07 އޯގަސްޓް 2019 - 11:07
ސައްޔިދު ހަސަނަކީ ކިހާ ހުނަރުވެރި ކުޅުންތެރިޔެއްކަން މިއަދުގެ ޖީލުގެ ގިނަ ބަޔަކަށް އެނގިގެން ދިޔައީ، މިދިޔަ އަހަރުގެ ފެބްރުއަރީ މަހު އޭނާ އަވަހާރަވުމާ އެކު، އޭނާގެ ވާހަކަތައް ދެކެވެން ފެށުމުންނެވެ. އެކަމަކު އޭނާ ކުޅިވަރުގައި ހޯދި ކާމިޔާބީ އެއީ މުޅި ގައުމަށް އެނގި އެކަމުގެ އަގު އަބަދުވެސް ވަޒަންކުރެވޭނެ ކަމަކަށް ވާން ޖެހެ އެވެ. ރާއްޖޭގެ އެންމެ ބޮޑު ކުޅިވަރު އެވޯޑްސް، "މިހާރު އެވޯޑްސް" ގައި ހަސަންގެ އަގުވަޒަންކުރީ އެހެންވެ އެވެ.
"މިހާރު"ން ދެކޭ ގޮތުގައި ހަސަން މިއަދު އަޅުގަނޑުމެންނާ ވަކިވެގެން ދިޔަ ކަމަށް ވިޔަސް، އޭނާގެ ކާމިޔާބީތައް ދިވެހި ތާރީޚުން ފޮހެވިގެންނެއް ނުދާނެ އެވެ. ކުޅިވަރުގެ މާޒީގެ ސަފުހާތައް ހުޅުވާލާ އިރު ހަސަންގެ ނަންފުޅު އަންނާނީ އެންމެ ކުރިއަށެވެ.
ހޯމަ ދުވަހުގެރޭ ބޭއްވި 2018 ވަނަ އަހަރުގެ މިހާރު އެވޯޑްސްގައި ހަސަންގެ އާއިލާ އަށް "މިހާރު އެވޯޑްސް" ހަނދާނީ ފިލާ ހަވާލުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ފަސްޓް ލޭޑީ ފަޒްނާ އަހުމަދެވެ. ފިލައާ ހަވާލުވެވަޑައިގަތީ ސައްޔިދު ހަސަންގެ ދަރިކަނބަލުންނާއި އޭނާގެ ބޭބެ، ކުރީގެ މަޝްހޫރު ގޯލްކީޕަރު ސައްޔިދު އަލީ އެވެ. އޭނާގެ ހަނދާންތަކާ އެކު އެވޯޑް ހަފުލާ އަށް ލިބިގެންދިޔައީ އިތުރު ފުރިހަމަކަމެކެވެ. ޖެހިގެން ދިޔައީ އާ ކުލަތަކެކެވެ.
މިދިޔަ އަހަރުގެ ފެބްރުއަރީ 17 ވަނަ ދުވަހުގެރޭ އުމުރުފުޅުން 60 އަހަރުގައި އަވަހާރަވި، މައްޗަންގޮޅީ ބޮޑުގަލުމާފަތްގޭ، ހަސަން ވާދަނުކުރައްވާ ކުޅިވަރެއް، ކާމިޔާބު ނުހޯއްދަވާ ކުޅިވަރެއް 1970ގެ ތެރޭގައި މާލޭގައި ބާއްވާފައެއްނުވެ އެވެ. ފުޓްބޯޅައިން ފެށިގެން ވޮލީބޯޅަ، ޓެނިސް، ޗެސް، ޓޭބަލް ޓެނިސް، ކްރިކެޓް، ހޮކީ އަދި ބައިސިކަލް ރޭސްތަކުގައި އޭނާގެ ވިދުން އެހާމެ ގަދަ އެވެ.
