24 ސެޕްޓެމްބަރ 2019 - 12:05
ޖަކާޓާ (ސެޕްޓެމްބަރު 24) - އިންޑޮނީޝިއާގެ ޕްރޮވިންސްގެ ޖައްވު މި ހަފުތާގެ ބަންދުގައި ރަތް ކުލައަށް ބަދަލުވުމުން އެއީ އާދަޔާޚިލާފު މަންޒަރެއް ކަމަށް ބައެއް މީހުން ސިފަކޮށްފި އެވެ.
އެކަމަކު އެއީ އެ ގައުމުގެ ޖަންގަލިތަކުގައި ރޯވެ އަނދަމުންދާ އަލިފާނުގެ ދުމުގެ ސަބަބުން ޖައްވަށް އައި ބަދަލެކެވެ.
ޖައްވު ރަތް ކުލައަށް ބަދަލުވި ޖަމްބީ ޕްރޮވިންސްގައި ދިރިއުޅޭ މީހަކު ބުނީ ދުމުގެ ސަބަބުން އޭނާގެ ލޮލަށާއި ކަރުތެރެއަށް އުނދަގޫވާ ކަމަށެވެ. ޖަމްބީ ޕްރޮވިންސްގެ މެކާ ސަރީ އަވަށުގައި ދިރިއުޅޭ އެކަ ވުލަންދަރި ވަނީ ޖައްވު ރަތްކޮށް އޮތް މަންޒަރުގެ ފޮޓޯތައް މެންދުރު ވަގުތު ނަގައި ފޭސްބުކްގައި ޝެއާކޮށްފަ އެވެ. އުމުރުން 21 އަހަރުގެ ވުލަންދަރިގެ ފޮޓޯތައް 34،000 ފަހަރު ވަނީ ޝެއާކޮށްފަ އެވެ.
ބީބީސީ އަށް އޭނާ ބުނީ އެއީ އަސްލު ފޮޓޯތަކެއް ކަމަށް ގިނަ މީހުން ގަބޫލް ނުކުރާ ކަމަށެވެ.
"އެކަމަކު އެއީ އަހަރެންގެ ފޯނުން ނެގި އަސްލު ފޮޓޯ އާއި ވީޑިއޯތަކެއް،" އޭނާ ބުންޏެވެ.
ޓްވިޓާގައި އެހެން މީހަކު ވެސް ވަނީ ޖަމްބީ ޕްރޮވިންސްގެ ޖައްވު ރަތްކޮށް އޮތް މަންޒަރުގެ ފޮޓޯތަކެއް ޝެއާކޮށްފަ އވެ.
"މިއީ މާސްއެއް ނޫން. މިއީ ޖަމްބީ ޕްރޮވިންސް،" ޒުނި ޝޮފި ޔަތުން ނިސާ ކިޔާ މީހަކު ޓްވިޓާގައި ލިޔެފައިވެ އެވެ. "އަޅުގަނޑުމެން އިންސާނުންނަށް ސާފު ވައި ބޭނުންވޭ. ބޭނުން ވަނީ ދުމެއް ނޫން."
އިންޑޮނީޝިއާގެ މީޓިއޮރޮލޮޖިކަލް އެޖެންސީން ބުނެފައި ވަނީ ޖަމްބީ ޕްރޮވިންސްގެ ޖައްވުމުގެ ބައެއް ސަރަހައްދުތައް ރަތް ކުލައިން ހުރި މަންޒަރު ސެޓެލައިޓް ފޮޓޯތަކުން ވެސް ފެނިފައިވާ ކަމަށެވެ.
ދުން ބޯވެފައިވާ އިރު ޖައްވު ރަތް ކުލައިން ފެންނަނީ "ރޭލެއި ސްކެޓާރިން" ގެ ސަބަބުންނެވެ. ސިންގަޕޫރު ޔުނިވާސިޓީގެ އެސޯސިއޭޓް ޕްރޮފެސަރަކު ވިދާޅުވީ އެއީ ދުމުގައި ހުނަނަ ވަކި ބާވަތެއްގެ ޕާޓިކަލްސް އިން ނޫކުލަ ފިލްޓާކޮށް، ބޮޑަށް ރަތް ކުލަ ފާޅުވާތީ ވާގޮތެއް ކަމަށެވެ. މެންދުރު ވަގުތު އެ މަންޒަރު މާބޮޑަށް ފެންނާނެ ކަމަށް އޭނާ ވިދާޅުވި އެވެ.