16 ޖުލައި 2019 - 09:36
ލަންޑަން (ޖުލައި 16) - އާސެނަލްގެ ވެރިޔާ އެމެރިކާގެ ބިލިއަނަރު ސްޓޭން ކްރޮއެންކާގެ ލީޑަޝިޕްގައި އެއްވެސް މިސްރާބެއް ނެތް ކަމަށާއި ކަންބޮޑުވުންތަކަށް ހައްލެއް ނުހޯދައިފިނަމަ ސަޕޯޓަރުން ކްލަބްގެ ވެރިންނާ ދެކޮޅަށް ނުކުންނަން ޖެހިދާނެ ކަމަށް ބުނެ އާސެނަލްގެ ސަޕޯޓަރުންގެ 14 ގްރޫޕަކުން ނޫސްބަޔާން ނެރެފި އެވެ.
ކްރޮއެންކާ އަކީ އެމެރިކަން ފުޓްބޯޅަ (ރަގްބީ) ކްލަބެއް ކަމަށްވާ ލޮސް އެންޖެލެސް ރޭމްސް އާއި ބާސްކެޓްބޯޅަ ކްލަބް ޑެންވާ ނަގެޓްސްގެ ވެސް ވެރިޔާ އެވެ. އެ ދެ ޓީމަށް ބޮޑު ހަރަދުތަކެއް ކުރަމުން އަންނަ ކްރޮއެންކާ ފަހަކަށް އައިސް އާސެނަލަށް މާ ބޮޑު އިންވެސްޓެއް ނުކުރެ އެވެ. އާސެނަލްގެ މައިނޯރިޓީ ހިއްސާދާރު ރަޝިއާގެ އަލީޝާ އުސްމަނޯފްގެ 30 ޕަސެންޓް ހިއްސާ ގަނެ، އާސެނަލްގެ 100 ޕަސެންޓް މިލްކުވެރިކަން ކްރޮއެންކާ ނެގީ މިދިޔަ އަހަރު އޮގަސްޓް މަހުގަ އެވެ.
އާސެނަލްގެ ސަޕޯޓަރުންގެ ކަންބޮޑުވުންތައް ބޮޑުވާން ފެށީ އެ ކްލަބްގެ ހިންގާ ބޯޑުން މި ފަހަރުގެ ޓްރާންސްފާ ބަޖެޓަކަށް ހަމަޖައްސާފައިވާ 45 މިލިއަން ޕައުންޑް (57 މިލިއަން ޑޮލަރު) އަކީ އެންމެ އެކަށީގެންވާ އަދަދެއް ނޫން ކަމަށް ބުނެ އެ ޓީމުގެ ކޯޗު އުނާއި އެމެރީ ހިތްހަަމަނުޖެހުން ފާޅުކުރަން ފެށުމުންނެވެ. މިހާތަނަށް ޓްރާންސްފާ މާކެޓްގައި އާސެނަލަށް އަދި އެންމެ އެދެވޭ މަސައްކަތްތަކެއް ނުކުރެވެ އެވެ. ގިނަ ކުޅުންތެރިންތަކަކާ މަޝްވަރާކުރި ނަމަވެސް މައްސަލަ ޖެހެނީ އެންމެ އެކަށީގެންވާ ޓްރާންސްފާ ފީ އެއް އާސެނަލަށް ދެއްކެން ނެތުމުންނެވެ.
ލަންޑަނުގައި އޮތް އާސެނަލުގެ އެންމެ ދުވަސްވީ ސަޕޯޓަރުންގެ ގްރޫޕުން ނެރުނު ބަޔާނުގައިވާ ގޮތުން އެ ކްލަބަށް އިނގިރޭސި ޕްރިމިއާ ލީގު ނުލިބި 15 އަހަރު ވެފައިވާއިރު އަދި ޖެހިޖެހިގެން ތިން އަހަރު ޗެމްޕިއަންސް ލީގުގައި ނުކުޅެ ތިބެން ޖެހިފައިވާއިރު، ކްލަބް އޮތީ ރަނގަޅު މިސްރާބެއްގައި ނޫން ކަމަށެވެ.
"ކްރޮއެންކާ މި ކްލަބަށް އައުމުގެ އެއް އަހަރު ކުރިން އަހަރެމެން ވާނީ ޗެމްޕިއަންސް ލީގުގެ ފައިނަލުގައި ކުޅެފައި. އެކަމަކު މިހާރު މަންޒަރު މި ފެންނަނީ ބޭނުންވާ ގޮތަކަށް ނޫން. ވާދަވެރި ޓީމުތަކާއި އަރަމުން އަންނަ ޓީމުތަކުން މިހާރު އަހަރެމެންނަށް ވުރެން ކުރީގައި އުޅުމަކީ މި ކްލަބަށް އެންމެ ރަނގަޅު ގޮތެއް ނޫން،" ބަޔާނުގައިވެ އެވެ.
އާސެނަލްގެ މެނޭޖިން ޑިރެކްޓަރު ވިނާއި ވެންކަޓޭޝަމް އާއި ހެޑް އޮފް ފުޓްބޯލް މި މަހު 25 ވަނަ ދުވަހު ކްލަބްގެ އިސް ސަޕޯޓަރުންނާ ބައްދަލުކުރަން ނިންމާފައިވާއިރު، ސަޕޯޓަރުން ހުށަހަޅާ ބައެއް ކަހަލަ ޑިމާންޑްތަކަށް ކްލަބްގެ ވެރިން ނުރުހޭނަމަ ކުރިއަށް އޮތް ސީޒަނުގެ ކޮންމެ މެޗެއްގައި އާސެނަލްގެ މިހާރުގެ ލީޑަޝިޕާ ދެކޮޅަށް ހަރަކާތްތަކެއް ހިންގާނެ ކަމަށް ސަޕޯޓަރުންގެ ގްރޫޕުން ނެރުނު ނޫސްބަޔާނުގައިވެ އެވެ.