23 އޯގަސްޓް 2019 - 08:35
ފިލްމެއް ބަލައިލަން ސިނަމާއެއްގައި އިންނަ އިރު، ގިނަ ބަޔަކަށް އެންމެ އުނދަގޫވާ އެއް ކަމަކީ ސިނަމާ ތެރޭގައި ހަޅޭއްލަވައި އަޑުގަދަ ކުރުމެވެ. މިކަމުގެ ސަބަބުން، ޝައުގުވެރިކަމާ އެކު ފިލްމުގެ ތެރެއަށް ގެއްލި އިނދެ ފިލްމު ބަލަން ބޭނުންވާ އެތައް ބަޔަކަށް ބޮޑު އުނދަގުލަކަށްވެ އެވެ.
އެހެންވެ ދުބާއީގައި ސިނަމާތަކެއް ހިންގާ ކުންފުންޏަކުން މިހާރު ވަނީ ސިނަމާތަކަށް ހާއްސަ އުސޫލުތަކެއް އެކުލަވާލައި، އަމަލުކުރަން ފަށައިފަ އެވެ.
ވޮކްސް ސިނަމާގެ ނަމުގައި ސިނަމާތައް ހިންގާ މާޖިދު އަލް ފުތައިމް ސިނަމާ ގްރޫޕުން އަލަށް އެކުލަވާލި އުސޫލުގެ ދަށުން، ސިނަމާ ތެރޭގައި ވާހަކައެއް ނުދެއްކޭނެ އެވެ. ފޯނެއް ބޭނުމެއް ނުކުރެވޭނެ އެވެ. އެއާހިލާފުވެއްޖެ ނަމަ ވަގުތުން ސިނަމާތަކުން ބޭރުކޮށްލާނެ އެވެ.
ހަމަމިއާ އެކު ފިލްމުތައް ދައްކަން ފަށަން ކަނޑައަޅާފައިވާ އޮންނަ ގަޑިއަށް ވުރެ ލަހުން އަންނަ މީހުންނާއި 18 އަހަރުން ދަށުގެ ކުދިން ވެސް ސިނަމާތަކަށް ނުވައްދާނެ އެވެ.
މިކަމާ ބެހޭ ގޮތުން މާޖިދު އަލް ފުތައިމް ސިނަމާ ގްރޫޕްގެ ޗީފް މާކެޓިން އެންޑް އިނޮވޭޝަން އޮފިސަރު މިޝެލް ވެލްޝް މީޑިއާތަކަށް ވިދާޅުވި ގޮތުގައި އަލަށް އަމަލުކުރަން ފެށި އުސޫލު އަދި ހޮވާލެވިފައިވާ ދުބާއީގެ ބައެއް ސިނަމާތަކުގައި ތަންފީޒު ކުރި ނަމަވެސް އަމާޒަކީ ތަޖުރިބާ އަށް ބަލައިފައި، މެދުއިރުމަތީގައި އެ ކުންފުނިން ހިންގާ ހުރިހާ ސިނަމާތަކަށް ވެސް އުސޫލު ތައާރަފު ކުރުމެވެ.
އޭނާ ވިދާޅުވި ގޮތުގައި ސިނަމާ އަށް މީހުން ވަންނަނީ އަމިއްލަ ޖީބުން ހަރަދުކޮށްފައި ކަމަށް ވާތީ ކޮންމެ މީހަކަށް ވެސް ހިމޭން އަދި ހިތްފަސޭހަ މާހައުލެއްގައި ފިލްމު ބަލައިލުމުގެ ފުރުސަތު އޮންނަން ޖެހޭނެ އެވެ. އަދި މިއީ ސިނަމާތަކުގައި ކޮންމެހެން ވެސް ދަމަހައްޓަން ޖެހޭ މިންގަނޑެއް ކަމަށް ބުންޏެވެ.
"ފިލްމުން ކިޔާ އެއްޗެހި ސާފުނުވާ ވަރަށް އަަޑުގަދަކޮށް، ފޯނު ކަހަލަ ޑިވައިސްތައް ސިނަމާތެރޭގައި ބޭނުންކުރުމަކީ ވެސް އެތައް ބަޔަކަށް އުނދަގޫވާނެ ކަމެއް،" މިޝެލް ވިދާޅުވި އެވެ. "އެހެންވެ އަލަށް އަމަލު ކުރަން ފެށި އުސޫލުގެ މައިގަނޑު ބޭނުމަކީ ޑިސްޓްރެކްޝަން-ފްރީ ވަގުތުކޮޅެއް ސިނަމާތަކުގައި ތަޖުރިބާކޮށްލަން މަގުފަހިކޮށް ދިނުން."
އަލް ފުތައިމުން ތައާރަފު ކުރި އުސޫލުތަކަށް ދުބާއީގެ ވަރަށް ގިނަ ބަޔަކު ވަނީ ތާއީދުކޮށް، އެކަމަށް ތައުރީފު ވެސް ކޮށްފަ އެވެ. ގިނަ މީހުން ބުނި ގޮތުގައި މިއީ އުންމީދެއް ހަގީތަކަށްވުން ކަހަލަ ކަމެކެވެ.