27 އެޕްރީލް 2019 - 16:22
މިހާރު "ސްޕޯޓްސް ސްޓާސް ފިއެސްޓާ" ގެ ހަރަކާތްތައް ތުލުސްދޫގައި ނިންމާލައިފި. "މިހާރު ސްޕޯޓްސް އެވޯޑްސް" ގެ އިޖުތިމާއީ ޒިންމާގެ މި ހަރަކާތް ކުރިއަށް ގެންދިޔައީ ސްޕޮންސަރުންގެ އިތުރުން ކ. އަތޮޅު ތައުލީމީ މަރުކަޒާއި ތުލުސްދޫ ޒުވާނުންގެ ރޫހުގެ ވަރަށް ބޮޑު އެހީތެރިކަމެއް ލިބިގެން.
މިހާރު ނޫހުގެ ފަރާތުން ޒުވާނުންގެ ރޫހަށް ފުޓްސަލް ބޯޅަތައް ހަވާލުކުރުން.
ރެއިންބޯގެ ފަރާތުން ކ. އަތޮޅު ތައުލީމީ މަރުކަޒަށް ތިން ބުކްޝެލްފް ހަދިޔާކުރި.
މިހާރު ނޫހުގެ ފަރާތުން ކ. އަތޮޅު ތައުލީމީ މަރުކަޒަށް ވޮލީބޯޅަ ނެޓް ހަވާލުކޮށްދެއްވީ ގައުމީ ފުޓްބޯޅަ ޓީމާއި ވިކްޓްރީ ސްޕޯޓްސް ކްލަބުގެ ކުރީގެ ގޯލްކީޕަރު އަދި ކާމިޔާބު ކޯޗު މައުރޫފް އަހުމަދު (މާއްޓޭ). ކ. އަތޮޅު ތައުލީމީ މަރުކަޒުގެ ފަރާތުން ހަދިޔާއާ ހަވާލުވީ ޕްރިންސިޕަލް މިހާދު.
ސޮނީ ސްޕޯޓްސްގެ ފަރާތުން ތުލުސްދޫ ޒުވާނުންގެ ރޫހަށް ދިނީ ޖާޒީ ބައި އަދި ކ. އަތޮޅު ތައުލީމީ މަރުކަޒަށް ޖާޒީ ބައެއް. ސޮނީ ސްޕޯޓްސްގެ ފަރާތުން ހަދިޔާ ހަވާލުކޮށްދއްވީ މާކެޓިން މެނޭޖަރު އިސްމާއިލް ހުސެއިން. ތުލުސްދޫ ޒުވާނުންގެ ރޫހުގެ ފަރާތުން ހަދިޔާއާ ހަވާލުވެވަޑައިގަތީ ޖަމިއްޔާގެ ރައީސް މުހައްމަދު ޝިހާމް. ކ. އަތޮޅު ތައުލީމީ މަރުކަޒުގެ ފަރާތުން ހަވާލުވެވަޑައިގަތީ ޕްރިންސިޕަލް މިހާދު.
ބީއެޗްއެމް ޓްރޭޑާސް އިން ކ. އަތޮޅު ތައުލީމީ މަރުކަޒަށް ހަދިޔާކުރީ ލެޕްޓޮކާއި ޕްރިންޓަރެއް. ހަދިޔާ ހަވާލުކޮށްދެއްވީ ބީއެޗްއެމް ޓްރޭޑާސްގެ ބިޒްނަސް ޑިވެލޮޕްމަންޓް މެނޭޖަރު އިބްރާހިމް މައުމޫން. ކ. އަތޮޅު ތައުލީމީ މަރުކަޒުގެ ފަރާތުން ހަވާލުވެވަޑައިގަތީ ޕްރިންސިޕަލް މިހާދު
ޕްރިންޓް ލެބްގެ ފަރާތުން ކ. އަތޮޅު ތައުލީމީ މަރުކަޒަށް ހަދިޔާކުރީ ލެޕްޓޮޕެއް. ހަދިޔާ ހަވާލުކޮށްދެއްވީ ޕްރިންޓް ލެބްގެ މެނޭޖިން ޑިރެކްޓަރު މަދީހު ޖަމާލް. ކ. އަތޮޅު ތައުލީމީ މަރުކަޒުގެ ފަރާތުން ހަވާލުވެވަޑައިގަތީ ޕްރިންސިޕަލް އަހުމަދު މިހާދު
ވެލިގާ ހާޑްވެއާގެ ފަރާތުން ހަދިޔާކުރީ ކ. އަތޮޅު ތައުލީމީ މަރުކަޒަށް 5000 ރުފިޔާގެ ގިފްޓް ވައުޗާއެއް. އިނާމް ހަވާލުކޮށްދެއްވީ ވެލިގާ ހާޑްވެއާގެ އޮފީސް މެނޭޖަރު އިރުފާއު އަބްދުﷲ. ކ. އަތޮޅު ތައުލީމީ މަރުކަޒުގެ ފަރާތުން ހަވާލުވެވަޑައިގަތީ ޕްރިންސިޕަލް އަހުމަދު މިހާދު
އުރީދޫ މޯލްޑިވްސްގެ ފަރާތުން ތުލުސްދޫ ކައުންސިލަށް ދޭ ހަދިޔާއަކީ ޑިޖިޓަލް ލިޓެރަސީ ޕްރޮގްރާމެއް ހިންގައިދިނުން. މިއީ ސްކޫލް ދަރިވަރުންނާއި އުމުރުންދުވަސްވީ މީހުންނަށް ޓެކްނޮލޮޖީގެ ވަސީލަތްތަަކަށް އަހުލުވެރިކުރުވުމާއި ހޭލުންތެރިކުރުވުމުގެ ޕްރޮގްރާމެއް. މިކަމުގެ ރަމްޒީ ލިޔުން ކައުންސިލާ ހަވާލު ކުރެއްވީ އުރީދޫ މޯލްޑިވްސްގެ އެސިސްޓެންޓް މެނޭޖާ ބްރޭންޑް، ނާފިޒް އަބްދުﷲ.
