24 ސެޕްޓެމްބަރ 2019 - 08:27
ޗުއްޓީއަކަށް ތަނަކަށްދާ އިރު ގިނަ މީހުން ބޭނުން ވާނީ ހިތަށް އުފާވެރިކަން ލިބޭ ހަމަހިމޭން ތަނަކަށް ދާށެވެ. ރާއްޖޭގެ ރިސޯޓްތަކަށް ދުނިޔޭގެ އެކި ހިސާބުތަކުން މީހުން އަންނަނީ ވެސް މި ސަބަބާ ހެދި އެވެ.
ނަމަވެސް ތަންކޮޅެއް ހަލަބޮލި، އަޑުފަށްގަނޑު ގަދަ ތަނަކަށް ދާން ބޭނުން ނަމަ އަދި މުޅިން ތަފާތު ކަމެއް ތަޖުރިކޮށްލަން ބޭނުން ނަމަ ކެރީބިއަންގެ ރަށެއް ކަމަށްވާ ސެއިންޓް މާޓިންގެ މާހޯ ބީޗަކީ ވެސް ހާއްސަކަން ކުޑަ ތަނެއް ނޫނެވެ. މިތަނުގެ ފޮޓޯތަކާއި ވީޑިއޯތައް ސޯޝަލް މީޑިއާގައި އަބަދުވެސް އެނބުރެ އެވެ.
މާހޯ ބީޗްގެ ތަފާތަކީ އެތަނުގައި ތިބޭ އިރު، އަތްލެވޭ ހިސާބު ތިރިން، ބޯމަތިން ބޮޑެތި މަތިންދާބޯޓް އުދުހޭތީ އެވެ. މިކަން މި ގޮތަށް ދިމާވަނީ އެ ބީޗާ، ޕްރިންސެސް ޖޫލިއާނާ އިންޓަނޭޝަނަލް އެއާޕޯޓް ކައިރިވަމުންނެވެ. ބީޗް އޮންނާނީ ސީދާ އެއާޕޯޓާ އިންވެގެން ކަހަލަ ގޮތަކަށެވެ.
ގާތްގަނޑަކަށް 2،180 މީޓަރު (7،150 ފޫޓް) ގެ ރަންވޭއެއް އޮންނަ އެއާޕޯޓަށް އައިސްގޮސްވާ ފްލައިޓްތައް އަތްލެވޭ ހިސާބުން ދަތުރުކުރާ ތަން ފެނުމަކީ މާހޯ ބީޗަށް ދާ ވަރަށް ގިނަ ބަޔަކަށް ޝައުގުވެރި މަޖާ ކަމެކެވެ.
މި މަންޒަރު ފެންނަ ފޮޓޯތަކާއި ވީޑިއޯތަކުން މާހޯ ބީޗަށްދާ މީހުންނަށް ލިބޭ އުފާ ފެންނާނެ އެވެެ. ގިނަ މީހުން ބުނަނީ އަޑުފަށްގަނޑު ކިތަންމެ ގަދަވިޔަސް މިއީ ވަރަށް އާދަޔާހިލާފު ތަޖުރިބާއެއް ކުރެވޭ ތަނެއް ކަމަށެވެ. އަދި ތަފާތު ފޮޓޯއެއް ނަގަން ބޭނުން ނަމަ މާހޯ ބީޗަށް ދިއުމުން އެކަން ވެދާނެ އެވެ.
ނަމަވެސް މާހޯ ބީޗްގައި އުޅޭ އިރު އަމިއްލަ ރައްކާތެރި ކަމަށް ވަރަށް ބޮޑަށް ސަމާލުކަން ދޭން ޖެހޭނެ އެވެ. އެކަން އަންގައިދޭ އިންޒާރުގެ ބޯޑްތައް މި ސަރަހައްދުގައި ބަހައްޓާފައިވެ އެވެ. އެ އިންޒާރަށް ނުބަލައި އުޅުނު ބައެއް މީހުންނަށް ބޮޑެތި އަނިޔާތައް ލިބިފައިވެ އެވެ.