03 މެއި 2019 - 17:58
ހަމަހަމަ ފުރުސަތުތަކާއި ހައްގުތައް ލިބޭ ކަމަށް ގަބޫލުނުކުރާ ކަމަށް ބުނެ އަދި އަމިއްލަ ސަބަބުތަކެއް ވެސް ހުރުމާ އެކު، ޒުވާން ހުނަރުވެރި ބެޑްމިންޓަން ކުޅުންތެރިޔާ އަހުމަދު ތޯއިފް މުހައްމަދު ގައުމީ ބެޑްމިންޓަން ޓީމަށް ކުޅުން ހުއްޓާލައިފި އެވެ.
މިދިޔަ އަހަރު މޮރިޝަސް އިންޓަނޭޝަނަލް ސީރިސްގެ ފިރިހެން ޑަބަލްސް އާއި މިކްސް ޑަބަލްސް ބައިން ލޯ މެޑަލް ހާސިލްކުރި އުމުރުން 23 އަހަރުގެ ތޯއިފް، އިންޑިއަން އޯޝަން އައިލެންޑް ގޭމްސް ބޯމަތިވެފައި އޮއްވާ ޓީމުން ވަކިވުމަކީ ގައުމީ ޓީމަށް ލިބޭނެ ނިކަމެތިކަމެކެވެ.
މޯލްޑިވްސް ޕޮލިސް ސާވިސަސްގައި ވަޒީފާއަދާކުރާ ތޯއިފް ބެޑްމިންޓަން އެސޯސިއޭޝަނަށް ފޮނުވި ނޯޓިހުގައި ބުނެފައިވާ ގޮތުގައި ކުޅުން ހުއްޓާލި އެއް ސަބަބަކީ ރާއްޖޭން ބޭރަށް ތައުލީމު ހާސިލްކުރުމަށް ދިއުމަށް ނިންމާފައި ވުން ކަމަށާއި މީގެ ސަބަބުން މާ ރަނގަޅު ފުރުސަތުތަކެއް ތަނަވަސްވާނެ ކަމަށް ދެކޭ ކަމަށެވެ.
އަދި އަނިޔާގެ މައްސަލަތަކެއް ކުރިމަތިވެފައިވާ ކަމަށާއި، މަތީ މިނުގެ ތަމްރީންތައް ކުރިއަށް ގެންގޮސްފި ނަމަ، ދުވަހުން ދުވަހަށް އަނިޔާގެ މައްސަލަ ސީރިއަސް ވެދާނެ ކަމުގެ ލަފާ ސިއްހީ ތަޖުރިބާކާރުން އޭނާ އަށް ދީފައިވާކަން ވެސް ތޯއިފް ވަނީ ފާހަގަކޮށްފަ އެވެ.
އެކަންކަންކަމާ އެކު އޭނާ ދެން އިޝާރާތްކޮށްފައިވަނީ ޓީމުގެ އެތެރޭގެ މައްސަލަތަކެވެ. އެގޮތުން ތަމްރީން މާހައުލުގައި ހުރި މައްސަލަތައް އިތުރުވެފައިވާ ކަމަށާއި އޭގެ ތެރޭގައި އެސޯސިއޭޝަނުގެ ހުރިހާ ލެވެލެއްގައި ވެސް، ތަފާތުކުރުންތަކާއި ވަކި އަތަކަށް ޖެހުން އޮތް އޮތުން ހިމެނެ އެވެ.
"އެހެންކަމުން، އަޅުގަނޑު ގަބޫލުކުރާ ގޮތުގައި މިހާރު އޮތް ސިސްޓަމުގައި، ކުޅުންތެރިންނަށް ހުރަސްތަކެއް އެބަހުރި. އަދި ކުޅުންތެރިންނަށް ހަމަހަމަ ފުރުސަތުތައް ނެތްއިރު، ޓީމުގައި ތިބި ހުރިހާ ކުޅުންތެރިންނަށް ހަހަމަމަ ހައްގުތަކެއް ވެސް ނެތް،" ތޯއިފް ބުނެފައިވެ އެވެ.
ބެޑްމިންޓަން އެސޯސިއޭޝަނުގެ އޮފިޝަލަކު ވިދާޅުވީ ބަލި ހާލަތު ހުރި ގޮތުންނާއި ކިޔަވަން ދާން ބޭނުންވާތީ ތޯއިފް ކުޅުން ހުއްޓާލަން ނިންމިކަން އެސޯސިއޭޝަނަށް އަންގާފައިވާ ކަމަށާއި އޭނާ އެކުރާ ތުހުމަތުތަކުގެ އެއްވެސް ކަމެއް އެނގިފައި ނެތް ކަމަށެވެ.
