22 އޯގަސްޓް 2019 - 18:37
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)އާ ގުޅޭ ގިނަ މައްސަލަތަކެއް ބަލައި ފާހަގަކުރެވި، އެ އެސޯސިއޭޝަންގެ މިހާރުގެ ހިންގާ ކޮމިޓީ އުވާލައި އެ އިދާރާ ހިންގުން ނޯމަލައިޒިން ކޮމިޓީއަކާ ހަވާލުކުރަން ކޮމިޝަނާ އޮފް ސްޕޯޓްސް އިން ނިންމާފައިވާ ނިންމުން ސައްހަ ކަމަށް މޯލްޑިވްސް އޮލިމްޕިކް ކޮމިޓީން ނިންމައި އެކަން ދުނިޔޭގެ ވޮލީބޯޅަ ފެޑެރޭޝަން ކަމަށްވާ އެފްއައިވީބީ އަށް އަންގައިފި އެވެ.
ވީއޭއެމްގެ ރައީސް މުހައްމަދު ލަތީފްގެ ލީޑާޝިޕާ ގުޅުން ހުރި މައްސަލަތައް ތަހުގީގުކޮށް، ހިންގާ ކޮމިޓީ އުވާލައި އިންޓަރިމް/ނޯމަލައިޒޭޝަން ކޮމިޓީއާ ހަވާލުކުރީ މިދިޔަ ޖޫން މަހުގެ 10 ވަނަ ދުވަހު އެވެ. އެ ކޮމިޓީއާ ހަވާލުކޮށްފައިވަނީ އެސޯސިއޭޝަން ހިންގުމުގެ އިތުރުން ހުރި މައްސަލަތައް ތިން މަސް ދުވަހުގެ ތެރޭގައި އިސްލާހުކޮށް އާ އިންތިހާބަކަށް ދިއުމެވެ.
އެފްއައިވީބީގެ ޖެނެރަލް ޑިރެކްޓަރު ފަބިއޯ އަޒެވޭޑޯ މިދިޔަ ޖުލައި މަހު ރާއްޖޭގެ އޮލިމްޕިކް ކޮމިޓީގެ ރައީސް މުހައްމަދު ޝަވީދަށް އެޑްރެސް ކުރައްވައި ފޮނުއްވި ސިޓީއެއްގައި ވިދާޅުވީ، ރާއްޖޭގެ ކޮމިޝަނާ އޮފް ސްޕޯޓްސް އިން އިންޓަރިމް ކޮމިޓީއަކާ ވީއޭއެމް ހިންގުން ހަވާލުކޮށްފައިވާ ކަމުގެ މައުލޫމާތު އެ ފެޑެރޭޝަނަށް ލިބިފައިވާ ކަމަށެވެ. އަދި ވީއޭއެމް އޮފީސް ވެސް ހިންގަނީ އިންޓަރިމް ކޮމިޓީންކަން މައުލޫމާތު ލިބިފައިވާ ކަމަށާއި އެ ފެޑެރޭޝަނުން މިހާރު މަސައްކަތް ކުރަމުން އަންނަނީ މި ކަމާ ބެހޭ މައުލޫމާތުތައް އެއްކުރުމަށް ކަމަށެވެ. އެކަން އޮޅުންފިލުވުމަށް ފަހު މިއަދު ރާއްޖޭގެ އޮލިމްޕިކް ކޮމިޓީން ވަނީ އެފްއައިވީބީ އަށް ސިޓީއެއް ފޮނުވައިފަ އެވެ.
އޮލިމްޕިކް ކޮމިޓީގެ ސެކްރެޓަރީ ޖެނެރަލް އަހުމަދު މަރުޒޫގް (މަރޭ) ސޮއިކުރައްވައި އެފްއައިވީބީ އަށް ފޮނުއްވި ސިޓީގައި ވިދާޅުވީ ނޯމަލައިޒިން ކޮމިޓީ އަކާ ވީއޭއެމް ހިންގުން ހަވާލުކުރީ ރަނގަޅަށް ކަމަށާއި ރާއްޖޭގެ ވޮލީ އަލުން ހަމަމަގަށް އަޅުވަން ނޯމަލައިޒިން ކޮމިޓީން ކުރާ މަސައްކަތްތަކަށް އެއްބާރުލުންދޭ ކަމަށެވެ. އަދި ނޯމަލައިޒިން ކޮމިޓީގެ މެމްބަރުންނަށް އެފްއައިވީބީ އާއި ސެންޓްރަލް ޒޯނުގެ ފަރާތުން ދޭން ޖެހޭ ހުރިހާ ހިދުމަތެއް ފޯރުކޮށްދިނުމަށް އެދިފައިވެ އެވެ.
