19 އޯގަސްޓް 2019 - 14:53
ކ. ތުލުސްދޫގައި ތޫނު އެއްޗަކުން ހަމަލާދީ މަރާލި އަލީ ޝިހާމަށް ހަމަލާދިން ކަމަށާއި އެކަމަކު އެއީ މަރާލުމުގެ ގަސްދުގައި ދިން ހަމަލާއެއް ނޫން ކަމަށް ބުނެ، ގާތިލް މުހައްމަދު ނިޔާޒް ހައި ކޯޓުގައި މިއަދު މާފަށް އެދެފި އެވެ.
ޖުލައި، 2014 ގައި ތުލުސްދޫގައި ވަޅިއަކުން ހަމަލާދީ އެރަށު ބިޖިލީއުފާ، ޝިހާމް މަރާލި މައްސަލާގައި އެރަށު ރެޑްރޯސް، މުހައްމަދު ނިޔާޒް މެރުމަށް 2014 ގައި ކްރިމިނަލް ކޯޓުން އޮތީ ހުކުމްކޮށްފަ އެވެ. އެ ހުކުމް ނިޔާޒްގެ ފަރާތުން އިސްތިއުނާފް ނުކުރުމުން ސުޕްރީމް ކޯޓުން ހަމަޖައްސާފައިވާ އުސޫލުގެ ދަށުން އެ ހުކުމުގެ ސައްހަކަން ކަށަވަރު ކުރަން ހައި ކޯޓަށް ހުށަހެޅީ ދައުލަތުންނެވެ.
އެ މައްސަލާގެ ޝަރީއަތް ހައި ކޯޓުގައި މިއަދު ފެށިއިރު ނިޔާޒްގެ ވަކީލެއް ނެތެވެ. ވަކީލަކު ހަމަނުޖައްސަނީ ކީއްވެގެންތޯ ފަނޑިޔާރުންގެ ބެންޗުން ސުވާލު ކުރެއްވުމުން ނިޔާޒް ބުނީ އެއީ އޭނާ އިއުތިރާފްވެފައިވާ ކަންތައްތަކެއް ކަމަށް ވާތީ ވަކީލަކު ބޭނުންނުވަނީ ކަމަށެވެ. އެހެންވެ، ވަކީލަކާ ނުލައި އެ މައްސަލަ ކުރިއަށް ގެންދަން އޭނާ އެދުނެވެ.
ދަށު ކޯޓުގެ ހުކުމް ކަށަވަރުކުރަން ދައުލަތުން ފާހަގަކުރާ ކަންކަން ހުށަހެޅުމަށް ފަހު އެ ވާހަކަތަކާ ގުޅިގެން ނިޔާޒަށް ފުރުސަތު ދިނުމުން އޭނާ ބުނީ އެކަންކަން އެގޮތަށް ހިނގި ކަމަށާއި ޝިހާމް މަރުވީ އޭނާ ވަޅިއަކުން ހަމަލާ ދިނުމުން ކަމަށެވެ. އެކަމަކު އެއީ މަރާލުމުގެ ގަސްދުގައި ދިން ހަމަލާއެއް ނޫން ކަމަށާއި އަދި އެކަމަށް ޝިހާމްގެ އާއިލާގެ ކިބައިން މާފަށް އެދޭ ކަމަށް ވެސް ނިޔާޒް ބުންޏެވެ.
ދަށު ކޯޓުގައި ވެސް ވަކީލެއްގެ ފުރުސަތު ބޭނުން ކޮށްފައި ނުވަނީ ކީއްވެގެންތޯ ސުވާލު ކުރުމުން ނިޔާޒް ބުނީ އޭނާ ކުށަށް އިއުތިރާފްވުމަށް ފަހު އިތުރު "ދޮގުތަކެއް ނަހަދަންވެގެން" ވަކީލަކު ބޭނުން ނުކުރީ ކަމަށެވެ.