މިހާރު ދަނީ ސްޕޮންސަރުންގެ އެހީތައް ތުލުސްދޫގެ ބައެއް އިދާރާތަކަށް ދިނުން.
މިހާރު އެވޯޑްސްގެ ތެރެއިން ކުޅިވަރު ތަރިންގެ ފިއެސްޓާއެއް ކޮންމެ އަހަރަކު ވެސް ބާއްވަނީ އިޖުތިމާއީ ޒިންމާގެ ދަށުން އެކި ފަރާތްތަކަށް އެހީތެރިކަން ފޯރުކޮށްދިނުމުގެ ބޭނުމުގައި. އެގޮތުން، ފިއެސްޓާ ބާއްވާ ރަށެއްގެ ސްކޫލާއި ޖަމިއްޔާތަކަށް "މިހާރު" ން އެހީތެރިކަން ފޯރުކޮށްދޭނެ.
މިވަގުތު މައިގަނޑު ގޮތެއްގައި ކުރިއަށް ގެންދަނީ ފޭސް ޕެއިންޓިން އާއި އެކިއެކި ގޭމުތައް ކުޅުން. އަދި އިވެންޓުގެ ރަހަ ހެޔޮވަރު ކުރުމަށްޓަކައި ޝަލަބީގެ ލަވަކިޔުމުގެ އައިޓަމްތައް ވެސް ކުރިއަށް އެބަދޭ.
ފިއެސްޓާގައި މެސްކޮޓުން ވެސް ކުޑަކުދިންނާ އެކު ފޮޓޯ ނަގައި އެ ކުދިންގެ އުފަލުގައި އަންނަނީ ބައިވެރިވަމުން.
ފިއެސްޓާ ކުރިއަށް ގެންދާއިރު، "މިހާރު" ސްޕޯޓްސް އެވޯޑްސްގެ ސްޕޮންސަރުންގެ އެހީތެރިކަމާ އެކު ތައްޔާރު ކޮށްފައިވާ ސްޓޯލްތަކުގައި ތަފާތު ގޭމްތައް ކުޑަކުދިންނަށް ކުރިއަށް ގެންދާނެ.
ފުޓުބޯޅަ ތަރިންގެ އިތުރުން ސްވިމިން އާއި ބެޑްމިންޓަން އާއި ޓޭބަލްޓެނިސް އާއި ވޮލީގެ ތަރިން ވެސް މި ފިއެސްޓާގައި ބައިވެރިވޭ. އެގޮތުން ބެޑްމިންޓަންގެ ގައުމީ ޓީމުގެ ކުޅުންތެރިން ނަބީހާ އާއި ނަބާހާ އަދި ޝަހުރުނާޒް ވެސް ކުޑަކުދިންނާ އެކު ވަގުތުކޮޅެއް ހޭދަކުރާނެ.
ދަގަނޑޭ އާއި އަކްރަމާއި އިމްރާން މިހާރު ގެންދަނީ ކުޑަކުދިންނާ އެކު ކުޑަ ގޯލަށް ފުޓުބޯޅަ ކުޅެލައި މަޖަލުގެ ވަގުތުކޮޅެއް ހޭދަކުރަމުން. ފިއެސްޓާގައި ބައިވެރިވާ ކުދިންގެ ފަރާތުން ވެސް ފެންނަނީ އެކަމުގައި ވަރަށް ބޮޑަށް ގަޔާވެގެން އުޅޭ ތަން.
