26 ޖުލައި 2019 - 15:43
ރ. އަތޮޅުގައި ތަރައްގީ ކުރާ އެމަރެލްޑް ރިސޯޓް އެންޑް ސްޕާ އަންނަ މަހުގެ އެއްވަނަ ދުވަހު ހުޅުވަން ތައްޔާރުވެއްޖެ އެވެ.
ރ. ފަސްމެންދޫގައި ތަރައްގީ ކުރާ ފަސްތަރީގެ މި ރިސޯޓުގައި 120 ވިލާ ހުރެ އެވެ. އެއީ 60 ބީޗް ވިލާ އާއި 60 ވޯޓާ ވިލާ ހިމެނެ އެވެ. މި ވިލާތަކަކީ އެންމެ ޒަމާނީ ޑިޒައިންތަކަށް ހަދާފައިވާ ވިލާތަކެކެވެ.
ވޯޓާ އަދި ބީޗް ވިލާތަކުގެ ތެރޭގައި ޖަކޫޒީ ވިލާތަކާއި ޕޫލް ވިލާތަކާއި ސުޕީރިއާ އާއި ރޯޔަލް އަދި ޕްރެޒިޑެންޝިއަލް ވިލާތައް ހިމެނެ އެވެ. މިއީ އެކި ފަންތީގެ ޓޫރިސްޓުންނަށް ހާއްސަ ކޮށްގެން ހަދާފައިވާ ވިލާތަތަކެކެވެ.
އެމަރެލްޑް ރިސޯޓުގައި ތަފާތު އެކި ކުޒީންތައް ތައްޔާރު ކުރާ ހަތަރު ރެސްޓޯރެންޓެއް ހުންނާނެ އެވެ. މީގެ ތެރޭގައި ޕިއްޒާ އާއި ޕާސްތާ ކަމުދާ މީހުންނަށް ހާއްސަ "ބީޗް ކްލަބް ގްރިލް ރެސްޓޯރެންޓް" އާއި އޭޝިއާގެ ތަފާތު ރަހަތަކަށް ހާއްސަ "ލެ އޭޝިއާޓީކް" ރެސްޓޯރެންޓާއި އެމެރިކާގެ ތަފާތު ކާނާތަކަށް ހާއްސަ "އެމަޒޯނިކް ރެސްޓޯރެންޓް" ގެ އިތުރުން ބްރެކްފާސްޓް ބުފޭތަކަށް ސާވް ކުރާ "އެކުއާ ރެސްޓޯރެންޓް" ހިމެނެ އެވެ.
މީގެ އިތުރުން މި ރިސޯޓުގައި ސްޕާ އަކާއި ޖިމެއްގެ އިތުރުން ސްޕޯޓްސް ސެންޓަރެއް ވެސް ވަނީ ގާއިމް ކޮށްފަ އެވެ. ސްޕޯޓްސް ސެންޓަރުގައި ދެ ޓެނިސް ކޯޓާއި ދެ ޕެޑަލް ކޯޓު ހުރެ އެވެ. މީގެ ތެރެއިން އެއް ޓެނިސް ކޯޓު ފުޓްބޯޅަ ކުޅެން ބޭނުންވާ ފަރާތްތަކަށް ބޭނުން ކުރެވޭނެ ހެން ވަނީ ފަރުމާކޮށްފަ އެވެ.
މޫދު ކުޅިވަރުތަކަށް ހާއްސަ ކޮށްގެން ޑައިވިން ސެންޓަރަކާއި ވޯޓާ ސްޕޯޓްސް ސެންޓަރެއް އަދި ކުޑަކުދިންނަށް ޑޯލްފިން ކްލަބެއް ވެސް މި ރިސޯޓުގައި ވަނީ ގާއިމްކޮށްފަ އެވެ.