19 މެއި 2019 - 15:40
ބްރިޖުން ދަތުރުކުރާ ޓެކްސީތައް ހުއްޓުވައި އޭގައި ތިބި މީހުން ސީޓްބެލްޓް އަޅާފައިތޯ ތިބީ ފުލުހުން ޗެކްކުރަން ފަށައިފި އެވެ.
ފުލުހުންގެ މީޑިއާ އޮފިޝަލަކު މިއަދު ވިދާޅުވީ ބްރިޖަށް އަރާއިރު އެ ސަރަަހައްދުގައި ތިބޭ ފުލުހުން، ޓެކްސީތައް މަޑުކޮށް ސީޓްބެލްޓް އަޅާފައިތޯ ބަލަން ފަށާފައިވާ ކަމަށެވެ. އަދި ސީޓްބެލްޓް ނާޅައި ހުރިނަމަ ބެލްޓް އެޅުމަށް ވެސް ނަސޭހަތްތެރިވެ އެވެ.
"ރެންޑަމްކޮށް ފާސްކުރަން ފެށީ، އެގޮތަށް ފާސްކުރާއިރު ނަސޭހަތްތެރިވާނެ ސީޓްބެލްޓް ނާޅައި ހުރިއްޔާ ސީޓްބެލްޓް އެޅުމަށް،" އޮފިޝަލް ވިދާޅުވި އެވެ.
އޭނާ ވިދާޅުވީ އެގޮތަށް އަމަލުކުރަން ފެށީ ބްރިޖާއި ހައިވޭގައި ދަތުރުކުރާ ރައްޔިތުންގެ ރައްކަލަކަށްޓަކައި ކަމަށެވެ. އެހެންވެ އެކަމުގައި އެންމެންގެ އެއްބާރުލުން ދިނުމަށް ފުލުހުން އެދެ އެވެ.
އެއްގަމު ދަތުރުފަތުރުކުރުމުގެ ގަވާއިިދު ބުނާގޮތުން 30 ކިލޯމީޓަރަށް ވުރެ ބާރަށް ދުއްވުމުގެ ހުއްދަ އޮންނަ މަގުތަކުގައި، ހަތަރު ފުރޮޅުލީ އުޅަނދުތަކުގައި ދަތުރުކުރާއިރު ސީޓްބެލްޓް އެޅުމަކީ މަޖުބޫރު ކަމެކެވެ. އަދި ސައިކަލުގައި ނަމަ ހެލްމެޓް އެޅުން މަޖުބޫރެވެ. ނަމަވެސް ސީޓްބެލްޓް އެޅުމަކީ ގިނަ ބަޔަކު އެހާ ސަމާލުކަން ދޭ ކަމެއް ނޫނެވެ.