26 ޖޫން 2019 - 07:40
އިންޑިއާގެ ރަށްވެހިކަން ހޯދައިގެން މިހާރު އެ ގައުމުގައި ދިރިއުޅޭ، ޕާކިސްތާނަށް އުފަން މަޝްހޫރު ލަވަކިޔުންތެރިޔާ އަދުނާން ސާމީ އާ އަލްބަމެއް ގެނެސް ދޭން އުޅޭކަމުގެ އިޝާރާތެއް ދީފި އެވެ.
އޭނާ ކުރި ޓްވީޓެއްގައި ބުނީ މިއުޒިކް އާއިލާއާ އެކު ރިކޯޑިން ސެޝަންތަކެއް ނިންމާފައިވާ ކަމަށެވެ. އަދި އެ ޓްވީޓްގައި ބުނީ ވަރަށް އަވަހަށް "ކޫލް އެއްޗެއް އަންނަން އުޅޭ" ކަމަށެވެ.
ގިނަ މީޑިއާތަކުން މިކަން ސިފަކުރީ އާ އަލްބަމެއްގެ ގޮތުގަ އެވެ. މިހާތަނަށް ރީތި އަދި މަގުބޫލު އެތައް ލަވައެއް ހަދިޔާކޮށްފައިވާ ލަވަކިޔުންތެރިޔާ ވަނީ މިހާތަނަށް 13 އަލްބަމެއް ނެރެފަ އެވެ. އަދުނާން ސާމީ އެންމެ ފަހުން އަލްބަމެއް ނެރުނީ 2013 ގަ އެވެ. އެއީ "ޕްރެސް ޕްލޭ" އެވެ.
އަދި އޭނާއަކީ ބޮލީވުޑްގެ ވަރަށް ގިނަ ފިލްމުތަކަށް މިހާތަނަށް އެތައް ލަވައެއް ކިޔާފައިވާ ފަންނާނެކެވެ. ސްޓާ ޕްލަސް އިން ދާދި ފަހުން ނިންމައި ލަވަ ޝޯ "ދަ ވޮއިސް" ގެ ތިން ވަނަ ސީޒަނުގެ ޖަޖެއްގެ ގޮތުގައި ވެސް އަދުނާން ސާމީ މަސައްކަތްކޮށްފައިވެ އެވެ.
އޭނާ މިހާތަނަށް ނެރުނު ބައެއް އަލްބަމްތަކުގެ ބައެއް ލަވަތައް ވަނީ ވީޑިއޯ ލަވަތަކުގެ ގޮތުގައި ވެސް ގެނެސް ދީފަ އެވެ. އޭގެ ތެރޭގައި "ލިފްޓް ކަރާ ދޯ"، "ކަބި ތޯ ނަޒަރު މިލާއޯ"، "ބީގި ބީގި ރާތޮ މޭ" އަދި "ތެރާ ޗެހެރާ" ފަދަ އެތައް ލަވައެއް ހިމެނެ އެވެ.