21 އޯގަސްޓް 2019 - 12:05
ލާމަރުކަޒީ ނިޒާމް ހަރުދަނާ ކުރުމާ ބެހޭ ގޮތުން ޓްރާންސްޕޭރެންސީ މޯލްޑިވްސްއިން ބާއްވާ ދެ ވަނަ މަހާސިންތާ މިއަދު ފަށައިފި އެވެ.
ކުރުނބާ މޯލްޑިވްސްގައި ދެ ދުވަހުގެ މުއްދަތަކަށް ކުރިއަށްގެންދާ މި މަހާސިންތާ ފައްޓަވައިދެއްވީ ފިނޭންސް މިނިސްޓަރު އިބްރާހިމް އަމީރެވެ.
ސިޓީ ކައުންސިލްތަކާއި އަތޮޅު ކައުންސިލްތަކުގެ އިތުރުން ރަށު ކައުންސިލްތަކާއި އަންހެނުންގެ ކޮމިޓީތަކުން ބައިވެރިވި މަހާސިންތާގެ ބޭނުމަކީ ރާއްޖޭގައި އޮތް ލާމަރުކަޒީ ނިޒާމުގައި ހުރި ގޮންޖެހުންތައް ދެނެގަނެ އެކަންކަމަށް ހައްލު ހޯދުމެވެ. އެގޮތުން ލާމަރުކަޒީ ނިޒާމް ހަރުދަނާ ކުރުމަށް ކުރެވޭނެ ކަންތައްތަކާ ގުޅޭ ގޮތުން މި މަހާސިންތާގައި އެކި ކައުންސިލްތަކުން މަޝްވަރާކުރުމަށް ވަނީ ނިންމާފަ އެވެ.
ޓްރާންސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރު މަރިޔަމް ޝިއުނާ ވިދާޅުވީ ފާއިތުވި އަހަރުތަކުގެ ތެރޭގައި ރާއްޖޭގައި އޮތް ލާމަރުކަޒީ ނިޒާމަށް އިހުމާލުވެފައިވާކަމަށެވެ. އެގޮތުން މި ނިޒާމާ ގުޅޭ ޕޮލިސީތަކާ ގުޅޭގޮތުން ކުރާ މަޝްވަރާތަކުގައި ކަމާބެހޭ އިސް ފަރާތްތަކުން ބައިވެރި ނުވުމަކީ މީގެ ކުރިން ދިމާވި ދަތިތަކެއް ކަމަށް އޭނާ ވިދާޅުވި އެވެ.
ޝިއުނާ ވިދާޅުވި ގޮތުގައި، ކުރިން މިފަދަ ކަންތައް ދިމާވި ނަމަވެސް މިހާރު ސަރުކާރުގެ މުއައްސަސާތަކުންނާއި ކަމާބެހޭ ވުޒާރާތަކުން އެއްބާރުލުން ލިބޭކަމަށެވެ.
"އަޅުގަނޑުމެން މި މަސައްކަތް ފެށި އިރަށްވުރެ ގުޅިފައިވާ މާހައުލެއް މިހާރު މިވަނީ ގާއިމުވެފައި. އެގޮތުން މަދަނީ ޖަމިއްޔާތަކުން ބާއްވާ މިފަދަ ބަައްދަލުވުންތަކަށް ދައުލަތުގެ އިސް ފަރާތްތަކުން ސަމާލުކަން ދީގެން ބައިވެރިވާތަން އަޅުގަނޑުމެންނަށް މިހާރު އެބަ ފެނޭ. ޕޮލިސީ ޗޭންޖް ގެންނަން މަސައްކަތް ކުރާއިރު މީގެ ކުރިން އަޅުގަނޑުމެންނަށް ކުރަން އެންމެ އުނދަގޫ މަސައްކަތަކީ ކަންކަމުގައި ބަސްކިޔައި ނިންމުންތައް ނިންމާ ފަރާތްތަކުގެ އެއްބާރުލުން ނުލިބުން،" ޝިއުނާ ވިދާޅުވި އެވެ.
ޓްރާންސްޕޭރެންސީ މޯލްޑިވްސް އިން ވަނީ ލާމަރުކަޒީ ނިޒާމުގައި ހުރި ގޮންޖެހުންތަކާ ގުޅޭގޮތުން ތައްޔާރުކޮށްފައިވާ "ޑީސެންޓްރައިލޭޝަން ރިވިއު" ފޮތެއް ނެރެފަ އެވެ. މި ފޮތް ނެރެދެއްވީ ފިނޭންސް މިނިސްޓަރު އަމީރާއި ޓްރާންސްޕޭރެންސީ މޯލްޑިވްސްގެ އެގްޒެކެޓިވް ޑިރެކްޓަރު ޝިއުނާ އެވެ.