03 ސެޕްޓެމްބަރ 2016 - 07:29
ހެމާ މާލިނީގެ ރަން ޒަމާނުގައި ވަރަށް ގިނަ ބަތަލުންގެ ހިތްތައް އަތުލި އެވެ. ޑްރީމް ގާލްގެ ނަމުން ބޮލީވުޑްގައި މަޝްހޫރު ވެފައިވާ ހެމާ އަށް މިހާރު 67 އަހަރު ފުރިފައި ވިޔަސް އޭނާގެ މޫނުމަތިން އެހާ ދުވަސްވީ ހެނެއް ހިއެއް ނުވެ އެވެ.
ތަމަޅަ ބަހުން ވާހަކަދައްކާ އިޔަންގަރް އާއިލާއަކަށް ނިސްބަތްވާ ހެމާ އަކީ އެ ދުވަސްވަރު ފިލްމު ކުޅުނު ބަތަލާއިންގެ ތެރެއިން ސައުތު އިންޑިއާއަށް ނިސްބަތްވާ މަދު ބަތަލާއިންގެ ތެރޭގައި ހިމެނޭ މީހެކެވެ.
ހެމާ 1964 ގައި ފިލްމު ކުޅެން ފެށުމާއެކު އެ ދުވަސްވަރުގެ މަޝްހޫރު ޑައިރެކްޓަރެއް ކަމަށްވާ ސީ.ވީ. ޝްރީދަރް ހެމާ މާ ހިކި ކަމަށް ބުނެ ބަތަލާގެ ރޯލު ދިނުމަށް ދެކޮޅުހެދި އެވެ.
އޭގެ ހަތަރު އަހަރު ފަހުން ހެމާގެ ނަސީބު އަތުގައި ހިފި އެވެ. މަޝްހޫރު ފިލްމު އުފެއްދުންތެރިޔާ ރާޖް ކަޕޫރު "ސަޕްނޯން ކާ ސައުދާގަރް" އިން ހެމާ ފިލްމީ ދުނިޔެއަށް ނެރެދިނެވެ. އެ ފިލްމު ވީ ވަރަށް ބޮޑު ފްލޮޕަކަށެވެ. ނަމަވެސް ހެމާގެ ރީތިކަމާއި ހުނަރު ވަރަށް ގިނަ މީހުންގެ ލޮލުގައި އަޅައިގަތެވެ.
ހެމާ އަކީ 1960 އާއި 1970 އަދި 1980 ގެ ކުރީކޮޅު ބޮލީވުޑްގައި މަސައްކަތްކުރި އެންމެ ރީތި ބަތަލާގެ ގޮތުގައި ގިނަ މީހުން ފާހަގަކުރެ އެވެ. އަދި އެދުވަސްވަރު ބަތަލާއިންގެ ތެރެއިން އެންމެ ބޮޑު އުޖޫރައެއް ވެސް ލިބެނީ ހެމާ އަށެވެ.
ހަމަ އެކަނި ފިލްމީ ދުނިޔެއަކު ނޫނެވެ. ޒާތީ ދިރިއުޅުމުގައި ވެސް ހެމާ އަކީ ވަރަށް ކާމިޔާބު މީހެކެވެ. އެ ދުވަސްވަރުގެ އެންމެ މަޝްހޫރު އެކްޓަރުންގެ ތެރޭގައި ހިމެނޭ ޖީތެންދުރަ، ސަންޖީވް ކުމާރު އަދި ދަރްމެންދުރަ ތިބީ ހެމާ އާ ހެދި މޮޔަވެފަ އެވެ.
އެންމެ ފުރަތަމަ ހެމާގެ ހިތް އަތުލެވޭތޯ އުޅުނީ ސަންޖީވް ކުމާރެވެ. ހެމާގެ ލޯބި ހޯދޭތޯ އެކުވެރިން ލައްވާ ސަންޖީވް ވަރަށް މަސައްކަތް ކުރި އެވެ. ނަމަވެސް އެ މަސައްކަތްތައް ކާމިޔާބު ނުވުމުން ދެން އޭނާ ޖީތެންދުރަގެ ކިބައިން އެހީތެރިކަމަށް އެދުނެވެ. ނަމަވެސް ސަންޖީވް އާއި ހެމާ ގުޅުވަން ކުރި މަސައްކަތުގެ ތެރޭގައި ހެމާ ދެކެ ޖީތެންދުރަ އަށް ލޯބިވެވި ދެ މީހުން ރައްޓެހިވީ އެވެ.
ހެމާ އާއި ޖީތެންދުރަ ރައްޓެހިވީއިރު އެ ދެ މީހުން ވަނީ "ވާރިސް" އާއި "ގެހެރީ ޗާލް"ގައި އެކުގައި މަސައްކަތް ކޮށްފަ އެވެ. އަދި "ދުލްހަން" ގެ ޝޫޓިން އޭރު ދިޔައީ ހިނގަމުންނެވެ. ބުނެވޭ ގޮތުގައި ދެ މީހުން އެކަކު އަނެކަކު ދެކެ ލޯބިވާ ކަމަށް އިއުތިރާފުވީ މިފިލްމުގެ ޝޫޓިން ތެރޭގަ އެވެ.
