31 އޯގަސްޓް 2016 - 08:07
ބޮލީވުޑް އެކްޓަރުން ކަމަށްވާ ރަންބީރު ކަޕޫރާއި ކެޓުރީނާ ކައިފް ގިނަ ދުވަސް ތަކެއް ވަންދެން ރައްޓެހިވެގެން އުޅުމަށްފަހު ރުޅިވިޔަސް އެމީހުން އެކުގައި ކުޅެމުންދިޔަ ފިލްމު "ޖައްގާ ޖާސޫސް" އަށް އެކަމުގެ ނޭދެވޭ އަސަރެއް ނުކުރާ ކަމަށާއި އެ މީހުން މިހާރު މާ ޕްރޮފެޝަނަލް ކަމަށް ޑައިރެކްޓަރު އަނުރާގް ބާސޫ ބުނެފި އެވެ.
ރަންބީރާއި ކެޓުރީނާ ރުޅިވުމުން "ޖައްގާ ޖާސޫސް" ކުރިއަށް ގެންދިއުމަށް ބޮޑެތި އުނދަގޫތައް ދިމާވެފައިވާ ކަމަށް ދެކެވޭ ވާހަކަތައް ފިލްމުގެ ޑައިރެކްޓަރު ދޮގުކުރެ އެވެ. އޭނާ ބުނި ގޮތުގައި ރުޅީވި ފަހުން މި ދެ އެކްޓަރުން ކުރިއަށް ވުރެ މާ ބޮޑަށް ޕްރޮފެޝަނަލް ވެއްޖެ އެވެ. އަދި
"އެމީހުންގެ ސަބަބުން ފިލްމަށް އެއްވެސް މައްސަލައެއް ދިމާވާކަށް ރަންބީރު ވެސް ކެޓުރީނާ ވެސް ބޭނުމެއް ނުވޭ،" ޑައިރެކްޓަރު ބުނެފައި ވެއެވެ.
ރަންބީރާއި ކެޓުރީނާ އާއި "ޖައްގާ ޖާސޫސް" އާ ބެހޭ ގޮތުން ދެކެވޭ ވާހަކަތަކުގެ ސަބަބުން ޑައިރެކްޓަރު ވެސް ވަނީ ހައިރާންވެފަ އެވެ. އޭނާ ބުނި ގޮތުގައި އެއްވެސް ހަގީގަތެއްނެތް އެތައް ވާހަކައެއް ފެތުރެމުންދާތީ އޭނާ ހުންނަނީ ބަސް ހުއްޓިފަ އެވެ.
"ދެ މީހުން ވެނިޓީ ވޭން ޝެއާ ކުރަން ދެކޮޅުހެދި ވާހަކައެއް ވެސް ބައެއް ނޫސްތަކުގައި އޮއްވާ ދުށިން. އެއްވެސް އިރެއްގައި އެ ދެ ތަރިން އެއް ވެނިޓީ ވޭން ޝެއާ އެއް ނުކުރޭ. އެހެންވީމާ އެފަދަ ކަމެއް ދިމާވާނެ ގޮތެއް ނުވިސްނޭ،" އަނުރާގު ބުންޏެވެ.
"ޖައްގާ ޖާސޫސް"ގެ ޕްރޮމޯޝަން މަސައްކަތް ފެށުމާއެކު ވެސް ފިލްމަށް ވުރެ ބޮޑަށް ގިނަ ބައެއްގެ ސަމާލުކަން ހުއްޓޭނީ ރަންބީރާއި ކެޓުރީނާގެ ޒާތީ ދިރިއުޅުމަށް ކަން އަނުރާގަށް ވިސްނެ އެވެ. އެއީ އަނުރާގް ބޭނުންވާ ގޮތަށް ނުވިޔަސް އެކަން އެހެން ވާނެކަމަށް ޑައިރެކްޓަރެއްގެ ހައިސިއްޔަތުން އޭނާ ދަނީ ތައްޔާރުވަމުންނެވެ.
މި ފިލްމު ރިލީޒްކުރަން މިހާރު ހަމަޖެހިފައިވަނީ އަންނަ އަހަރުގެ އެޕްރީލް މަހު އެވެ.