 15 މެންބަރުންގެ ޓީމަކުން ކަމަށެވެ.
ޚާޝުގްޖީ މަރާލުމަކީ މުޅި ސައުދީގެ ހުރިހާ ރައްޔިތުންނަށް ވެސް ލިބުނު ހިތާމައެއް ކަމަށް ވަލީ އަހުދު މުހައްމަދު ބިން ސަލްމާން ވަނީ އޮކްޓޯބަރު 24 ގައި ވިދާޅުވެފަ އެވެ. އޮކްޓޯބަރު 31 ވަނަ ދުވަހު ތުރުކީގެ ޗީފް ޕްރޮސެކިއުޓާ ވިދާޅުވީ ޚާޝުގްޖީ މަރާލީ ކޮންސިއުލޭޓަށް ވަނުމާ އެކު އޭނާގެ ކަރުގައި ހިފައިގެން ކަމަށެވެ. އަދި އޭނާގެ ހަށިގަނޑު ކޮށާލުމަށް ފަހު ނައްތާލާފައި ކަމަށް އޭނާ ވިދާޅުވި އެވެ.
ނޮވެމްބަރު 15 ވަނަ ދުވަހު އުރުދުޣާން ވިދާޅުވީ ޚާޝުގްޖީ މަރާލުމުގެ އަމުރު އައީ ސައުދީގެ "އެންމެ މަތިން" ކަމަށެވެ. ސީއައިއޭގެ ބައެއް ފަރާތްތަކާ ހަވާލާދީ ވޮޝިންޓަން ޕޯސްޓުން ނޮވެމްބަރު 16 ވަނަ ދުވަހު ވަނީ ޚާޝުގްޖީ މަރާލުމުގެ ތުހުމަތު ޕްރިންސް މުހައްމަދަށް ކޮށްފަ އެވެ.
ޚާޝުގްޖީގެ މަރާލުމުގައި ބައިވެރި ކަމަށް ބެލެވޭ 11 މީހެއްގެ ޝަރީއަތް ފެށިކަން ޖެނުއަރީ 3 ވަނަ ދުވަހު ސައުދީގެ އެޓާނީ ޖެނެރަލް އިއުލާން ކުރެއްވި އެވެ. ޚާޝުގްޖީގެ މަރާ ޕްރިންސް މުހައްމަދާ އެއްވެސް ގުޅުމެއް ނެތް ކަމަށް ސައުދީ ފޮރިން މިނިސްޓަރު ވަނީ ފެބްރުއަރީ 8 ވަނަ ދުވަހު ވިދާޅުވެފަ އެވެ. އަދި ވަލީ އަހުދުގެ އިސްތަށިފުޅުގައި އެފަދަ ތުހުމަތު އަޅުވާ މީހުން އެކުރަނީ "ރަތް ރޮނގެއް" ހުރަސް ކުރުން ކަމަށް ވިދާޅުވެފައިވެ އެވެ.
ޖޫން 19 ވަނަ ދުވަހު އދ.ގެ ސްޕެޝަލް ރެޕަޓުއާ އަގްނީސް ކަލްމާޑް ވަނީ ޚާޝުގްޖީގެ މަރާ ޕްރިންސް މުހައްމަދާ ގުޅުން ހުރިކަމުގެ ހެކި ލިބިފައިވާ ކަމަށް ވިދާޅުވެފަ އެވެ. އެކަމަނާ ވަނީ ޚާޝުގްޖީގެ މަރުގެ ބައިނަލްއަގުވާމީ ޖިނާއީ ތަހުގީގެއް ހިންގުމަށް ގޮވާލައްވައިފަ އެވެ. އަދި ޚާޝުގްޖީގެ މަރާލުމުގައި ތުހުމަތު ކުރެވެ 11 މީހުންގެ ޝަރީއަތް ސައުދީން ކުރިއަށް ގެންދާ ގޮތް ބައިނަލްއަގުވާމީ މިންގަނޑުތަކަށް ނުފެތޭ ކަމަށްވެސް ކަލްމާޑް ވިދާޅުވި އެވެ.
އެމެރިކާގެ ޓީވީ ޗެނެލަކަށް ދެއްވި އިންޓަވިއުއެއްގައި ޕްރިންސް މުހައްމަދު ސެޕްޓެމްބަރު 26 ވަނަ ދުވަހު ވަނީ ޚާޝުގްޖީ މަރާލުމާ ގުޅޭ އެއްވެސް މައުލޫމާތެއް ލިބިވަޑައިގެންފައި ނުވާ ކަމަށް ވިދާޅުވެފަ އެވެ. އެކަމަކު ސައުދީގެ ލީޑަރެއްގެ ހައިސިއްޔަތުން އެކަމުގެ ޒިންމާ އުފުއްލަވާ ކަމަށް ވިދާޅުވި އެވެ.