އަދި މިހާރު ނޭޕާލުގައި މިހާރު ކުރިއަށްދާ ސެންޓްރަލް ޒޯން މުބާރާތުގެ ތެރެއިން އޮތް އޭވީސީގެ އާންމު ޖަލްސާގައި ނޯމަލައިޒިން ކޮމިޓީގެ ފަރާތުން ބައިވެރިވާ ރާއްޖޭގެ ސްޕޯޓްސް މިނިސްޓްރީގެ ޑެޕިއުޓީ އަހުމަދު އިބްރާހިމް އަށް ބައިވެރިވެވަޑައިގެންނެވޭނެ ހުރިހާ އިންތިޒާމެއް ހަމަޖައްސައިދިނުމަށް އޮލިމްޕިކް ކޮމިޓީގެ ސިޓީގައި އެދިފައިވެ އެވެ. އޭވީސީގެ އާންމު ޖަލްސާގައި ރާއްޖޭން ވަނީ އަންނަ އަހަރުގެ އަންހެން އަދި ފިރިހެން ސެންޓްރަލް ޒޯން މުބާރާތް ބާއްވަން ބިޑްކުރަން ނިންމައިފަ އެވެ.
ޑެޕިއުޓީ މިނިސްޓަރު އަހުމަދުގެ އިތުރުން ވޮލީގެ އިންޓަރިމް ކޮމިޓީގައި ހިމެނެނީ ކޮމިޓީގެ ރައީސް ބާސްކެޓްބޯލް އެސޯސިއޭޝަންގެ ކުރީގެ ނައިބު ރަައީސް އަބްދުﷲ އާމިރު (އައްލޯ)، ނައިބު ރައީސަކަށް ހަމަޖައްސާފައި ވަނީ އޮލިމްޕިކް ކޮމިޓީގެ އެކްސްކޯ މެމްބަރު އަދި ހޭންޑްބޯލް އެސޯސިއޭޝަންގެ ރައީސް އަހުމަދު އިސްމާއީލް އެވެ. ދެން ހިމެނޭ ތިން މެމްބަރުންނަކީ ވީއޭއެމްގެ ކުރީގެ ޖެނެރަލް ސެކްރެޓަރީ އަދި ސްޕޯޓްސް ކޯޕަރޭޝަންގެ މިހާރުގެ ޗެއާމަން ހުސެއިން މުހައްމަދުގެ އިތުރުން ޔޫތު މިނިސްޓްރީގެ މަރިޔަމް ޖުމާނާ އެވެ.
ވީއޭއެމްގެ ރައީސް ކަމުން ލަތީފް ދުރުކުރުމުން އޭނާ ވަނީ އެ މައްސަލަ ސިވިލް ކޯޓަށް ހުށަހަޅައިފަ އެވެ. އަދި ކޮމިޝަނާ އޮފް ސްޕޯޓްސް ވީއޭއެމް ހިންގުން ނޯމަލައިޒިން ކޮމިޓީއަކާ ހަވާލުކުރަން ނިންމި ނިންމުން ސަސްޕެންޑްކުރުމަށް އެދި ވަގުތީ އަމުރަކަށް ލަތީފް އެދުނު ނަމަވެސް ސިވިލް ކޯޓުން އެ އަމުރު ނެރެނުދިނެވެ. އޭވީސީ މެމްބަރެއްގެ ހައިސިއްޔަތުން އާންމު ޖަލްސާގައި ބައިވެރިވުމަށް ލަތީފް ހުރީ ނޭޕާލުގަ އެވެ.