22 އެޕްރީލް 2019 - 21:59
ނ. މިލަދޫ ސްކޫލުގެ ތިޖޫރިން 100،000 އަށް ވުރެ ގިނަ ރުފިޔާ އާއި އެ ރަށުގެ ގެއަކުން ގިނަ އަދަދެއްގެ ފައިސާ އިއްޔެ ވަގަށް ނެގި ކަމަށް ތުހުމަތު ކުރެވޭ މީހަކު މިއަދު ހައްޔަރުކޮށްފި އެވެ.
ފުލުހުން މިރޭ ބުނިގޮތުގައި އެ ދެ ވައްކަމާ ގުޅިގެން ހައްޔަރުކުރީ 19 އަހަރުގެ ފިރިހެނެކެވެ.
އެ ދެ ވައްކަމާ ގުޅިގެން ފުލުހުން ގެއެއް ބަލައި ފާސްކުރި އިރު އެ ގޭގައި ހުރި ދަބަހެއްގެ ތެރެއިން 94،000 އަށް ވުރެ ގިނަ ރުފިޔާ ފެނިފައިވެ އެވެ. އަދި ފޮރުވާފައި އޮތް ވޮލެޓެއްގެ ތެރެއިން 1،300 އަށް ވުރެ ގިނަ ރުފިޔާ ފެނިފައިވާ ކަމަށް ފުލުހުން ބުންޏެވެ.
ފުލުހުން ބުނިގޮތުގައި، އޭގެތެރޭގައި މިލަދޫ ސްކޫލުގެ ތިޖޫރިން ވަގަށް ނެގި ފައިސާ ހިމެނެ އެވެ.
ވައްކަމުގެ އެ ދެ މައްސަލަ ވެސް ފުލުހުން އަންނަނީ ތަހުގީގު ކުރަމުންނެވެ.