16 ޖުލައި 2019 - 20:06
ބާ ކައުންސިލަށް އިންތިޚާބުވެވަޑައިގެންނެވި ބޭފުޅުންނާ ރައީސް އިބްރާހިމް މުހައްމަދު ސޯލިހު މިއަދު ބައްދަލުކުރައްވައިފި އެވެ.
ރައީސް އޮފީހުގައި ބޭއްވި އެ ބައްދަލުވުމުގައި ރައީސް ވަނީ ބާ ކައުންސިލް އުފެދިގެން ދިއުމަކީ ގާނޫނީ އަދި ޝަރުއީ ދާއިރާ އިސްލާހުކޮށް ތަރައްގީކުރަން ލިބުނު މުހިއްމު ކުރިއެރުމެއްކަން ފާހަގަކުރައްވައިފަ އެެ. އަދި އެ ދާއިރާ އަށް އާއްމުންގެ އިތުބާރު ހޯދަން އެޅުނު މުހިއްމު ފިޔަވަޅެއް ކަމަށް ވެސް ވިދާޅުވި އެވެ.
ބާ ކައުންސިލުގެ މަސައްކަތް މިނިވަންކަމާ އެކު ކުރިއަށް ގެންދިއުމަށް ބޭނުންވާ އެއްބާރުލުމާއި އެހީތެރިކަން ސަރުކާރުން ދެއްވާނެކަމުގެ ޔަގީންކަން އެ ކައުންސިލު މެންބަރުންނަށް ރައީސް ދެއްވިކަމަށް، ރައީސް އޮފީހުގެ ވެބްސައިޓުގައިވެ އެވެ.
ވަކީލުންގެ ކަންކަން ރެގިއުލޭޓް ކުރުމަށް އުފެއްދި ބާ ކައުންސިލްގެ ފުރަތަމަ އިންތިޚާބު ބާއްވާފައިވަނީ މިދިޔަ ހޮނިހިރު ދުވަހެވެ. އެ އިންތިޚާބުން، ކައުންސިލްގެ ރައީސަކަށް ހޮވިވަޑައިގެންނެވީ މައުމޫން ހަމީދެވެ. ނައިބު ރައީސަކީ ކުރީގެ އެޓާނީ ޖެނެރަލް އަބްދުﷲ މުއިއްޒެވެ.
އެގްޒެކެޓިވް ކޮމެޓީގައި ދެން ހިމެނިވަޑައިގަންނަވަނީ މަކުނުދޫ ދާއިރާގެ ކުރީގެ މެމްބަރު އަނާރާ ނައީމާއި ކުރީގެ ޕްރޮސިކިއުޓާ ޖެނެރަލް އަހުމަދު މުއިއްޒު އާއި ސިވިލް ކޯޓުގެ ކުރީގެ ގާޒީ އައިޝާ ސުޖޫން މުހައްމަދު، އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރާއި ވަކީލް މުހައްމަދު އަސީލާއި މުހައްމަދު ފައިސަލެވެ.