ދަށު ކޯޓުގެ ހުކުމާ ބެހޭ ގޮތުން ދައުލަތުން ބުނީ ނިޔާޒްގެ މައްޗަށް ކުށް ސާބިތުވާ ކަމަށް ނިންމާފައިވަނީ އޭނާގެ އަމިއްލަ އިއުތިރާފުންނާއި ލިބިފައިވާ އިތުރު ގަރީނާތަކަށް ބިނާކޮށްގެން ކަމަށާއި އެހެންވެ އޭނާގެ މައްޗަށް އެއްވެސް ޝައްކެއް ނެތް މިންވަރަށް އެ ކުށް ސާބިތުވާ ކަމަށެވެ. އަދި ތުހުމަތު ކުރެވޭ މީހާ އިއުތިރާފްގެ މައްޗަށް ބިނާކޮށް ކުށް ސާބިތު ކުރެވޭނެކަން ސުޕްރީމް ކޯޓުގެ ހުކުމެއްގައި ވެސް ފާހަގަކޮށްފައި އެބަ އޮތް ކަމަށް ދައުލަތުން ބުންޏެވެ.
ދައުލަތުން ބުނި ގޮތުގައި ދަށު ކޯޓުގައި ނިޔާޒްގެ މައްޗަށް ޝަރީއަތް ހިންގީ ތުހުމަތުކުރެވޭ މީހުންނަށް ދޭން ޖެހޭ ހުރިހާ ހައްގުތަކެއް ލިބިދީގެންނެވެ.
ޝިހާމްގެ މަރުގެ ބަދަލުގައި އޭނާގެ ވާރިސުން ބޭނުންވަނީ މަރަށް މަރު ހިފުމަށް ކަމަށް ބުނެފައިވާ ކަމަށާއި އެހެންވެ ނިޔާޒްގެ ކިބައިން މަރަށް މަރު ހިފުމުގެ ޝަރުތުތައް ފުރިހަމަވާ ކަމަށް ދައުލަތުން ބުންޏެވެ. އަދި ޝިހާމްގެ ވާރިސުންގެ ގޮތުގައި ބާލިޣުނުވާ ކުޑަކުދިން ތިއްބަސް އެ ކުދިންގެ ހައްގުގައި މަރަށް މަރު ހިފުމާ މެދު ގޮތެއް ނިންމިދާނެ ކަމަށް ސުޕްރީމް ކޯޓުގެ ހުކުމެއްގައި އެބަ އޮތް ކަމަށް ދައުލަތުން ބުންޏެވެ.
މަރަށް މަރު ހިފުމުގައި، ވާރިސުންގެ ގޮތުގައި ތިބޭ ބާލިޣުނުވާ ކުޑަކުދިންގެ ހައްގުގައި އެކަމުގައި ގޮތެއް ނިންމިދާނެ ކަމަށް ދައުލަތުން ބުނާ ސަބަބާ ބެހޭ ގޮތުން ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު މުހައްމަދު ނިޔާޒް ސުވާލު ކުރެއްވި އެވެ.
ޖަވާބުގައި ދައުލަތުން ބުނީ ސުންނަތް ޖަމާއަތުގެ ހަތަރު މަޒްހަބްގެ ތެރެއިން ދެ މަޒްހަބެއްގައި، މަރަށް މަރު ހިފަން ވާރިސުންގެ ބަސް ހޯދުމުގައި ކުޑަކުދިންގެ ހައްގުގައި އެހެން ފަރާތްތަކަށް ގޮތެއް ނިންމިދާނެ ކަމަށް ބުނާ ކަމަށެވެ. އަދި ދެން އޮންނަ ދެ މަޒްހަބްގައި އޮންނަނީ އެފަދަ ހާލަތެއްގައި ކުޑަކުދިން ބާލިޣުވަންދެން މަޑުކުރަން ކަމަށް ދައުލަތުން ބުންޏެވެ.