ރާއްޖޭގެ ކުރީގެ ރަދުން ސުލްތާން ހަސަން ނޫރައްދީން، ދެ ވަނައިގެ ގެ ދަރިކަނބަލުން އަލް އަމީރާ އަނީސާ ނޫރައްދީންގެ ދެ ވަނަ ދަރިކަލުން ހަސަނަކީ ރާއްޖޭގެ ކުޅިވަރުގެ ދަންމަރު ބައިނަލްއަގްވާމީ މައިދާނުގައި ރޯކުރި 1973 ވަނަ އަހަރުގެ ތުރީއޭ ގޭމްސްގައި ވާދަކުރި ޓީޓީ ކުޅުންތެރިޔެކެވެ. ޗައިނާގައި ބޭއްވި އޭޝިއަން އެފްރިކަން ލެޓިން އެމެރިކަން ޓޭބަލް ޓެނިސް ފްރެންޑްޝިޕް އިންވިޓޭޝަނަލް ޓޯނަމަންޓުގައި ބައިވެރިވި ރާއްޖޭގެ ޓީޓީ ޓީމުން ކުވޭތު ބަލިކުރިއިރު ހަސަންގެ އުމުރުފުޅުން އެންމެ 15 އަހަރެވެ.
ދިވެހި ކުޅިވަރުގެ ބައްޕަ މަރްހޫމް މުހައްމަދު ޒާހިރު ނަސީރުގެ އިނގިލި ކުރީގައި ހިއްޕައިގެން އެންއެސްއޭގެ ތެރެއިން ކުޅިވަރުގެ ތެރެއަށް ނުކުމެވަޑައިގެންނެވި ހަސަންގެ ކުޅިވަރުގެ ތަރި، އެ ގޭމްސް އަށް ފަހު މެދު އުޑުގައި ފިޔަ ޖަހަން ފެށި އެވެ. އެގޮތުން 70ގެ އަހަރުތަކުގައި ވިކްޓްރީ ސްޕޯޓްސް ކްލަބާއި މާލޭ ޓެނިސް ކްލަބުގެ މެދުގައި އޮތް ވާދަވެރިކަމުގައި ވިކްޓަރީ އަށް ކުރި ހޯދައިދިނުމުގައި ހަސަންގެ ދައުރު ނުހަނު ބޮޑެވެ. ޓެނިސް ކްލަބް ފަހަތަށް ޖައްސާލައި ވިކްޓްރީން 1976 ވަނަ އަހަރު ރާއްޖޭގެ ކުޅިވަރުގެ ހުރިހާ މުބާރާތެއް ކަހަލަ ގޮތަށް ކާމިޔާބުކުރިއިރު އެންމެ ބޮޑަށް ވިދާލީ ހަސަނެވެ. އޭނާ ހިމެނުނު ކްލަބްތަކުން ގައުމީ ޓެނިސް މުބާރާތް ވިދިވިދިގެން ހަ އަހަރު، ޓީޓީ ޗެމްޕިއަންކަން ހަތަރު އަހަރު، ވޮލީ ތިން އަހަރު އަދި ދެ އަހަރު ހޮކީގެ ޗެމްޕިއަން ހޯދި އެވެ.
އަދި 1974 ވަނަ އަހަރު ވޮލީބޯޅައިގައި ވިދާލައި އަދި އެ އަހަރުގެ އެންއެސްއޭ ފުޓްބޯޅަ މުބާރާތުގެ އޯލް ސްޓާއަކަށް ހޮވިވަޑައިގެންނެވި އެވެ. އެއަށް ފަހު 1975 ގައި ބައިސިކަލް ރޭހުން އެއް ވަނަ، ޓީޓީ މިކްސް ޑަބަލްސް ޗެމްޕިއަންކަން އަދި ވޮލީގެ އޯލް ސްޓާގެ މަގާމް ހާސިލްކުރެއްވި އެވެ.އެ އަހަރު އަނެއްކާވެސް ރާއްޖެ ތަމްސީލްކުރައްވަން ބޭރަށް ވަޑައިގަތެވެ، މި ފަހަރު ނައިޖީރިޔާގައި އޮތް ތުރީއޭ ގޭމްސް އަށެވެ.
