14 ސެޕްޓެމްބަރ 2016 - 15:26
އެތަންސް، ގްރީސް (ސެޕްޓެމްބަރު 14) - ޔޫރަޕްގެ ފުޓްބޯޅައިގެ މައި އިދާރާ ޔުއެފާގެ ރައީސަކަށް ސްލޮވީނިއާގެ ފުޓްބޯޅަ އިދާރާގެ ރައީސް އަލެކްސެންޑަ ސެފެރިން އިންތިހާބުވެއްޖެ އެވެ.
މިއަދު އެތަންސްގައި ކުރިއަށްދިޔަ ޔުއެފާގެ އިންތިހާބު ސެފެރިން ކާމިޔާބު ކުރެއްވީ ނެދަލެންޑްސްގެ މައިކަލް ވެން ޕްރާގްއާ ވާދަކޮށްގެންނެވެ.
ސެފެރިން ހޮވުނީ ވޯޓުލި 55 މެންބަރު އެސޯސިއޭޝަންގެ ތެރެއިން 42 ގައުމުގެ ފުޓްބޯޅަ އެސޯސިއޭޝަންގެ ވޯޓާ އެކު އެވެ. އިންތިހާބު ކާމިޔާބު ކުރަން ސެފެރިން އަށް ބޭނުންވީ 28 އެސޯސިއޭޝަނުގެ ތާއީދެވެ.
"މިއީ ވަރަށް ފަހުރުވެރި ވަގުތުކޮޅެއް. އަދި ބޮލުގައި އެޅުނު ވަރަށް ބޮޑު ޒިންމާ އެއް. އަހަރެންގެ ގައުމު ސްލޮވީނިއާ އަހަންނާ މެދު ފަހުރުވެރިވާނެ ކަމަަށް އުއްމީދުކުރަން. އަދި ކޮންމެވެސް ދުވަހަކު މުޅި ޔޫރަޕް އަހަރެންނާ މެދު ފަހުރުވެރިވާނެ ކަމަށް އުއްމީދުކުރަން،" 2011 ވަނަ އަހަރުން ފެށިގެން ސްލޮވީނިއާ އެފްއޭގެ ރައީސްގެ މަގާމު ފުރުއްވަމުން އަންނަ ސެފެރިން ވިދާޅުވި އެވެ.
ޔުއެފާގެ ރައީސްކަމުގެ މަގާމު ހުސްވީ ހިޔާނާތުގެ މައްސަލައެއްގައި ޔުއެފާގެ ކުރީގެ ރައީސް މިޝެލް ޕްލެޓިނީ މިދިޔަ އަހަރު ފުޓްބޯޅައިގެ ހުރިހާ ހަރަކާތަކުން އަށް އަހަރަށް ސަސްޕެންޑް ކުރުމުންނެވެ. ސެފެރިން ފުރިހަމަ ކުރާނީ 2019 ވަނަ އަހަރުގެ ނިޔަލަށް ޕްލެޓިނީގެ ދައުރުގެ ބާކީ ބައެވެ.
ފީފާގެ ހުއްދައާ އެކު މިއަދު އޮތް ކޮންގްރެސްގައި ޕްލެޓިނީ ވަނީ ވާހަކަ ދައްކައިފަ އެވެ.
"އަަހަރެން އެއްވެސް އިރަކު އޮޅުވައެއް ނުލަން. ހުރިހާ ކަމެއް ކޮށްފައިވާނީ އިންސާފުވެރިކަމާ އެކު. ސަސްޕެންޝަނާ ދެކޮޅަށް ގާނޫނީ ގޮތުން ކުރަން ޖެހޭ ހުރިހާ ކަމެއް މިދަނީ ކުރަމުން،" ޕްލެޓިނީ ވިދާޅުވި އެވެ.
އިންތިހާބުގައި ނާކާމިޔާބުވި ވެން ޕްރާގް ވިދާޅުވީ ސެފެރިން އަކީ ވެސް އިސްލާހީ މަސައްކަތްތަކެއްގެ ވިސްނުން ހުރި މީހަކަށް ވުމުން ޔުއެފާ އަށް އެކަށީގެންވާ ބަދަލު އަންނާނެ ކަމުގެ އިތުބާރު އެބައޮތް ކަމަށެވެ.
"އަހަރެންނާ ސެފެރިންގެ އޮތީ އެއް ވިސްނުމެއް. އަހަރެން ވެސް އަދި ސެފެރިން ވެސް ބޭނުންވަނީ އިސްލާހީ ހެޔޮ ބަދަލުތަކެއް." ވެން ޕްރާގް ވިދާޅުވި އެވެ.