08 ޖުލައި 2019 - 06:32
ރިއޯ ޑި ޖަނޭރޯ، ބްރެޒިލް (ޖުލައި 8) - ދިހަ ކުޅުންތެރިންނާ އެކު ކުޅެ ޕެރޫގެ މައްޗަށް 3-1 އިން ކުރިހޯދައި ބްރެޒިލުން 12 އަހަރަށް ފަހު، ދެކުނު އެމެރިކާގެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕަ އެމެރިކާގެ ޗެމްޕިއަންކަން ހޯދައިފި އެވެ.
މިއީ ބްރެޒިލުން ކޮޕަ އެމެރިކާ ކާމިޔާބުކުރި ނުވަ ވަނަ ފަހަރެވެ. ބްރެޒިލުން ވަނީ އަމިއްލަ ގައުމުގައި ކުޅުނު ފަސް ކޮޕަ އެމެރިކާ މުބާރާތުގެ ތަށި ވެސް އުފުލާލައިފަ އެވެ. ބްރެޒިލަށް ވުރެ ގިނައިން މި މުބާރާތުގެ ޗެމްޕިއަންކަން ހޯދީ 14 ފަހަރު ހޯދި އާޖެންޓީނާ އާއި 15 ފަހަރު ތަށި އުފުލާލި އުރުގުއޭ އެވެ.
ބްރެޒިލުން އެންމެ ފަހުން ކޮޕަ އެމެރިކާ ކާމިޔާބުކުރީ 2007 ވަނަ އަހަރު ފައިނަލުގައި އާޖެންޓީނާ ބަލިކުރުމަށް ފަހު އެވެ. އޭގެ ފަހުން އެ ޓީމަށް މުބާރާތުގެ ސެމީ ފައިނަލަށް ވެސް ދެވިފައިނުވާއިރު، އެންމެ ފަހުން ކުޅުނު މުބާރާތުން ކެޓީ ގްރޫޕް ސްޓޭޖުންނެވެ. އަނިޔާގެ ސަބަބުން ނޭމާ ނުލައި ކުޅެމުން އަންނަ ބްރެޒިލުން ވަނީ ގްރޫޕް ސްޓޭޖުގައި ޕެރޫ އަތުން 5-0 އިން މޮޅުވެފަ އެވެ. އެކަމަކު ފައިނަލުގައި ޕެރޫ އިން ވަނީ ރަނގަޅު ކުޅުމެއް ދައްކައިފަ އެވެ.
ބްރެޒިލްގެ އެސްޓަޑިއޯ މަރަކަނާ ސްޓޭޑިއަމްގައި ކުޅުނު މެޗު ފަށައިގެން ހިލޭ ޖެހުމަކުން ޕެރޫގެ ޔޮޝިމާ ޔޮޓުން ޖެހި ބޯޅަ ދިޔައީ އަރިމަތިން ބޭރުންނެވެ. ފުރަތަމަ 10 މިނިޓަށް ފަހު ބްރެޒިލުން ކުރިއަށް ޖެހިގެން އެޓޭކްތައް ކުރަން ފެށިއިރު، އޭގެ ފަސް މިނިޓް ފަހުން ބްރެޒިލަށް ލީޑުނަގައިދިނީ އެވަޓަން އެވެ. ގަބްރިއެލް ޖީސޫސް ނަގައިދިން ބޯޅަ އޭރިއާތެރޭގައި ހުސްކޮށްހުރެ އެވަޓަން ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
ބްރެޒިލަށް ލީޑުފުޅާކޮށްދޭން އަލެކްސް ސަންޑްރޯ ނަގައިދިން ހުރަހަކުން ރޮބާޓޯ ފިރްމީނޯ ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ.
ސާޅީސް ހަތަރު އަހަރަށް ފަހު ޕްރޫ ފުރަތަމަ ފަހަރަށް ފައިނަލުގައި ވާދަކުރަމުން އަންނައިރު، އެ ޓީމުން ނަތީޖާ ހަމަހަމަކުރީ މެޗުގެ 44 ވަނަ މިނިޓްގައި ލިބުނު ޕެނަލްޓީ އަކުން ތަޖުރިބާކާރު ފޯވާޑް ޕައޮލޯ ގަރޭރޯ އެވެ. މި މުބާރާތުގައި ބްރެޒިލް ކޮޅަށް ވަން ފުރަތަމަ ގޯލު ޖަހަން ލިބުނު ޕެނަލްޓީ އަކީ އޭރިއާތެރެއިން ބްރެޒިލްގެ ޑިފެންޑަރު ތިއާގޯ ސިލްވާ އަތުގައި ބޯޅަ ޖެހުމުން ރެފްރީ ދިން ޕެނަލްޓީ އެކެވެ. ޕެނަލްޓީ ދޭން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ވެސް ބެލުމަށް ފަހު އެވެ.