ސުންނަތް ޖަމާއަތުގެ ދެ މަޒްހަބެއްގައި އެކަން އެގޮތަށް ކުރެވިދާނެ ކަމަށް ބުނާއިރު އަނެއް ދެ މަޒްހަބްގައި އެ ކުދިން ބާލިޣުވަންދެން މަޑުކުރަން ޖެހޭނެ ކަމަށް ބުނާ ކަން ފާހަގަކުރައްވައި، ފަނޑިޔާރު ނިޔާޒް ވިދާޅުވީ އޭގެ ތެރެއިން ވަކި ގޮތަކަށް އަމަލު ކުރެވިދާނެ ކަމަށް ދެކެނީ ކީއްވެގެންތޯ ސުވާލު ކުރައްވައިފަ އެވެ. އަދި ގާނޫނު އަސާސީގައި އިސްލާމީ ޝަރީއަތް މާނަކޮށްފައި އޮތްއިރު އޭގައި މަޒްހަބްގެ ވާހަކައެއް ނެތް ކަމަށާއި ގާނޫނު އަސާސީގައި އޮތީ ސުންނަތް ޖަމާއަތުގެ އިލްމުވެރިން ބޮޑަށް ބުރަވާ ގޮތެއްގެ ވާހަކަ ކަން ވެސް ފަނޑިޔާރު ނިޔާޒް ފާހަގަކުރެއްވި އެވެ.
އެކަމާ ގުޅިގެން ދައުލަތުން އެދުނީ އެކަންކަން އިތުރަށް ދިރާސާ ކުރުމަށް ފަހު ޖަވާބުދާރީވުމަށް އިތުރު ފުރުސަތެއް ދިނުމަށެވެ.
ފަނޑިޔާރުންގެ ބެންޗުން ދައުލަތަށް އެންގެވީ ބާލިޣުނުވާ ކުޑަކުދިންގެ ހައްގުގައި މަރަށް މަރު ހިފުމާ މެދު ގޮތެއް ނިންމުމާ ބެހޭ ގޮތުން އިތުރަށް ދިރާސާކޮށް ދެން އޮންނަ އަޑުއެހުމެއްގައި ޖަވާބުދާރީވުމަށެވެ. އަދި ޝިހާމަށް ހަމަލާދިނީ ގަސްދުގައި ނޫން ކަމަށް ނިޔާޒް ބުނާއިރު އެކަން ގަސްދު މަރަކަށް ވާ ސަބަބާ ބެހޭ ގޮތުން ވެސް އިތުރަށް ތަފްސީލުކޮށް ޖަވާބުދާރީވުމަށް ފަނޑިޔާރުންގެ ބެންޗުން އެންގެވި އެވެ.
އަޑުއެހުން ނިންމަވާލެއްވުމުގެ ކުރިން ވެސް، ފަނޑިޔާރުންގެ ބެންޗުން ވިދާޅުވީ ނިޔާޒަށް ވަކީލަކު ހަމަޖެއްސުމުގެ ފުރުސަތު އަދިވެސް އެބަ އޮތް ކަމަށެވެ.
އެ މައްސަލަ ބައްލަވާ ބެންޗުގައި ތިއްބަވަނީ ފަނޑިޔާރު ޝުއައިބު ހުސެން ޒަކަރިއްޔާ އާއި އިސް ފަނިޑިޔާރު ޝުޖާއު އުސްމާނު އާއި ފަނޑިޔާރު މުހައްމަދު ނިޔާޒު އެވެ. ރިޔާސަތު ބަލަހައްޓަވަނީ ފަނޑިޔާރު ޝުއައިބު އެވެ.
މަރުގެ އަދަބެއް ތަންފީޒު ކުރެވޭނީ އިސްތިއުނާފްގެ ހުރިހާ މަރުހަލާއެއް ނިމުމަށް ފަހު އެވެ.