އަދި 1976 ވަނަ އަހަރަކީ ހަސަން އަށް އަނެއްކާ ވެސް އެހާމެ ކާމިޔާބު އަހަރެކެވެ،. ގައުމީ ފެންވަރުގެ ހުރިހާ މުބާރާތެއްގައި އޭނާގެ ތަރި ވިދާލި އެވެ. އަދި ޖެހިގެން އައި 1977 ގައި، ފުޓްބޯޅައިގެ އެންމެ މޮޅު ފޯވަޑް، ހޮކީގެ އެންމެ މޮޅު ކީޕަރު، ބައިސްކަލް ރޭހާއި ޓީޓީގެ ޗެމްޕިއަންކަން ހޯއްދެވި އެވެ. މި ކާމިޔާބީތަކާ އެކު އޭނާ ވެވަޑައިގަތީ އޭރުގެ ނޫސް "ހަފުތާ"ގެ އަހަރުގެ އެންމެ މޮޅު ކުޅިވަރުގެ ޝަހުސިއްޔަތަށެވެ.
އެއް ކުޅިވަރަކުން ހަސަން އަށް ވުރެ ހުނަރުވެރި އަދި ކާމިޔާބު ކުޅުންތެރިން ރާއްޖެ ދެކެފައިވެ އެވެ. އެކަމަކު އޭނާގެ ތަފާތަކީ، ހުރިހާ ކުޅިވަރެއް ވެސް އެހާމެ މޮޅަށް ކުޅުއްވައި އެހާމެ ގިނަ ކާމިޔާބީ ހޯއްދެއްވުމެވެ. އެއީ މޮޅު ހުރިހާ ކުޅުންތެރިން ވެސް ހުރިހާ ކުޅިވަރެއް ކުޅުނު ދުވަސްވަރެވެ. އެކަމަކު ހަސަން ފެނުނީ ކޮންމެ ކުޅިވަރެއްގެ ވެސް ރާއްޖޭގެ އެންމެ މަތީ ހުނަރު ހުރި ބޭފުޅެއްގެ ގޮތުގަ އެވެ.
ދިވެހި ކުޅިވަރުގެ ހިންގުންތެރިއެއް ކަމަށްވާ އަހުމަދު މުހައްމަދު (ދޮނާ) ވިދާޅުވި ގޮތުގައި ބޭރުގެ މެޗެއް ނުފެންނަ އަދި ކޯޗެއްގެ ތަމްރީނެއް ނުލިބޭ ޒަމާނެއްގައި ހަސަން އެ ހުނަރުތައް ތަރައްގީ ކުރެއްވީ އަމިއްލަފުޅަށް ކަމަށެވެ. އަދި އެނގިވަޑައިގެންނެވި އެއްޗެއް އެނގިވަޑައިގަތީ ޒާހިރު ނަސީރުގެ ފަރާތްޕުޅުން އެންއެސްއޭގެ ތެރެއިން ކަމަށް ދޮނާ ވިދާޅުވި އެވެ.
ރާއްޖޭގެ ކުޅިވަރުގައި 1947 ވަނަ އަހަރުން ފެށިގެން ހަރަކާތްތެރިވަމުން އަންނަ އަދި ދިވެހި ކްރިކެޓުގެ ބައްޕައެއް ފަދަ ކެނެރީ އަބްދުއްސައްތާރު ވިދާޅުވަނީ "އިހެއް، މިހާރެއް" ކިޔުމުގެ ޖާގައެއް ނެތޭ، ހަސަނަކީ ދިވެހި ކުޅިވަރު ތާރީހު ދުށް އެންމެ ހުނަރުވެރި ކުޅުންތެރިޔާ ކަމަށެވެ.
