25 އޯގަސްޓް 2019 - 12:57
ދުބާއީ (އޮގަސްޓް 25) - ޔުނައިޓެޑް އަރަބި އެމިރޭޓްސް (ޔޫއޭއީ) އިން ދޭ އެންމެ މަތީ މަދަނީ ޝަރަފް އިންޑިއާގެ ބޮޑު ވަޒީރު ނަރެންދުރަ މޯދީ އަށް އަރުވައިފި އެވެ.
އޯޑާ އޮފް ޒައިދު މެޑަލް މޯދީ އަށް އެރުވީ ޔޫއޭއީގެ ވަލީ އަހުދު ޝެއިޚް މުހައްމަދު ބިން ޒައިދު އަލް ނަހްޔާން އެވެ. ރަން މެޑަލް ނިސްބަތް ވަނީ ޔޫއޭއީގެ ފުރަތަމަ ރައީސް ޝެއިޚް ޒައިދު ބިން ސުލްތާން އަލް ނަހުޔާންގެ ނަމަށެވެ.
މޯދީއާ އެކު ފޮޓޯއަކަށް ހުއްޓިވަޑައިގެން ޒައިދު ބިން އަލް ނަހުޔާން ވިދާޅުވީ "މަނިކުފާނަށް މި ޝަރަފް ހައްގު" ކަމަށެވެ.
ޔޫއޭއީގެ އެންމެ މަތީ ޝަރަފް މޯދީ އަށް ލިބިވަޑައިގަންނަވާކަން އިއުލާންކުރީ މިދިޔަ އެޕްރީލް މަހު އެވެ.
ޔޫއޭއީގެ އެންމެ މަތީ މަދަނީ ޝަރަފް މޯދީ އަށް އެރުވިއިރު ކަޝްމީރުގައި އިންޑިއާ އިން ހިންގާ އަމަލުތަކާ މެދު ވަނީ ފާޑުކިޔުންތައް އަމާޒުވެފަ އެވެ. އެކަމަކު ޔޫއޭއީ އިން އިންޑިއާ އަށް ކަނޑައަޅާފައި ހުންނަ ސަފީރު ވިދާޅުވީ ކަޝްމީރަކީ އިންޑިއާގެ ދާޚިލީ މައްސަލައެއް ކަމަށެވެ.
ޔޫއޭއީ އަށް ފަހު މޯދީ ދެން ވަޑައިގެންނެވީ ބަހުރޭނަށެވެ. މިއީ އިންޑިއާގެ ބޮޑު ވަޒީރަކު ބަހުރޭނަށް ވަޑައިގެންނެވި ފުރަތަމަ ފަހަރެވެ. ބަހުރޭނުން މޯދީ އަށް ވަނީ ކިންގް ހަމަދު އޯޑާ އެވޯޑް އަރުވައިފަ އެވެ.