04 ސެޕްޓެމްބަރ 2016 - 11:24
ބާސެލޯނާ (ސެޕްޓެމްބަރު 4) - ސަންޓޯސް އިން އެ ޓީމުގެ ފޯވާޑް ގަބްރިއެލް ބާބޯސާ (ގަބިގޯލް) އިންޓަ އަށް ވިއްކާލީ ބާސެލޯނާއާ އެކު ވެފައިވާ އެއްބަސްވުމާ ހިލާފަށް ކަމަށް ބާސެލޯނާ އިން ބުނެފި އެވެ.
ބާސެލޯނާ އިން 2013 ގައި ސަންޓޯސް އިން ނޭމާ ގަތްއިރު އެ ޓީމުން ވަނީ ގަބިގޯލް އެހެން ޓީމަކަށް ވިއްކާނަމަ ފުރުތަމަ ފުރުސަތު ލިބޭނީ ބާސެލޯނާ އަށް ކަމަށް އެއްބަސްވެފަ އެވެ. އެހެން ނަމަވެސް ސަންޓޯސް އިން މިދިޔަ މަހު ގަބިގޯލްގެ ޓްރާންސްފާ ލިޔުންތައް ބާސެލޯނާ އަށް ފޮނުވިއިރު، އިންޓައާ މަޝްވަރާކުރާކަން ބާސެލޯނާ އަށް އަންގާފައިނުވާ ކަމަށް އެ ކްލަބުން ބުނެ އެވެ.
މިދިޔަ މަހު އޮތް އޮލިމްޕިކްސްގެ ފުޓްބޯޅައިން ބްރެޒިލަށް ރަން މެޑަލް ހޯދައިދިން ޓީމަށް މޮޅު ކުޅުމެއް ދެއްކި ގަބިގޯލް މިދިޔަ ހަފްތާގައި އިންޓަ އަށް ފަސް އަހަރުގެ އެއްބަސްވުމެއްގެ ދަށުން ބަދަލުވީ 23 މިލިއަން ޕައުންޑަށެވެ.
ރިޕޯޓްތައް ބުނާގޮތުން ބާސެލޯނާ އިން މިހާރު އަންނަނީ މި މައްސަލަ ކޯޓަށް ހުށަހެޅުމަށް ތައްޔާރުވަމުންނެެވެ.
ގަބިގޯލް އަކީ ފަހަކަށް އައިސް ބްރެޒިލް ގައުމީ ޓީމަށް މޮޅު ކުޅުމެއް ދައްކަމުން އަންނަ ކުޅުންތެރިއެކެވެ. ގަބިގޯލް އިންޓަ އަށް ސޮއިކުރީ އޭނާ ހޯދަން އިނގިރޭސި ގަދަ ދެ ބާރު ޗެލްސީ އާއި މެންޗެސްޓާ ޔުނައިޓެޑުން ޝައުގުވެރިކަން ފާޅުކޮށްފައި ވަނިކޮށެވެ.
ގަބިގޯލް ނުލިބުމުން ބާސެލޯނާ އިން ވަނީ ވެލެންސިއާ އަށް ކުޅޭ ސްޕެއިނުގެ ފޯވާޑް ޕަކޯ އަލެސެއާ އެ ޓީމަށް ގެނެސްފަ އެވެ.