28 ޖުލައި 2019 - 13:44
ތެހެރާން (ޖުލައި 28) - ގަލްފުގައި ދަތުރު ކުރާ ބޯޓު ފަހަރުގެ ސަލާމަތީ ކަންކަން ބެލެހެއްޓުމަށް އިނގިރޭސި ވިލާތުން އިސް ނަގައިގެން ޔޫރަޕުގެ ލަޝްކަރެއް ބޭއްވުމަކީ ބޭނުން ކަމެއް ނޫން ކަމަށާއި އެއީ "ވަރަށް އުނދަގޫވާނެ" ކަމެއް ކަމަށް އީރާނުން ބުނެފި އެވެ.
"ޔޫރަޕުގެ ކަނޑުގެ ސިފައިންގެ ފްލީޓެއް ގަލްފުގައި ބާއްވަން އުޅޭ ވާހަކަ ވަނީ އަޑުއަހާފައި. އެއީ އޭގެ ޒާތުގައި ވެސް ނަފުރަތުގެ މެސެޖެއް ދޭ ކަމެއް. އޭގެ ސަބަބުން މަސްރަހު އިތުރަށް ދާނީ ހޫނުވަމުން،" އީރާންގެ ސަރުކާރުގެ ތަރުޖަމާން އަލީ ރާބީ ވިދާޅުވި އެވެ.
ހޮރްމޫޒް ކަނޑުއޮޅިން ދަތުރު ކުރާ އުޅަނދުތަކަށް ރައްކާތެރިކަން ދިނުމަށް ގަލްފުގައި ލަޝްކަރެއް ބޭއްވުމަށް އިނގިރޭސި ވިލާތުން ހުށަހަޅާފައި ވަނީ އެ ގައުމުގެ ތެޔޮ ޓޭންކަރުން މި މަހު 19 ވަނަ ދުވަހު އީރާނުން ހިފެހެއްޓުމާ ގުޅިގެންނެވެ. ސްޓެނާ އިމްޕެރޯ އީރާނުން ހިފެހެއްޓެނީ އެ ގައުމުގެ ތެޔޮ ހުރި ޓޭންކަރެއް ޖިބްރޯލްޓާގެ ބޭރުން އިނގިރޭސި ސިފައިން ހިފެއްޓާފައި ވަނިކޮށެވެ.
އީރާނުގެ ސަރުކާރުގެ ތަރުޖަމާން ވިދާޅުވީ ގަލްފުގެ ސަލާމަތީ ކަންކަން ބެލެހެއްޓުމަކީ އިނގިރޭސި ވިލާތުން ކުރަން ޖެހޭ ކަމެއް ނޫން ކަމަށާއި އެއީ އެ ސަރަހައްދުގެ ގައުމުތަކުގެ ކަމެއް ކަމަށެވެ.
"އަޅުގަނޑުމެންނަކީ ޕާސިއަން ގަލްފުގެ އެންމެ ބޮޑު އެޖެންޓް،" ރާބީ ވިދާޅުވި އެވެ.
އީރާނުން ބުނެފައި ވަނީ އިނގިރޭސި ވިލާތުގެ ޓޭންކަރު ހިފެހެއްޓީ އެކްސިޑެންޓެއްގައި ގެއްލުން ލިބުނު އުޅަނދަކަށް އެހީނުވެ ދާން އުޅުމުން ކަމަށެވެ.
ހޮރްމޫޒް ކަނޑުއޮޅިން ދަތުރު ކުރާ އިނގިރޭސި ވިލާތުގެ ހުރިހާ އުޅަނދަކަށް ހިމާޔަތް ދިނުމަށް އެ ގައުމުގެ ކަނޑުގެ ސިފައިންގެ މަނަވަރު އެޗްއެމްއެސް މޮންޓްރޯސް ބޭނުން ކުރުމަށް މިހާރު ވަނީ ނިންމައިފަ އެވެ.