ރާއްޖޭގެ ކުޅިވަރުގައި ހަސަން ފަދައިން އެތަކެއް ކާމިޔާބެއް ހާސިލްކުރައްވައި އަދި ފަހުން ކުޅިވަރު ހިންގުމުގެ ދާއިރާގައި ހަރަކާތްތެރިވާ އިބްރާހިމް އިސްމާއިލް ވިދާޅުވެފައިވާ ގޮތުގައި "ހަސަން ފަދަ ސްޕޯޓްސްމަނެއް ރާއްޖޭގައި އަދި ނުއުފެދެ" އެވެ.
"ބައްޕާފުޅު ކަހަލަ މޮޅު ފޯވާޑެއް، ހިތްވަރުގަދަ ޖެހިލުން ކުޑަ ހޮކީ ކީޕަރެއް. ކްރިކެޓުގައި ލޯ ހުޅުވޭ ވިކެޓް ކީޕަރެއް. އެ ކުޅިވަރަކަށް ބަދަލު ގެނައި ޗެމްޕިއަން ޓެނިސް ޕްލެޔަރެއް. ޓީޓީ ޗެމްޕިއަނެއް. ބޭބޭފުޅު ސައްޔިދު އަލީ ކަހަލަ މޮޅު ވޮލީ ކުޅުންތެރިއެއް. ބައިސިކަލް ޗެމްޕިއަން ދުއްވުންތެރިއެއް. ބެޑްމިންޓަން ކުޅުންތެރިއެއް. އަދި ސްމާޓް ޗެސް ކުޅުންތެރިއެއް،" އިބްރާހިމް އިސްމާއިލް ވިދާލުވި އެވެ.
ހަސަންގެ މި ވިދުން ގަދަ ކުޅިވަރު ހަޔާތަށް ހުރަސް އެޅިގެން ދިޔައީ 1978 ގައި ބޯޓްދަތުރުކުރެއްވުމަށްޓަކައި ރާއްޖެ ދޫކޮށްލެއްވުމުންނެވެ. އެއީ އެ ދުވަސްވަރު ރާއްޖޭގެ ކުޅިވަރަށް ލިބުނު ބޮޑު ސިހުމެކެވެ. ޖެހިގެން އައި އަހަރުގެ އިންޑިއަން އޯޝަން އައިލެންޑް ގޭމްސްގައި ވާދަކުރުމުގެ ފުރުސަތު އޭނާއަށް ގެއްލިވަޑައިގަތެވެ. އެއީ ހަގީގަތުގައި ވެސް ހަސަން ކުރެއްވި ހިތާމަފުޅެކެވެ. ހަސަންގެ ޝަރަފުގައި މާލޭ ސްޕޯޓްސް އިން އިންތިޒާމްކުރި ވަދާއީ ވޮލީ މެޗަށް ފަހު ހަސަން ވަނީ އެ ގޭމްސްގައި ރާއްޖެ އަށް ބައިވެރިވެވޭ ގޮތް މެދުވެރިވެފައި ރާއްޖޭގައި ހުންނެވޭނެ ގޮތް މެދުވެރި ނުވީތީވެ ވަރަށް ބޮޑަށް ހިތާމަފާޅުކުރައްވައިފަ އެވެ.
"ގޭމްސް އަށް ވަޑައިގެންނެވި ނަމަ ވަރަށް ތަފާތު ކުޅުންތެރިޔަކަށް ވީސް،" ހަސަންގެ ޑަބަލްސް ޕާޓްނަރު ސީވީޑް އަހުމަދު ލަތީފް ވިދާޅުވެފައިވެ އެވެ.
ހަސަން ބޯޓުދަތުރުކުރައްވަން، ރާއްޖެއިން ބޭރަށް ވަޑައިގަތުމުން ދިވެހި ކުޅިވަރަށް ކުރިވަރުގެ އަސަރެއް، އެންމެ ކުޅުންތެރިއެއްގެ ސަބަބުން ކޮށްފައެއް ނުވެ އެވެ. އުމުރުފުޅުން އެންމެ 20 އަހަރުގައި އޭނާ ފެއްޓެވި ދަތުރާ އެކު ގައުމީ ގިނަ ކުޅިވަރުތަކެއްގައި ފެނުނީ ހުސްކަމެވެ.