22 އެޕްރީލް 2019 - 15:52
ކިއޭވް (އެޕްރީލް 22) - ޔޫކްރޭނުގައި އިއްޔެ ބޭއްވި ރިޔާސީ އިންތިޚާބުގެ ދެ ވަނަ ބުރުގައި ރައީސް ޕެޓްރޯ ޕޮރޮޝެންކޯއާ ވާދަކުރައްވައި ޓީވީ ކޮމީޑިއަނެއް ކަމަށްވާ ވޮލޮޑިމީރް ޒެލެންސްކީ ކާމިޔާބު ކުރައްވައިފި އެވެ.
ރަސްމީ ނަތީޖާތައް ދައްކާ ގޮތުން ޒެލެންސްކީ ވަނީ ވޯޓުގެ 73 ޕަސެންޓް ކާމިޔާބު ކުރައްވައިފަ އެވެ. ޕޮރޮޝެންކޯ އަށް ލިބިވަޑައިގެންނެވީ 25 ޕަސެންޓެވެ.
ޕޮރޮޝެންކޯ ވަނީ ވޯޓުގެ ނަތީޖާ މުޅިން ސާފުކޮށް ނުނިމެނީސް އާދިއްތަ ދުވަހުގެ ރޭ ބަލި ގަބޫލް ކުރައްވައިފަ އެވެ.
"މި އަންނަ މަހު އަޅުގަނޑު ވެރިކަމުން ދުރުވާނަން. މިއީ ޔޫކްރޭނުގެ ގިނަ ރައްޔިތުން ބޭނުންވި ގޮތް. ރައްޔިތުންގެ ނިންމުން އަޅުގަނޑު ގަބޫލް ކުރަން. ވެރިކަން ދޫކޮށްލަން ޖެހުނު ނަމަވެސް ސިޔާސީ ކަންކަމާ އަޅުގަނޑު ދުރެއް ނުވާނަން. ޔޫކްރޭނަށް ޓަކައި އަޅުގަނޑު މަސައްކަތް ކުރާނަން،" ޕޮރޮޝެންކޯ ވިދާޅުވި އެވެ. "އާ ރައީސް އަށް އެހީވާން އަޅުގަނޑުގެ ޓީމު އޮތީ ތައްޔާރަށް."
ޒެލެންސްކީ، 41، ވަނީ އޭނާ އަށް ވޯޓު ދިން މީހުން މާޔޫސްކޮށް ނުލާނެ ކަމަށް ވިދާޅުވެފަ އެވެ.
ޓީވީ ޑްރާމާތަކުގައި ޒެލެންސްކީ ވަނީ ކޮރަޕްޝަނާ ދެކޮޅު މީހެއްގެ ގޮތުގައި މަސައްކަތް ކޮށްފަ އެވެ. ޒެލެންސްކީ އަށް ޔުކްރޭނުގެ ގިނަ ޒުވާނުން ތާއިދު އޮވެ އެވެ.