07 ޖޫން 2019 - 08:40
ގައުމީ ސަލާމަތަށް ނުރައްކާވާ ކަމަށް ބުނެ އެމެރިކާ އާއި ހުޅަނގުގެ ބައެއް ގައުމުތަކުން ޗައިނާގެ ވާވޭ ބްލެކްލިސްޓްކޮށްފައި ވަނިކޮށް، ރަޝިއާ އަށް 5ޖީ ނެޓްވޯކް ދޭން ވާވޭއާ ހަވާލުކޮށްފި އެވެ.
ޗައިނާގެ ރައީސް ޝީ ޖިންޕިން ތިން ދުވަހަށް ރަޝިޔާ އަށް ކުރައްވާ ދަތުރުގެ ތެރެއިން ސޮއިކޮށްފައި ވަނީ ރަޝިއާގެ މުއާސަލާތީ ހިދުމަތް ދޭ ކުންފުނި އެމްޓީއެސްއާ އެވެ. މި އެއްބަސްވުމުގައި ވާވޭގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ ޗެއާމަން ގުއާ ޕިންޖެވެ. އެމްޓީއެސްގެ ފަރާތުން ސޮއިކުރެއްވީ ކުންފުނީގެ ރައީސް އެލެކްޒީ ކޯނިއާ އެވެ.
މި އެއްބަސްވުމާ ބެހޭ ގޮތުން އެ ކުންފުނިން ބުނީ ރަޝިއާ އަށް 5ޖީ ގެ ހިދުމަތް ތައާރަފު ކުރުމުގެ ޕައިލެޓް ޕްރޮޖެކްޓް ވާވޭ އިން މި އަހަރާއި އަންނަ އަހަރު ކުރިއަށް ގެންދާނެ ކަމަށެވެ.
މީޑިއާތަކުން ބުނީ ދުނިޔޭގެ ބޮޑެތި ގައުމުތަކުން ވާވޭ އަށް ފުރަސްގަސް ދެމުންދާ މި ދަނޑިވަޅުގައި ރަޝިއާގެ ކަހަލަ ވަރުގަދަ ގައުމަކުން އެ ކުންފުންޏާ އެކު އެއްބަސްވުމެއް ހެދުމަކީ ވިޔަފާރި އަށް ލިބުނު ބޮޑު ހިތްވަރެއް ކަމަށެވެ.