28 އެޕްރީލް 2019 - 07:33
މި އަހަރު ބޭއްވި 91 ވަނަ އޮސްކާ އެވޯޑްގެ އެންމެ މޮޅު ފިލްމުގެ މަގާމު ހޯދި "ގްރީން ބުކް" ގެ ޑައިރެކްޓަރު ޕީޓާ ޕެރެލީ އާ ފިލްމަކަށް ތައްޔާރުވާން ފަށައިފި އެވެ.
ވެރައިޓީން ބުނި ގޮތުގައި އަދި ވަކި ނަމެއް ހަމަޖައްސާފައި ނުވާ އާ ފިލްމު ހަދަނީ ސްކައިޑާންސްއާ ގުޅިގެންނެވެ. މި ފިލްމު ޑައިރެކްޓް ކުރުމުގެ އިތުރަށް ފިލްމުގެ ސްކްރީންޕްލޭ ވެސް ޕީޓާ ލިޔާ އިރު، އޭގެ ވާހަކަ ބިނާކުރާނީ "ގްރޭޓެސްޓް ބިއާ ރަން އެވާ: އަ ޓްރޫ ސްޓޯރީ އޮފް ފްރެންޑްޝިޕް ސްޓްރޯންގާ ދެން ވޯ" އަށެވެ.
ވިއެޓްނާމް ހަނގުރާމައިގެ ހަގީގީ ހާދިސާއެއް ކިޔަދައިދޭ މި ވާހަކައަކީ އެ ވާހަކަ ނިސްބަތްވާ ޖޯން (ޗިކީ) ޑޮނޮހީ އާއި ޖޮއާނާ މޮލޯއީ 2017 ގައި ނެރުނު ވާހަކައެކެވެ.
"ގްރޭޓެސްޓް ބީއާ ރަން އެވާ" ސްކްރީންޕްލޭގައި ޕީޓާއާ އެކު "ގްރީން ބުކް" ގެ ސްކްރީންޕްލޭގައި ހިއްސާވި ބްރަޔަން ކަރީގެ އިތުރުން ޕީޓް ޖޯންސް ހިއްސާވާނެ އެވެ، އެކަމަކު ފިލްމުގެ ކާސްޓާއި ފިލްމުގެ ޝޫޓިން ފަށާނެ އިރެއް އަދި އިއުލާނެއް ނުކުރެ އެވެ.
އޮސްކާގެ އެންމެ މޮޅު ފިލްމުގެ މަގާމު ހޯދައިގެން ގިނަ ބަޔަކު ސިއްސުވައިލި "ގްރީން ބުކް" އަކީ ފަސް ކެޓަގަރީއަކުން ނޮމިނޭޓްވެ، ތިން އެވޯޑް ގެންދިޔަ ފިލްމެކެވެ. އެ ފިލްމު އުފުލައިލި އެވޯޑްތަކަކީ އެންމެ މޮޅު ފިލްމާއި އެންމެ މޮޅު އޮރިޖިނަލް ސްކްރީންޕްލޭގެ އިތުރުން އެކްޓަރު މެހެރްޝާލާ އަލީ އަށް ލިބުނު އެންމެ މޮޅު ސަޕޯޓިން އެކްޓަރުގެ އެވޯޑެވެ.
އެންމެ 23 މިލިއަން ޑޮލަރުގެ ބަޖެޓަކުން ހެދި ބައޮގްރަފިކަލް ކޮމެޑީ-ޑްރާމާ "ގްރީން ބުކް" އަށް ބޮކްސް އޮފީހުގައި 317.6 މިލިއަން ޑޮލަރުގެ އާމްދަނީއެއް ލިބުނެވެ.