30 ޖޫން 2019 - 11:57
މެޑްރިޑް (ޖޫން 30) - ރެއާލް މެޑްރިޑްގައި އެޑެން ހަޒާޑްގެ މޮޅު ކުޅުން ފެންނާނެކަމާ މެދު ޝައްކުނުކުރާ ކަމަށާއި އޭނާ އަކީ ރެއާލުގެ ވާދަވެރިންނަށް ހުރި ބިރެއް ކަމަށް ޗެލްސީގެ އެސިސްޓަންޓް ކޯޗަކަށް މަސައްކަތްކުރި ކުރީގެ ކުޅުންތެރިޔާ ޖިއަންފްރަންކޯ ޒޯލާ ބުނެފި އެވެ.
ރެއާލުން މި މަހުގެ 13 ވަނަ ދުވަހު ހަޒާޑްގެ ސޮއި ހޯދީ ޗެލްސީ އަށް 100 މިލިއަން ޔޫރޯގެ ޓްރާންސްފާ ފީއެއް ދެއްކުމަށް ފަހު އެވެ. އަދި ވަކި ކަންތައްތަކެއް ރެއާލުގައި ހަޒާޑް ފުރިހަމަކޮށްފިނަމަ ޗެލްސީ އަށް އިތުރު 45 މިލިއަން ޔޫރޯ ދައްކަން ރެއާލުން ވަނީ އެއްބަސްވެފަ އެވެ.
ޗެލްސީން ހަޒާޑާ އެކު ހަދާފައިވާ އެއްބަސްވުން އާ ކުރަން އެތަކެއް ފަހަރުމަތިން މަސައްކަތްކުރި ނަމަވެސް އޭނާ އާ ކޮންޓްރެކްޓެއްގައި ސޮއިނުކުރީ ރެއާލަށް ބަދަލުވެ ކުޑައިރުގެ ހުވަފެން ހަގީގަތަކަށް ހެދުމަށެވެ. ޒޯލާ ބުނީ ހަޒާޑަކީ ރެއާލް ފެންވަރުގެ ކުޅުންތެރިޔެއް ކަމަށެވެ.
"ހަޒާޑް އުފަލުން ހުރެ ކުޅެފިނަމަ އޭނާގެ އެންމެ މޮޅު ފޯމް ދަމަހައްޓާނެ. ހަގީގަތަކީ ހަޒާޑް ރެއާލަށް ބަދަލުވުމަކީ ވާދަވެރި ޓީމުތަކުން އުފާކުރާނެ ކަމެއް ނޫން. އެ ޓީމުތަކަށް ބިރެއް އެއީ. ހަޒާޑަކީ އެކަނި ކުޅެގެން މެޗު ބަދަލުކޮށްލެވޭފަދަ ހުނަރުވެރި މޮޅު ތަރިއެއް. ރެއާލުގައި ދެން ތިބޭ ކުޅުންތެރިންނާ އެކު ހަޒާޑްގެ ތަފާތު ފެންނާނެ،" ސްޕެއިނުގެ ނޫހަކަށް ދިން އިންޓަވިއެއްގައި ޒޯލާ ބުންޏެވެ.
ހަޒާޑަކީ ކުރިއަށް ކުޅޭ ކޮންމެ މަގާމަކަށް ވެސް ކުޅެވޭ ފެންވަރުގެ ކުޅުންތެރިޔެއް ކަމަށާއި ރެއާލުން އޭނާގެ ބޭނުންހިފާނީ އެންމެ ރަނގަޅަށް ކަމަށް އުއްމީދުކުރާކަމަށެވެ.
"މިދިޔަ ސީޒަނުގައި ހަޒާޑް ލައްވައި ސާރީ ވަނީ އެންމެ ކުރިއަށް ވެސް ކުޅުވާފައި. ހަޒާޑްގެ އެބަހުރި ކުރިއަށް ކުޅޭ ހުރިހާ މަގާމެއްގައި ވެސް ކުޅެވޭނެ ފެންވަރު. އަހަރެންގެ ނަޒަރުގައި އޭނާ އެންމެ މޮޅީ ވާތު ފަޅިން ކުރިއަށް. އެއީ އޭނާގެ ހުނަރުގެ ބޭނުން އެންމެ ފުރިހަމަ އަށް ހިފޭނެ މަގާމު،" ޒޯލާ ބުންޏެވެ.
ޗެލްސީގެ މޮޅު ކުޅުންތެރިޔާގެ މަގާމު ހަތަރު ސީޒަނެއްގައި ހޯދާފައިވާ ހަޒާޑް ވަނީ ޕްރިމިއާ ލީގުގެ މޮޅު ކުޅުންތެރިޔާގެ މަގާމު އެއް ފަހަރު ހޯދައިފަ އެެވެ. މިދިޔަ ސީޒަނުގައި އިނގިރޭސި ޕްރިމިއާ ލީގުގެ އެންމެ މޮޅު ޕްލޭމޭކަރުގެ އެވޯޑް ހޯދި ހަޒާޑް އެ ޓީމަށް ބަދަލުވީ 2012 ވަނަ އަހަރު އެވެ.
ރެއާލުން މި ފަހަރުގެ ޓްރާންސްފާ މާކެޓްގައި ގިނަ ކުޅުންތެރިންތަކެއް ގެނެސްފައިވާއިރު، އެ ޓީމުން އަންނަނީ އިތުރު މިޑްފީލްޑަރެއް ހޯދުމަށް މަސައްކަތްކުރަމުންނެވެ. ރެއާލުން ގެންނާނެ ކަމަށް ބެލެވެނީ ޔުނައިޓެޑްގެ ޕައުލް ޕޮގްބާ އާއި ޓޮޓެންހަމްގެ ކްރިސްޓިއަން އެރިކްސަން އަދި އަޔަކްސްގެ ވެން ޑާ ބީކްގެ ތެރެއިން ކުޅުންތެރިޔެކެވެ.