08 މެއި 2019 - 10:34
ބާސެލޯނާ (މެއި 8) - ބާސެލޯނާ ޖެހިޖެހިގެން ދެ އަހަރު ލަދުވެތިގޮތަކަށް ޗެމްޕިއަންސް ލީގުން ކަޓައިގެން ދިއުމާ އެކު އެ ޓީމުގެ އާނެސްޓޯ ވަލްވޭޑޭ މި ސީޒަނަށް ފަހު މަގާމުން ދުރުކުރުމާ މެދު ބޯޑުން މަޝްވަރާކުރާނެ ކަމަށް މީޑިއާ ރިޕޯޓްތައް ބުނެފި އެވެ.
ބާސެލޯނާއާ އެކު ވަލްވޭޑޭ ހަދާފައި އޮތް އެއްބަސްވުން މި ސީޒަނުގެ ނިޔަަލަށް ހަމަވާއިރު، އޭނާ އަންނަ ސީޒަނުގައި އެ ޓީމުން ނުފެންނާނެ ކަމަށް އެންމެ ފުރަތަމަ މީޑިއާގައި އަޑުފެތުރުނެވެ. އެކަމަކު ވަލްވޭޑޭ ވަނީ އެ ކްލަބާ އެކު ހަދާފައިވާ އެއްބަސްވުން އިތުރު އެއް އަހަރަށް އާކޮށްފަ އެވެ.
ޖެހިޖެހިގެން ދެ އަހަރު ސްޕެނިޝް ލީގުގެ ތަށި ބާސެލޯނާ އިން ހޯދި ނަމަވެސް ޗެމްޕިއަންސް ލީގުގައި އެ ޓީމުގެ ރެކޯޑް ނިސްބަތުން ދަށެވެ. ޖެހިޖެހިގެން ދެ އަަހަރު ބާސެލޯނާ ކެޓީ ފުރަތަމަ ލެގުގައި ތަފާތު ބޮޑުކޮށް މޮޅުވި ނަމަވެސް ދެ ވަނަ ލެގުގައި ރަށުންބޭރުގައި ބަލިވުމުންނެވެ. މިދިޔަ އަހަރުގެ ކުއާޓާ ފައިނަލުގައި ރޯމާ އަތުން ބަލިވިއިރު، މި ފަހަރުގެ ސެމީ ފައިނަލުން ރޭ ކެޓީ ލިވަޕޫލް އަތުން 4-0 އިން ބަލިވުމުންނެވެ.
ރޭގެ މެޗަށް ފަހު ވަލްވޭޑޭ ވަނީ އޭނާގެ މުސްތަގުބަލާ ބެހޭގޮތުން ވާހަކަ ދައްކަން ދެކޮޅު ހަދައިފަ އެވެ. އަދި ޓީމުގެ ފަރާތުން ފެނުނު ދަށް ކުޅުމަށް މައާފަށް އެދުނެވެ.
ބާސެލޯނާގެ ރައީސް ޖޯސެފް ބާޓޮމެއު ސްޕެއިނުގެ ނޫހަކަށް ދިން އިންޓަވިއުއެއްގައި ވިދާޅުވީ ރޭގެ މެޗުން އެ ކްލަބަށް ލިބުނީ ހިތްދަތި ނަތީޖާއެއް ކަމަށާއި އެކަމަކު އަދި ސީޒަން އެއްކޮށް ނުނިމޭ ކަމަށެވެ.
"އަހަރެން މިހުރީ ވަރަށް މާޔޫސްވެފައި. އެކަމަކު ލިވަޕޫލަށް މަރުހަބާ ކިޔަން. އެ ޓީމުން ވަރަށް މޮޅަށް ކުޅުނު. މިއީ ބާސެލޯނާގެ ސީޒަން ނިމުމެއް ނޫން އަދި އެއް ފައިނަލް ކުޅެން ޖެހޭ. އެއަށް ޖެހޭނެ ތައްޔާރުވާން،" ބާޓޮމެއު ވިދާޅުވި އެވެ.
އަންނަ ސީޒަނުގައި ވެސް ބާސެލޯނާގެ ކޯޗަކަށް ހުންނާނީ ވަލްވޭޑޭ ތޯ ނޫސްވެރިއަކު ސުވާލުކުރުމުން ބާޓޮމެއު ވަނީ ސީދާ ޖަވާބެއް ދޭން ދެކޮޅު ހައްދަވައިފަ އެވެ.
"މި ވަގުތު ޖަޒުބާތުގައި ޖެހިގެން ނިންމުމެއް ނުނިންމާނަން. މި ވަގުތު މިއީ އެންމެން އެކަތިގަނޑަކަށްވެގެން ކްލަބް ކުރިއަށް ގެންދަންވީ ވަގުުތު. އެހެން ކަންތައްތަކަށް ވިސްނާނީ ފަހުން،" ބާޓޮމެއު ވިދާޅުވި އެވެ.
ރިޕޯޓްތައް ބުނާގޮތުން ވަލްވޭޑޭގެ މުސްތަގުބަލާ މެދު ގޮތެއް ނިންމާނީ މި މަހު 25 ވަނަ ދުވަހު ކުޅޭ ކޮޕަ ޑެލް ރޭ ފައިނަލަށް ފަހު އެވެ. ފައިނަލުގައި ބާސެލޯނާ ބައްދަލުކުރާނީ ވެލެންސިއާއާ އެވެ. ވަލްވޭޑޭގެ އެއްބަސްވުން އިތުރު އެއް އަހަރަށް އާ ކުރިއިރު، މި ފަހަރުގެ ޗެމްޕިއަންސް ލީގުގެ ނަތީޖާ ނުކުންނަ ގޮތަކުން އޭނާ މަގާމުން ދުރުކުރުމަށް އޭރު ވެސް ބާސެލޯނާ އިން މަޝްވަރާކުރި ކަމަށް ރިޕޯޓްތައް ބުނެ އެވެ.
ބާސެލޯނާ ބޯޑް މެމްބަރަކު މީގެ ކުރިން ސްޕެއިނުގެ ނޫހަކަށް ބުނީ އެ ޓީމުގެ ކުރީގެ ކޯޗު ޕެޕް ގާޑިއޯލާ އަށް އަބަދުވެސް އެ ކްލަބްގެ ދޮރު ހުޅުވިފައި ހުންނާނެ ކަމަށެވެ. އެކަަމަކު މި ވަގުތު މެންޗެސްޓާ ސިޓީގެ ކޯޗަކަށް ހުރި ގާޑިއޯލާ އެ ކްލަބް ދޫކޮށްލުމުގެ އޮތީ ކުޑަ ފުރުސަތެކެވެ.