30 މެއި 2016 - 06:13
ކިރު ޕެކެޓް ކަނޑާލުމަށް ފަހު އައިސްއަލަމާރީގައި ބަހައްޓަނީ ކޮން ތަނަކު ހެއްޔެވެ؟ ވަރަށް ގިނަ ބަޔަކު ބުނާނީ ދޮރުފަތުގައި ކަމަަށެވެ. އެކަމަކު މިއީ ރަނގަޅު ތަނެއް ނޫނެވެ. ދޮރު ހުޅުވާލާ ކޮންމެ ފަހަރަކު ދޮރުފަތް އޮންނާނީ "ފްރިޖުން ބޭރުގަ" އެވެ. ކިރު ފަދަ ތަކެއްޗަކީ އެކި ފަހަރު އެކި ޓެމްޕަރޭޗާގައި ބަހައްޓަން ރައްކާތެރި ނޫން ތަކެތީގެ ތެރޭގައި ހިމެނޭ އެއްޗެކެވެ.
ތަޖުރިބާކާރު ޝެފެއް "ޓެކް އިންސައިޑާ" އަށް ބުނެފައިވާ ގޮތުގައިި ފްރިޖުގެ ކޮންމެ ކޮންމެ ތަނެއްގައި ކިރު ޕެކެޓް ބަހައްޓާކަށް ނުވާނެ އެވެ. ޑެނިއެލް ނޯޓަން ބުނެފައި ވަނީ ފްރިޖުގެ އެކި ހިސާބުތަކުގައި ޓެމްޕަރޭޗާ ތަފާތުވާނެ ކަމަށާއި ޓެމްޕަރޭޗާ އަށް އާންމުކޮށް ބަދަލު އަންނާނީ އެންމެ ފްރިޖުގެ މަތީ ވަތްގަނޑުތަކާއި ދޮރުފަތުގައި ކަމަށެވެ.
ޓެމްޕަރޭޗާ އަށް އަންނަ ބަދަލުތަކުގެ ސަބަބުން ފަސޭހައިން ހަލާކުވާ އެއްޗެހީގެ ތެރޭގައި ކިރާއި ރޯމަހުގެ ބާވަތްތައް ހިމެނެ އެވެ. މިއީ ރަނގަޅު ޓެމްޕަރޭޗާގައި ނުބަހައްޓައިފި ނަމަ ނުބައިވެ، އޭގޭ ސަބަބުން ސިއްހަތަށް ވަރަށް ނޭދެވޭ އަސަރު ކޮށްފާނެ ތަކެއްޗެވެ.
ނޯޓަން ބުނެފައި ވަނީ ފިނިކަން ރަނގަޅަށް ބޭނުންވާ ކާނާގެ ބާވަތްތައް ބަހައްޓަން އެންމެ ރަނގަޅުވާނީ ފްރިޖުގެ ތިރީގައި ނުވަތަ ފްރިޖުގެ ކޮންމެ ދިމާލެއްގައި ނަމަވެސް އެންމެ ބިތްދޮށުގައި ކަމަށެވެ. އެހެންވެ މިއީ ކިރުގެ ބާވަތްތައް ވެސް ބަހައްޓަން އެންމެ ރަނގަޅު ހިސާބެވެ. ރަނގަޅަށް ފިނި ނުވާ ނުވަތަ ފިނިހޫނުމިނަށް ބަދަލު އަންނަ ހިސާބެއްގައި ކިރު ވަރަށް އަވަހަށް ނުބައިވެ ނުރައްކާތެރި ބެކްޓީރިއާ އުފެދިދާނެ އެވެ.