03 ސެޕްޓެމްބަރ 2019 - 13:12
ތެހެރާން (ސެޕްޓެމްބަރު 3) - އިމާމް ޚުމައިނީ ސްޕޭސް ސެންޓަރުން އުދުއްސާލަން އުޅުނު ރޮކެޓް ގޮވީ ޓެކްނިކަލް މައްސަލައެއް ދިމާވެގެން ކަމަށް އީރާނުން ބުނެފި އެވެ.
ރޮކެޓް ގޮވި ސަބަބު ފުރަތަމަ ފަހަރަށް ހާމަކޮށްދެމުން ސަރުކާރުގެ ތަރުޖަމާން އަލީ ރާބިއީ ވިދާޅުވީ އެކަން ހިނގީ ޓެސްޓް ސައިޓެއްގައި ކަމަށެވެ.
"ލޯންޗް ސައިޓްގައި އެއްވެސް ކަމެއް ނުހިނގާ،" އޭނާ ވިދާޅުވި އެވެ.
އީރާނުގެ ރޮކެޓް ލޯންޗް ޕެޑަކުން މިދިޔަ ބުރާސްފަތި ދުވަހު ދުން އަރަމުން ދިޔަ ސެޓެލައިޓް ފޮޓޯތަކެއް ޕްލެނެޓް ލެބުން ހާމަކޮށްފައިވެ އެވެ.
ރާބިއީ ވިދާޅުވީ އެއީ އެމެރިކާގެ ޖާސޫސީ ސެޓެލައިޓަކުން ނަގާފައިވާ ފޮޓޯތަކެއް ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވަނީ ސެޓެލައިޓް ފޮޓޯއަކާ އެކު ޓްވީޓެއް ކުރައްވައިފަ އެވެ. އީރާނަށް މަލާމާތެއްގެ ގޮތުން ޓްރަމްޕް ވިދާޅުވެފައި ވަނީ އެކަމުގައި އެމެރިކާގެ ބައިވެރިވުމެއް ނޯންނާނެ ކަމަށާ އަދި އެކަން ހިނގައިދިޔަ ގޮތް ތަހުގީގު ކުރުމުގައި އީރާނަށް ކާމިޔާބީއަށް އެދޭ ކަމަށެވެ.
ރާބިއީ ވިދާޅުވީ އެފަދަ ފޮޓޯއެއް ޓްރަމްޕް ޓްވީޓް ކުރަން ޖެހޭ ސަބަބެއް ނޭނގޭ ކަމަށާއި ފަހަރެއްގައި އެއީ އީރާނާ ބެހޭ މައުލޫމާތު ނޭނގޭތީ ކުރެއްވި ކަމަކަށް ވެސް ވެދާނެ ކަމަށެވެ.