18 ސެޕްޓެމްބަރ 2016 - 10:44
މެޑްރިޑް (ސެޕްޓެމްބަރު 18) - ސްޕެނިޝް ލީގުގައި މިރޭ ރަށުން ބޭރުގައި އެސްޕަންޔޯލާ ދެކޮޅަށް ރެއާލް މެޑްރިޑް މުހިއްމު މެޗަކަށް ނުކުންނައިރު، އެ ޓީމުގެ ދެ ތަރިން ކަމަށްވާ ގަރެތު ބޭލް އާއި ކްރިސްޓިއާނޯ ރޮނާލްޑޯ އަނިޔާގެ ސަބަބުން ނުކުޅޭނެ އެވެ.
ލީގުގައި ރޭ ކުޅުނު މެޗުން މޮޅުވެ، ބާސެލޯނާ ވަނީ ލީގުގެ އެއް ވަނަ އަށް ޖެހިލައިފި އެވެ. ބާސެލޯނާ އެއް ވަނައިގައި އޮތީ ހަތަރު މެޗުން ނުވަ ޕޮއިންޓާ އެކު އެވެ. ރެއާލް ދެ ވަަނައިގައި އޮތީ ތިން މެޗުން ނުވަ ޕޮއިންޓް ހޯދައިގެންނެވެ. މިރޭގެ މެޗުން އެސްޕަންޔޯލް އަތުން ބަލިނުވެ ފަރުޖައްސާލައިފިނަމަ ރެއާލަށް އަލުން އެއް ވަނަ ލިބޭނެ އެވެ.
ބޭލްގެ ބުރަކައްޓަށް އަނިޔާވީ މިދިޔަ ހަފްތާގައި ޗެމްޕިއަންސް ލީގުގައި ސްޕޯޓިން ލިސްބަން އަތުން މޮޅުވި މެޗުގަ އެވެ. ރޮނާލްޑޯ އަށް ނުކުޅެވެނީ ރޯގާ ޖެހުމުގެ ސަބަބުންނެވެ.
"ބޭލް އާއި ރޮނާލްޑޯ އެސްޕަންޔޯލާ ދެކޮޅަށް ނުކުޅޭނެ. ތިން ދުވަހު މެޗު ކުޅެން ޖެހޭއިރު ރިސްކު ނަގަން ނެތިން. މުހިއްމު މެޗުތަކަށް މި ކުޅުންތެރިން ފިޓްކޮށް ހުރުން މުހިއްމު،" ރެއާލް މެޑްރިޑްގެ ކޯޗު ޒިނެދިން ޒިދާން ބުންޏެވެ.
ސްޕެނިޝް ލީގުގައި ޖެހިޖެހިގެން އެންމެ ގިނަ މެޗުން މޮޅުވުމުގެ ރެކޯޑް އޮތީ ބާސެލޯނާ އަތުގަ އެވެ. ބާސެލޯނާ ވަނީ 2010-2011 ވަނަ އަހަރު ލީގުގައި ޖެހިޖެހިގެން 16 މެޗުން މޮޅުވެފަ އެވެ. ރެއާލް ވަނީ ލީގުގައި އެންމެ ފަހުން ކުޅުނު 15 މެޗުން މޮޅުވެފަ އެވެ. މިރޭ އެސްޕަންޔޯލް އަތުން މޮޅުވެއްޖެނަމަ ބާސެލޯނާގެ ރެކޯޑާ ރެއާލުން ހަމަކުރާނެ އެވެ.
އެސްޕަންޔޯލާއި ރެއާލް ކުޅޭ މެޗު ފަށާނީ މިރޭ ރާއްޖެ ގަޑިން 23:45 ގަ އެވެ.