31 ޖުލައި 2019 - 23:00
މި އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ރަން މެޑަލް ހޯދި އެތުލީޓުންގެ ޖާޒީ ސްޓެލްކޯ އިން ސްޕޮންސާކޮށްފި އެވެ.
ސްޓެލްކޯ އިން ވަނީ މި އެތުލީޓުންގެ ޝަރަފުގައި މިއަދު ހާއްސަ ހަފުލާއެއް އެ ކުންފުނީގެ ހެޑް އޮފީހުގައި ބާއްވައިފަ އެވެ. އެގޮތުން މި އެތުލީޓުންނަށް އެ ކުންފުނިން މަރުހަބާ ކިޔާފައިވަނީ ރަތް ދޫލައިގަ އެވެ.
އައިއޯއަިޖީގައި ރަން މެޑަލް ހާސިލް ކުރި އެތުލީޓުންގެ ތެރޭގައި ޓޭބަލް ޓެނިސް އިން ރަން މެޑަލް ކާމިޔާބު ކުރި ހަތަރު ކުޅުންތެރިންނާއި ބެޑްމިންޓަން އަންހެން ސިންގަލްސް އިން މެޑަލް ހާސިލް ކުރި ނަބީހާ އަބްދުއްރައްޒާގު ހިމެނެ އެވެ. މި އެތުލީޓުންގެ އަގުވަޒަން ކުރުމުގެ ގޮތުން ސްޓެލްކޯއިން ވަނީ ހަނދާނީ ލިޔުމެއް ވެސް ދީފަ އެވެ.
ސްޓެލްކޯގެ މެނޭޖިން ޑިރެކްޓަރު ހަސަން މުގްނީ ވިދާޅުވީ މިފަހަރު އައިއޯޖީގައި ރާއްޖެ ހޯދި ކާމިޔާބީއަށް ފަހުރުވެރިވާކަމަށެވެ. އަދި ކުރިއަށް އޮތް 2023 ވަނަ އަހަރުގެ އައިއޯއައިޖީގައި މިއަށްވުރެ ބޮޑު ކާމިޔާބީއެއް ހޯދާނެ ކަމަށް އުއްމީދު ކުރައްވާ ކަމަށް އޭނާ ވިދާޅުވި އެވެ.
މީގެ އިތުރުން ރާއްޖޭގައި ބާއްވާ އައިއޯއައިޖީ ގައި ސްޓެލްކޯއިން އެހިތެރިކަން ފޮރުކޮށްދޭނެ ކަމަށް ވެސް މުގްނީ ވިދާޅުވި އެވެ.
މިއަދުގެ ހަފުލާގައި ސްޓެލްކޯގެ އިސް ބޭފުޅުންގެ އިތުރުން މޯލްޑިވްސް އޮލިމްޕިކް ކޮމިޓީގެ ޖެނެރަލް ސެކެޓްރީ އަހުމަދު މަރުޒޫގު ވެސް ބައިވެރިވެ ވަޑައިގަތެވެ.