"އެހެންވެ އަޅުގަނޑުމެން އޮންނާނެ އޭގެ ތަފްސީލް ދިނުމަށް އޭނާ އަށް އަންގާފައި. އެކަމަކު އަދި ތަފްސީލެއް ނުލިބޭ. އެކަމަކު އޭނާގެ އުނަގަނޑުގެ އަނިޔާއެއް އުޅޭ މައްސަލަ ފާހަގަވެފައިވޭ. އެކަމާ ގުޅިގެން މީގެ ކުރިން ޕްރެކްޓިސް މެދުކަނޑާލާފައި ވެސް ވޭ،" އޮފިޝަލް ވިދާޅުވި އެވެ.
ޓީމުގެ ތެރޭގައި މައްސަލަތަކެއް އުޅޭ ކަމަށް ތޯއިފް އިޝާރާތްކުރިއިރު، ހާޒިރީ މައްސަލައިގައި ބޭއިންސާފުން އަމަލުކުރާ ކަމަށް ތުހުމަތުކުރެވޭ މައްސަލައެއް މިދިޔަ ފެބްރުއަރީ މަހު ފެންމަތިވި އެވެ. އެގޮތުން ކޯޗަށް ހާޒިރީ ކަންތައްތައް ރަނގަޅަށް ނުބެލި، ޕްރެކްޓިހަށް ހާޒިރުނުވާ ކުޅުންތެރިން ވެސް، އައި ކަމަށް ފާހަގަޖަހާތީ އެކަމާ ދެކޮޅަށް، އައިމިނަތު ނަބީހާ ޕްރެކްޓިހަށް ހާޒިރުނުވާ ކުޅުންތެރިންގެ ނަމާ ދިމާލުގައި ނާންނަކަން ފާހަގަކުރުމުން އޭނާ ސަސްޕެންޑްކުރި އެވެ. ފަހުން އޭނާގެ ސަސްޕެންޝަން ވަނީ އުވާލައިފަ އެވެ.
މީގެ ހަ އަހަރު ކުރިން ގައުމީ ޓީމަށް ކުޅެން ފެށި ތޯއިފް އެންމެ ފުރަތަމަ ވިދާލީ 2015 ވަނަ އަހަރުގެ ގައުމީ ބެޑްމިންޓަން މުބާރާތުންނެވެ. ތަޖުރިބާކާރު ކުޅުންތެރިޔާ މުހައްމަދު އަޖުފާން އަތުން ބަލިވި ނަމަވެސް އޭނާ ފައިނަލުގައި މޮޅު ކުޅުމެއް ދެއްކި އެވެ. އަރަމުން އައި ކުޅުންތެރިޔާގެ ކުރިއެރުމަށް ހިޔަލި އެޅުނީ އިންޑިއާގައި 2016 ވަނަ އަހަރު ބޭއްވި ސައުތު އޭޝިއަން ގޭމްސް އަށް ފަހު، އަމިއްލަ ސަބަބަކާ ހުރެ ކުޅުމާ ދުރަށް ދާން ޖެހުމުންނެވެ.
އެކަމަކު އޭނާ 2017 ވަނަ އަހަރު އަލުން ކުޅެން ފަށައި ކުރީގެ ކުޅުން ތަކުރާރުކުރި އެވެ. އެގޮތުން މިދިޔަ އަހަރު އޮތް މޮރިޝަސް އިންޓަނޭޝަނަލް ސީރިސްގެ ފިރިހެން ޑަބަލްސް އާއި މިކްސް ޑަބަލްސް ބައިން ލޯ މެޑަލް ހާސިލްކޮށް ގައުމީ ބެޑްމިންޓަން މުބާރާތުގެ މިކްސް ޑަބަލްސް ރަން މެޑަލް ހޯދި އެވެ.
އެ ކާމިޔާބަށް ފަހު އޭނާ ބުނީ، މި އަހަރުގެ އިންޑިއަން އޯޝަން އައިލެންޑް ގޭމްސް އިން ރަން މެޑެއްޔެއް ހޯދަން ކުރާ މަސައްކަތުގައި ހުރިހާ ކުޅުންތެރިން ވެސް ތިބީ ގަދަ ހިތްވަރުގައި ކަމަށާއި ޓީމު އޮތީ މެޑެއްޔަކަށް ފައްކާވެފައި ކަމަށެވެ. އެކަމަކު އެ މުބާރާތަށް ދާން ދެ މަސް ދުވަހަށް ވެފައި އޮއްވާ، މިއަދު އޭނާ އެ އިއުލާންކުރީ ގައުމީ ޓީމުގެ ރިޓަޔާމަންޓެވެ.
"މި ނިންމުމާ ހަމަޔަށް އައުމަށް ވަރަށް ގިނަ ކަންކަން މެދުވެރިވި. އެކަމަކު މިއީ ހަގީގަތުގައި ވެސް އަހަރެން ގަބޫލުކުރާ ގޮތުގައި ރަނގަޅު ނިންމުން،" ތޯއިފް ބުންޏެވެ. "ދިވެހިރާއްޖޭގެ ގައުމީ ބެޑްމިންޓަން ޓީމަށް ކުޅެވުމަކީ އާދަޔާހިލާފު ބޮޑު ޝަރަފެއް."