ޖީތެންދުރަ އާއި ހެމާގެ އާއިލާއިން ވެސް މި ދެ މީހުންގެ ގުޅުމަށް އެއްބަސްވި އެވެ. އެދުވަސްވަރު ހެމާ އާއި ޖީތެންދުރަ އެންގޭޖްވީ ކަމުގެ އަޑުތަކެއް ވެސް ފެތުރުނެވެ. ނަމަވެސް ކައިވެންޏަށް ރާވަމުންދިޔަ ރޭވުންތައް ކުއްލިއަކަށް ހުއްޓުމަކަށް އައީ އެންމެ ފަހު ވަގުތު ހެމާ ކައިވެނިކުރަން އިންކާރު ކުރުމުންނެވެ.
ހެމާއާ ރައްޓެހިވީއިރު ވެސް ޖީތެންދުރަ އުޅެނީ އޭނާގެ މިހާރުގެ އަނބިމީހާ ޝޯބާއާ ރައްޓެހިވެގެންނެވެ. ހެމާ އާއި ޖީތެންދުރަ ރައްޓެހިވީކަން އެނގުމުން ވެސް ޝޯބާ ފަހަތަކަށް ނުޖެހެ އެވެ. ބަދަލުގައި ހެމާ އާއި ޖީތެންދުރަ ކައިވެނި ނުކުރޭތޯ އޭނައަށް ކުރެވުނުހާ މަސައްކަތެއް ކުރަމުން ގެންދިޔަ އެވެ. އެގޮތުން ޖީތެންދުރައާ ކައިވެނިކުރަން ހެމާ އިންކާރު ކުރީ ޝޯބާ ޖެހި ކޮން މަޅިއެއްގައި ބެދިގެންތޯ އެއީ އަދި އަދަށް ދާންދެން ވެސް ނޭނގިފައި އޮތް ބޮޑު ސިއްރެކެވެ. ޔަގީންވާ ކަމަކީ ޝޯބާގެ މަސައްކަތް ކާމިޔާބުވި ކަމެވެ. އަދި ހެމާ ކައިވެންޏަށް ދެކޮޅު ހެދިތާ މާގިނަދުވަސްތަކެއް ނުވަ ޝޯބާއާ ޖީތެންދުރަ ކައިވެނި ކުރި އެވެ.
ދަނޑިވަޅު ބަލާފައި ސަންޖީވް ހެމާ އަށް ލޯބި ހުށަހެޅި އެވެ. ނަމަވެސް ހެމާ ސާފުބަހުން އެކަމަށް އިންކާރު ކުރި އެވެ. މާޔޫސްވި ސަންޖީވް ރަލުގެ މަސްތުގައި ޖެހި ވަރަށް ޒުވާން ދުވަސްވަރު ހާޓް އެޓޭކެއް ޖެހިގެން މަރުވީ އެވެ.
ދަރުމެންދުރަ ހެމާ ގެ ހަޔާތަށް އައީ ސަންޖީވް އާއި ޖީތެންދުރަ އަށް ފަހުގަ އެވެ. ހެމާ އާއި ދަރްމެންދުރަ އެކަކު އަނެކަކު ދެކެ ލޯބިވި އެވެ. ނަމަވެސް މިއީ އެއްގޮތަކަށް ވެސް ފަސޭހައިން ގުޅެވެން އޮތް ގުޅުމެއް ނޫނެވެ. ސަބަބަކީ ދެ ފަރާތުގެ އާއިލާ މި ގުޅުމާ އިންތިހާއަށް ދެކޮޅުވުމެވެ.
ހެމާގެ މަންމަ ޖާޔާ އެ ދުވަސްވަރު ބޭނުންވީ ގިރިޝް ކަރްނާޑް ކިޔާ އެކްޓަރަކާ ހެމާގެ ކައިވެނި ކުރުވާށެވެ. ނަމަވެސް ދަރުމެންދުރަ ދޫކޮށްލަން ހެމާ އެއްބަސްނުވުމުން އެކަން ވާގޮތެއް ނުވި އެވެ.
ހެމާ އާއި ދަރްމެންދުރަ ރައްޓެހިވިއިރު ވެސް ދަރްމެންދުރަ އަކީ ކައިވެނިކޮށްގެން ދެ ދަރިން ލިބިފައިވާ މީހެކެވެ. އަދި ހެމާއާ ކައިވެނި ކުރަން ދަރުމެންދުރަ ކިތަންމެ ބޭނުމަސް އޭނާގެ ފުރަތަމަ އަނބިމީހާ ޕްރަކާޝް ވަރިވާކަށް އެއްގޮތަކަށް ވެސް އެއްބަހެއް ނުވި އެވެ. އެންމެ ފަހުން ދަރުމެންދުރަ އިސްލާމްވެގެން ހެމާއާ ކައިވެނި ކުރީ އެވެ.
މިހާރުވެސް ހެމާ އާއި ދަރުމެންދުރަގެ ލޯބި އެގޮތުގައި ދެމި އެބައޮތެވެ. ކައިވެންޏަށް ގިނަދުވަސްތަކެއް ވެފައިވާއިރު ލިބިފައިވާ ދެ ދަރިން ކަމަށްވާ އީޝާ ޑެއޯލް އާއި އާހަނާ ބޮޑުވެ މިހާރު އާހަނާ އަށް ވެސް ދަރިއަކު ލިބިއްޖެ އެވެ.