29 މެއި 2016 - 11:43
އެންމެ ގިނަ ދިވެހިން ބެލި ހޮލީވުޑް ފިލްމަކީ 1997 ވަނަ އަހަރު ޖޭމްސް ކެމަރަން ގެނެސް ދިން "ޓައިޓޭނިކް" ކަމަށް ބުނެފި ނަމަ ދޮގަކަށް ވެދާނެ ހެއްޔެވެ؟
ދުނިޔޭގައި މިހާތަނަށް ބަން އެންމެ ބިޔަ ކްރޫޒްލައިނާތަކުގެ ތެރޭގައި ހިމެނޭ "ޓައިޓޭނިކް" 1912 ވަނަ އަހަރު، އޭގެ ފުރަތަމަ ދަތުރަށް ނިކުމެ އުޅެނިކޮށް އައިސް ބާގެއްގައި ޖެހި ބިންދައިގެން ގޮސް އަޑި އަށް ދިޔަ ހަގީގީގެ ހާދިސާގެ ތެރެ އަށް ހިޔާލީ ލޯބީގެ ވާހަކައެއް ފައްތައިގެން ގެނެސް ދިން މި ފިލްމަކީ އެ ފިލްމެއްގެ އަވައިގައި އަދިވެސް އެތައް ބަޔަކު ޖެހިފައި ތިބި ފިލްމެކެވެ.
އެހެންވެ ފިލްމާ ބެހޭ ގޮތުން އެކި ކަހަލަ ތިއަރީތައް ނެރޭ މީހުން އަދިވެސް އެބަ ތިއްބެވެ. ޖެކް [ލިއޮނާޑީ ޑި ކެޕްރިއޯ] އާއި ރޯސް [ކޭޓް ވިންސްލެޓް] ގެ ލޯބީގެ ނިމުން ފިލްމުގައި ގެނައި ގޮތް ބައެއް ބެލުންތެރިންނަކަށް ހަމަޖަމެއް ނުވެ އެވެ.
ފިލްމް ރިލީޒް ކުރިތާ 20 އަހަރު ފަހުން ވެސް އެ މީހުން ގަބޫލް ކުރަނީ ފިލްމުގައި ޖެކް މަރުވާން ނުޖެހޭނެ ކަމަށެވެ. އަދި ޖެކް އާއި ރޯސް ސަލާމަތުގެ އައްސޭރިއަކަށް ގޮސް، ހަޔާތެއް ފަށަން ޖެހޭ ކަމަށް އެފަދަ މީހުން ދެކެ އެވެ.
އަނެއް ބަޔަކު ބުނަނީ ރޯސް އަމިއްލަ އެދުން ބޮޑުކަމުން ޖެކް ގަދަ ފިނީގެ ތެރޭގައި ފުން ކަނޑުގެ ތެރެ އަށް މަރުވާން ދޫކޮށްލީ ކަަމަށެވެ. ރޯސް ސަލާމަތް ކުރަން ޖެކް ގެނެސްދޭ ފިލާގަނޑެއްގެ މަތީގައި އޮވެގެން، ރޯސް، ޖެކް މަރުވާން ދޫކޮށްލި ދޫކޮށްލުމަކީ "ހަގީގީ ލޯބީގެ ކަންފުޅެއް ވެސް" ރޯސްގެ ހިތުގައި ނެތްކަން ސާބިތުކޮށް ދިން ކަމެއް ކަމަށް ޖެކަށް ހަމްދަރުދީވާ މީހުން ދެކެ އެވެ.
މި ވާހަކަތަކަށް ރޯސްގެ ރޯލް ކުޅުނު އިނގިރޭސި ވިލާތުގެ މަޝްހޫރު ބަތަލާ ކޭޓް ބުނަނީ ކީކޭ ބާވަ އެވެ؟ ލޯބިވެރިޔާ މަރުވާ ތަން ބަލަން އޭނާ އަށް ފަސޭހަ ކަމަކަށްވި ހެއްޔެވެ؟
އެ ސުވާލްތަކަށް ކޭޓް ވެސް ދޭން އޮތް ޖަވާބަކީ ޖެކް މަރުވާން ދޫކޮށްލެވިގެން ނުވާނެ އެވެ. އޭނާ ވެސް ސަލާމަތް ވާން ޖެހޭނެ އެވެ. އެކަންވި ނަމަ އެވެ.
"އަހަންނަށް ހީވަނީ އަހަރެން ވެސް އޭނާ މަރުވާން ދޫކޮށްލައިގެން ނުވާނެހެން،" މަޝްހޫރު ޓީވީ ޝޯ ޖިމީ ކިމެލް ލައިވްގައި އެ ސުވާލުތައް އައުމުން ކޭޓް ބުންޏެވެ. "އަސްލު އަހަރެން އޮތް ފިލާގަނޑު މަތީގައި އޭނަ [ޖެކް] އަށް ވެސް އޮވެނުވީސް ކަންނޭނގޭ. އޭގެ މަތީގައި އޭނަ އަށް އޮވެވުނު ނަމަ މަރުނުވީސް ކަންނޭނގޭ."
"ޓައިޓޭނިކް" ގައި ގެނެސްދޭ އެ ހިތްދަތި އަދި އަސަރުން ފުރިގެންވާ މަންޒަރާ ބެހޭ ގޮތުން ކެމެރަން ވެސް މީގެ ކުރިން ވަނީ ވާހަކަ ދައްކައިފަ އެވެ. އެ ސީން އަށް އޯޑިއަންސް ތަފާތު ތިއަރީތައް ނެރޭތީ އޭނާ ދެކޭ ގޮތް ބުނެލީ އެވެ.
ކެމަރަން ބުނި ގޮތުގައި ރޯސް އޮންނަ ފިލާގަނޑުގެ މައްޗަށް އަރަން ޖެކް މަސައްކަތް ކުރެ އެވެ. އޭނާ ވެސް މަރުން ސަލާމަތް ވާން ބޭނުންވެ އެވެ. އެކަމަކު ރޯސް އޮތް ފިލާގަނޑު މައްޗަށް އޭނާ އަރަން މަސައްކަތް ކުރުމުން އެ އަޑި އަށް ދާ ގޮތް ވަނީ އެވެ.
އެހެންވެ ހަމަޖެހޭ "ފިރިހެނަކު" އަމިއްލަ ފުރާނަ ސަލާމަތް ކުރުމުގެ އެދުމުގައި އަންހެން ކުއްޖެއްގެ ފުރާނަ ދުއްވާލަން ބޭނުން ނުވާނެ ކަމަށް ކެމެރަން ދެކެ އެވެ.
އެހެންވެ ފިލްމުގައި ޖެކް މަރުވުމަކީ ވުން އެންމެ ގާތް އަދި އެންމެ ހަމަޖެހޭ ގޮތެވެ. އެ އަށް ވިސްނާލީމާ ކެމަރަން އަށް ނެރެވޭ ތިއަރަކީ މިއީ އެވެ. ފިލްމް އެގޮތަށް އޭނާ ގެނެސް ދިނީ އެކަން ގަބޫލް ކުރެވޭތީ އެވެ.
"އެހެންވީމާ ބުނެވޭނީ ޖެކްއަކީ އިޑިއަޓެއް ނޫނޭ،" ޓައިޓޭނިކަށް ފަހު "އެވެޓާ" އިން ވެސް 2009 ވަނަ އަހަރު ބެލުންތެރިން މުޅިން އެހެން ދުނިޔެއަކަށް ގެންގޮސް ދިން ޑައިރެކްޓަރު ބުންޏެވެ.