ޕެރޫ އިން އެއްވަރުކުރި ނަމަވެސް ފުރަތަމަ ހާފު ނިމުމުގެ ކުރިން ޖީސޫސް ވަނީ އަލުން ބްރެޒިލަށް ލީޑުނަގައިދީފަ އެވެ. މެދުތެެރެއިން ފިރްމީނޯ ހޯދި ބޯޅައެއް ހިފައިގެން ގޮސް ހުސްކޮށްލާފައި އާތޯ މެލޯ ޖައްސާލީ ޖީސޫސް އަށެވެ. އޭނާ ވަނީ ހަމަޖެހިލާފައި ގޯލުގެ ތިރީ ކަނަށް ބޯޅަ އަމާޒުކޮށްލައިފަ އެވެ.
ދެ ވަނަ ހާފްގެ ކުޅުން ފަށައިގެން ބްރެޒިލަށް ލީޑުފުޅާކުރަން ފުރުސަތުތަކެއް ލިބިގެންދިޔައިރު ބޭނުމެއް ނުކުރެވުނެވެ. ބްރެޒިލަށް މައްސަަލަތައް ދިމާވީ މެޗުގެ 70 ވަނަ މިނިޓްގައި އެ ޓީމުގެ ޖީސޫސް އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.
އެއް ކުޅުންތެރިއަކު މަދުކޮށް ބްރެޒިލުން ކުޅެމުންދިޔަ ނަމަވެސް ޕެރޫ އަށް މާ ބޮޑު ފައިދާއެއް ނުނެގުނެވެ. ބްރެޒިލްގެ ތިން ވަނަ ލަނޑު ޖެހީ ލިބުނު ޕެނަލްޓީ އަކުން ރިޗާލިސަން އެވެ. އޭނާ ކުޅެން އެރީ ފިރްމީނޯގެ ބަދަލުގަ އެވެ.
އަމިއްލަ ގައުމުގައި 2014 ވަނަ އަހަރު ކުޅުނު ވޯލްޑް ކަޕްގެ ސެމީ ފައިނަލުގައި ޖަރުމަނު އަތުން 7-1 އިން ބްރެޒިލް ބަލިވިއިރު، އޭގެ ދެ އަހަރު ފަހުން 2016 ވަނަ އަހަރު އެ ގައުމުގައި އޮތް އޮލިމްޕިކްސްގެ ފުޓްބޯޅަ އިވެންޓުން ރަން މެޑަލް ހޯދި އެވެ. މި ފަހަރުގެ ކޮޕަ އެމެރިކާގެ ކާމިޔާބީގެ ކުރިން ބްރެޒިލަށް ވަނީ 2013 ވަނަ އަހަރުގެ ކޮންފެޑެރޭޝަން ކަޕް ޗެމްޕިއަންކަން ލިބިފަ އެވެ.
ބްރެޒިލްގެ މި ކާމިޔާބީއާ އެކު އެންމެ ބޮޑު ހިތްހަމަޖެހުމެއް ލިބޭނެ ކުޅުންތެރިއަކީ މުބާރާތުގެ މޮޅު ކުޅުންތެރިއަކަށް ހޮވުނު އެ ޓީމުގެ ކެޕްޓަން ޑެނީ އަލްވޭސް އެެވެ. އަލްވޭސް އަކީ 2007 ވަނަ އަހަރުގެ ޗެމްޕިއަންކަން ހޯދި ބްރެޒިލް ޓީމުގެ ވެސް ކުޅުންތެރިއެކެވެ. މި ފަހަރުގެ ކާމިޔާބީއާ އެކު އަލްވޭސްގެ ފުޓްބޯޅަ ކެރިއަރުގައި ކްލަބާއި ގައުމީ ޓީމާ އެކު ވަނީ 40 ތަށި ހަމަކޮށްފަ އެވެ.
އަންނަ އަހަރުގެ ކޮޕަ އެމެރިކާ އޮންނާނީ ކޮލަމްބިއާ އާއި އާޖެންޓީނާގަ އެވެ.