12 ޖުލައި 2019 - 08:29
އެންޖެލީނާ ޖޮލީގެ "މެލަފިސަންޓް" ގެ ދެވަނަ ބައި "މިސްޓްރެސް އޮފް އީވިލް" ގެ ޓްރެއިލާ އަށް ކުރަމުން ދިޔަ އިންތިޒާރަށް ޑިޒްނީން ނިމުން ގެނެސް ދީފި އެވެ.
މިދިޔަ މެއި މަހުގެ ތެރޭގައި ފިލްމުގެ ޓީޒާއެއް ދައްކާލައި، ބެލުންތެރިންގެ ސަމާލުކަން ހޯދުމަށް ފަހު، ދައްކައިލި ފިލްމުގެ ރަސްމީ ޓްރެއިލާ އަށް ބޮޑު ތަރުހީބެއް ލިބިފައިވެ އެވެ. "މެލަފިސަންޓް: މިސްޓްރެސް އޮފް އީވިލް" ގެ ޓްރެއިލާގައި ވަނީ ފިލްމުގެ ވާހަކައިގެ ތެރެއަށް ބެލުންތެރިން ގެންގޮސްދޭނެ ކަހަލަ ކިތަންމެ މަންޒަރެއް ވެސް ދައްކުވައި ދީފަ އެވެ. ވަކިން ހާއްސަކޮށް، ޓްރެއިލާ ނިމިގެން އަންނަ ހިސާބުން ޖޮލީގެ ކެރެކްޓާ އަށް ބަދަލެއް އަންނާނެކަން ބުނެ ދެ އެވެ.
އޭނާ ނެގަޓިވް ރޯލަކުން ފެނިގެންދާ މި ފްރެންޗައިޒަކީ ބެލުންތެރިން އޭނާ ދެކެ ރުޅި އަންނާނެ ކަހަލަ ކެރެކްޓާއަކުން ފެންނަ ފިލްމަކަށް ވިޔަސް، ޖޮލީގެ ކެރެކްޓާ އަކީ ވަރަށް ވެސް ޝައުގުން ފުރިގެންވާ، އާދަޔާހިލާފު ކެރެކްޓާއެވެ. އެކަން އިތުރަށް ތަޖުރިބާކޮށްލަން ޓްރެއިލާގެ ތެރެއަށް ފީނައިލާށެވެ.
ޔަގީނުން ވެސް މާޔޫސްވާކަށް ނުޖެހޭނެ އެވެ.
ފުރަތަމަ ބައި ރިލީޒްކުރިތާ ފަސް އަހަރު ގެނެސްދޭ "މެލަފިސަންޓް: މިސްޓްރެސް އޮފް އީވިލް" ސިނަމާތަކަށް އަންނާނީ އަންނަ އޮކްޓޯބަރު މަހުގެ 18 ގަ އެވެ. ޖޯޗިމް ރޮނިން ޑައިރެކްޓްކޮށްފައިވާ ފިލްމުގެ ތަރިންގެ ތެރޭގައި އެލް ފެނިންގް، އިޑް ސްކެރީން، ހެރިސް ޑިކިންސަން، ޖޫނޯ ޓެމްޕަލް އަދި އިމެލްޑާ ސްޓޯންޓަން ހިމެނެ އެވެ.
"މެލަފިސަންޓް" ގެނެސް ދިނީ 2014 ގަ އެވެ. ރޮބަޓް ސްޓްރޮންބާގް ޑައިރެކްޓް ކުރި އެ ފިލްމަކީ ބޮކްސް އޮފީހުގައި 758.5 މިލިއަން ޑޮލަރުގެ އާމްދަނީއެއް ހޯދި ފިލްމެކެވެ. ފިލްމު ހަދަން ގާތްގަނޑަކަށް 263 މިލިއަން ޑޮލަރު ހޭދަ ކުރި އެވެ.