19 ސެޕްޓެމްބަރ 2019 - 09:17
ރޭ ބޭއްވި މި އަހަރުގެ 20 ވަނަ އައިފާ އެވޯޑްސްގެ އެންމެ މޮޅު ފިލްމުގެ މަގާމު މި އަހަރު ބޭއްވިި ފިލްމުފެއާ އެވޯޑްގައި ވެސް އެންމެ މޮޅު ފިލްމުގެ މަގާމު ހޯދި "ރާޒީ" އަށް ލިބިއްޖެ އެވެ.
މި ފިލްމަކީ ކަރަން ޖޯހަރު ޕްރޮޑިއުސްކޮށް، މެގްނާ ގުލްޒާރު ޑައިރެކްޓްކުރި ފިލްމެކެވެ. ކުޑަ ބަޖެޓަކުން ހަދައި، ބޮކްސް އޮފީހުގައި 100 ކްރޯޑް ރުޕީސް (14 މިލިއަން ޑޮލަރު) އަށް ވުރެ ބޮޑު އާމްދަނީއެއް ވެސް ހޯދި "ރާޒީ" ގެ މުހިއްމު ރޯލްތައް ކުޅުނީ އާލިއާ ބަޓާއި ވިކީ ކޯޝަލް އެވެ.
މުޅިން އަލަށް އިންޑިއާގައި ބޭއްވި އައިފާ އެވޯޑްގައި އެ ފިލްމު އުފުލައިލި އެވޯޑްތަކުގެ ތެރޭގައި އާލިއާ އަށް ލިބުނު އެންމެ މޮޅު ބަތަލާގެ އެވޯޑް، އެންމެ މޮޅު ފިރިހެން ލަވަކިޔުންތެރިޔާ (އަރިޖިތު) ގެ އެވޯޑް އަދި އެންމެ މޮޅު އަންހެން ލަވަކިޔުންތެރިޔާ (ހަޝްދީޕް ކޯރް) ގެ އެވޯޑް ހިމެނެ އެވެ.
އާލިއާ އަކީ ފިލްމުފެއާގައި ވެސް "ރާޒީ" އިން އެންމެ މޮޅު ބަތަލާގެ އެވޯޑް ލިބުނު ތަރި އެވެ.
* އެންމެ މޮޅު ޑައިރެކްޓަރު: ސްރީރާމް ރަގްވަން (އަންދާދުން)
* އެންމެ މޮޅު ބަތަލު: ރަންވީރު ސިންގް (ޕަދުމާވަތު)
* އެންމެ މޮޅު ސަޕޯޓިން ބަތަލު: ވިކީ ކޯޝަލް (ސަންޖޫ)
* އެންމެ މޮޅު ސަޕޯޓިން ބަތަލާ: އަދިތީ ރާއޯ ހައިދަރީ (ޕަދުމާވަތު)
* އެންމެ މޮޅު ސްކްރީންޕްލޭ: އަންދާދުން
* އެންމެ މޮޅު ޑައިލޮގް: ބަދާއީ ހޯ
* އެންމެ މޮޅު އެޑިޓިން: އަންދާދުން
* އެންމެ މޮޅު ބެކްސްކޯ: އަންދާދުން
* އެންމެ މޮޅު ސައުންޑް މިކްސިން: އަންދާދުން
* އެންމެ މޮޅު ނެށުން: ޕަދުމާވަތު
* އެންމެ މޮޅު ސިނަމަޓޯގްރަފާ: ޕަދުމާވަތު
* އެންމެ މޮޅު ސައުންޑް ޑިޒައިން: ތުމްބަޅް
* އެންމެ މޮޅު ސްޕެޝަލް އިފެކްޓްސް: ތުމްބަޅް
* އެންމެ މޮޅު މިއުޒިކް ޑައިރެކްޓަރު: އަމާލް މާލިކް
* އެންމެ މޮޅު ޅެން: އަމީތާބް ބަޓަޗަރިއާ (ދަޅަކް)
* އެންމެ މޮޅު މިއުޒިކް އަލްބަމް: ސޯނޫ ކޭ ޓިޓީ ކީ ސްވީޓީ
* އެންމެ މޮޅު އާ ބަތަލު: އިޝާން ޚައްތަރު (ދަޅަކް)
* އެންމެ މޮޅު އާ ބަތަލާ: ސާރާ އަލީ ޚާން (ކޭދަރުނާތު)
އައިފާ އެވޯޑްގެ ހާއްސަ އެވޯޑް ލިބުނު ފަރާތްތަކަށް ބަލާއިރު ފާއިތުވި 20 އަހަރުގެ އެންމެ މޮޅު ބަތަލާގެ އެވޯޑް ދީޕިކާ އަށް ޕަދުކޯން އަށް ލިބުނު އިރު، އެ ދާއިރާ އިން އެވޯޑް ލިބުނު އެކްޓަރަކީ ރަންބީރް ކަޕޫރެވެ.
ފާއިތުވި 20 އަހަރު އެންމެ މޮޅު ފިލްމުގެ މަގާމު ރިތިކް ރޯޝަން ބޮލީވުޑަށް ތައާރަފުވި ފިލްމު "ކަހޯ ނާ ޕިޔާރު ހޭ" އަށް ލިބުނު އިރު، ފާއިތުވި 20 އަހަރުގެ އެންމެ މޮޅު ޑައިރެކްޓަރުގެ އެވޯޑް ލިބުނީ "3 އިޑިއަޓްސް" އާއި "ޕީކޭ" އަދި "ސަންޖޫ" ފަދަ ފިލްމުތައް ގެނެސްދިން ރާޖްކުމާރު ހިރާނީއަށެވެ.
ފާއިތުވި 20 އަހަރުގެ އެންމެ ކާމިޔާބު މިއުޒިކް ޑައިރެކްޓަރުގެ މަގާމު ލިބުނީ "އޭ ދިލް ހޭ މުޝްކިލް" ފަދަ އެތައް ފިލްމެއްގެ މިއުޒިކް ހެދި ޕްރިތަމް ޗަކްރަބަތީއަށެވެ.
ލައިފްޓައިމް އެޗީވްމަންޓް އެވޯޑް ލިބުނީ ޖަގްދީޕަށެވެ. ކުރީގެ ވަރަށް ގިނަ ފިލްމުތަކުގައި ކޮމެޑީ ރޯލްތައް ކުޅެފައިވާ ޖަގްދީޕަކީ އެކްޓަރު ޖާވިދު ޖެފްރީގެ ބައްޕަ އެވެ. އަދި އޭނާ އަކީ މި އަހަރު ރިލީޒްކުރި ފިލްމު "މަލާލް" އިން ތައާރަފުވި އެކްޓަރު މީޒާން ޖެފްރީގެ ކާފަ އެވެ.
މި އަހަރުގެ އައިފާ އެވޯޑްގައި ވެސް މަޝްހޫރު ބައެއް ތަރިންގެ ފޯރިގަދަ ސްޓޭޖް ޕަފޯމަންސްތައް ފެނިގެން ދިޔަ އެވެ. އޭގެ ތެރޭގައި ސަލްމާން ޚާން، ކެޓްރީނާ ކެއިފް، ރަންވީރު، ސާރާ، ވިކީ އަދި މަދޫރީ ޑިކްސިޓް ހިމެނެ އެވެ.