ކުޅިވަރު ތަރިންގެ އިތުރުން ރާއްޖޭގެ މަޝްހޫރު ލަވަކިޔުންތެރިޔާ ޝަލަބީ ވެސް ބައިވެރިވޭ. މި ފިއެސްޓާގައި ބައިވެރިވާ ކުޑަކުދިންނާ އެކު ޝަލަބީ ފޮޓޯ ނަގައި އެ ކުދިންނާ އެކު މިހާރު އަންނަނީ ވަގުތު ހޭދަކުރަމުން.
ކ. އަތޮޅު ތައުލީމީ މަރުކަޒުގެ ދަރިވަރުން މިހާރު ދަނީ މަރުހަބާގެ އައިޓަމެއް ހުށަހަޅަމުން. މި ފިއެސްޓާގައި ތުލުސްދޫގެ ގިނަ އަދަދެއްގެ ކުޑަކުދިންނާއި އެ ކުދިންގެ ބެލެނިވެރިން ވެސް އަންނަނީ ބައިވެރިވަމުން.
"ސްޕޯޓްސް ސްޓާސް ފިއެސްޓާ" ގެ ތަރިން ތުލުސްދޫގެ ފުޓުބޯޅަ ދަނޑަށް މިހާރު ވަނީ އައިސްފައި. އޭގެ ތެރޭގައި ދަގަނޑޭ އަކްރަމާއި އިމްރާންގެ އިތުރުން ދިވެހި ގައުމީ ކޯޗާއި އަލީ ސުޒޭނާއި މައުރޫފު އަހުމަދު (މާއްޓޭ) ވެސް ހިމެނޭ. އަދި އެހެން ބައެއް ކުޅިވަރުތަކުގެ ތަރިން ވެސް ހިމެނޭ.
މިހާރު އެވޯޑްސްގެ އިޖުތިމާއީ ޒިންމާގެ ދަށުން ބާއްވާ "ސްޕޯޓްސް ސްޓާސް ފިއެސްޓާ" ގެ ލައިވް ކަވަރޭޖަށް މަރުހަބާ.
ތުލުސްދޫގައި މިހާރު ކުރިއަށް ގެންދާ މި ފިއެސްޓާގައި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ގެ އިތުރުން މިހާރުގެ ކެޕްޓަން އަކުރަމް އަބްދުލްގަނީ އާއި ރާއްޖޭގައި އުފެދުނު އެންމެ މޮޅު ގޯލްކީޕަރު އިމްރާން މުހައްމަދުގެ އިތުރުން މުހައްމަދު އުމައިރު ވެސް ބައިވެރިވޭ.
ފުޓްބޯޅަ ތަރިންގެ އިތުރުން ވޮލީގެ މަޝްހޫރު ކުޅުންތެރިންނާއި ބެޓްމިންޓަނާއި ޓީޓީ، އެތުލެޓިކްސް އަދި ފެތުންތެރިން ވެސް، ތަރިންގެ މި އީދުގައި ބައިވެރިވޭ.
ރާއްޖޭގައި ކުޅިވަރުގެ ދާއިރާ އިން ދޭ އެންމެ އަގުބޮޑު އެވޯޑްގެ މި އިވެންޓްގައި ސްޕޮންސަރުން ވަރަށް ދީލަތި އެހީތައް، ތުލުސްދޫގައި ހުންނަ އަތޮޅު ތައުލީމީ މަރުކަޒާއި ޒުވާނުންގެ ޖަމިއްޔާ އަށް ދޭނެ. އެގޮތުން އެވޯޑްގެ މެއިން ސްޕޮންސަރުން ކަމަށްވާ އުރީދު އާއި އެލައިޑް އިންޝުއަރެންސްގެ އެހީތެރިކަން ބޮޑު.
އޭގެ އިތުރުން އެސޯސިއޭޓް ސްޕޮންސަރުންގެ ގޮތުގައި މިފަހަރު ހަތް ކުންފުނި ބައިވެރިވޭ. އެއީ ބީއެޗުއެމް، ވެލިގާ، ސޮނީ ސްޕޯޓްސް، ރެއިންބޯ، ޕްރިންޓް ލެބް، ޓީއެފްޖީ އަދި ޑޮނާޑް.
އެވޯޑްސްގެ އެޑްވަޓައިޒިން ޕާޓްނަރަކީ ތިންކް އެޑްވަޓައިޒިން. މީޑިއާ ޕާޓްނަރަކީ ވީޓީވީ.
މެހެމާނުންނަށް ސްކޫލްގެ ދަރިވަރުން ވަނީ ވަރަށް ހޫނު މަރުހަބާއެއް ކިޔާފައި.