04 އެޕްރީލް 2019 - 09:24
ބޯހިޔާވަހިކަމާ ގުޅިފައި ވަނީ ޝަކުވާތަކާއި އުދާސްތަކާއި ތަކުލީފެވެ. އެއް ބައެއްގެ މުޅި ދިރިއުޅުން ހޭދަކުރަން މަޖުބޫރުވީ ކުދި ގޮޅިތަކެއްގަ އެވެ. އަމިއްލަ ބޯހިޔާވަހިކަމަކަށް އެދި ސަރުކާރުތަކުގައި އާދޭސްކުރާތާ އެތައް އަހަރެއް ވީ މީހުން ވެސް އޭގެ ތެރޭގައި ހިމެނެ އެވެ.
ފްލެޓް ދިނުމުގައި އިންސާފެއް ނޯވެ އެވެ. ނިކަމެތިންގެ ފްލެޓް ބަހައި ހުސްކުރަނީ އޭރެއްގައި އޮންނަ ސަރުކާރަކުން ބޭނުންވާ ބަޔަކަށެވެ. މި ތަކުލީފު ނިމުމަކަށް ގެންނަން އެމްޑީޕީން އެ ޕާޓީގެ "އެޖެންޑާ 19" ގައި ހިމެނީ ރައްޔިތުން ބޭނުންވި ހައްލުތަކެވެ. ބޯހިޔާވަހިކަން ކަށަވަރު ކޮށްދިނުމަކީ ފަޚުރުވެރި އާއިލާއަކަށް އެމްޑީޕީން ހުށަހަޅާ އެޖެންޑާގެ އެންމެ މުހިއްމު އެއް ވައުދެވެ.
މި ވައުދު ފުއްދުމަށް ރައްޔިތުންގެ މަޖިލީހަށް ބޯހިޔާވަހިކަން ކަށަވަރު ކުރުމާ ގުޅޭ ގާނޫނެއް ހުށަހަޅަން ވަނީ ނިންމައިފަ އެވެ. އެ ގާނޫނުގައި، ތަފާތުކުރުމެއް ނެތި ހަމަހަމަކަމާ އެކު ރައްޔިތުންނަށް ބޯހިޔާވަހިކަން ކަށަވަރު ކޮށްދިނުމުގެ އެންމެހާ ސިޔާސަތުތަކާއި ތަންފީޒީ ހަމަތަކާއި އުސޫލްތައް ކަނޑައަޅާނެ އެވެ.
އެމްޑީޕީގެ ދިރާސާ އިން ދައްކާ ގޮތުގައި، ރާއްޖޭގައި ބޯހިޔާވަހިކަން ބޭނުންވާ 40،000 މީހުން އެބަ ތިއްބެވެ.
- އެމްޑީޕީގެ ސަރުކާރުން 2010 ގައި ފެށި "ވެށިފަހި މާލެ" ޕްރޮގްރާމް އަލުން ހިންގާނެ އުސޫލް ބަޔާން ކުރާނެ.
- މާލެ އިން ލިބިފައިވާ ބިންކޮޅެއް ސަރުކާރަށް ދޫކޮށްލުމުން އޭގެ ބަދަލުގައި މާލެ ސަރަހައްދުން ގޯއްޗެއް ނުވަތަ ފްލެޓެއް ލިބޭނެ ހަމަތައް ގާނޫނުގައި ކަނޑައަޅާނެ.
- "ވެށިފަހި މާލެ" ޕްރޮގްރާމްގެ ދަށުން ބިންކޮޅެއް ދޫކޮށްލުމަށް އެއްބަސްވުމުން ހުޅުމާލެ އިން ބިމެއް ނުވަތަ ފްލެޓެއް ލިބޭނެ ކަމަށް ސަރުކާރުން ލިއުން ދީފައި ތިބި ހައްގުވެރިންނަށް ބިމެއް ނުވަތަ ފްލެޓެއް ދޫކުރަން ގާނޫނުން ލާޒިމް ކުރާނެ.
- ދިރިއުޅޭނެ އަމިއްލަ ތަނެއް ނެތް މީހުންނާއި ކުދި ފްލެޓްތަކާއި ކުދި ބިންކޮޅުގައި ދިރިއުޅޭ މީހުންނަށް ހުޅުމާލެ/ގުޅީފަޅު ނުވަތަ ތިލަފުށިން އެކަށީގެންވާ ވަރުގެ ގޯތި ދޫކުރެވޭނެ އުސޫލްތައް ގާނޫނުގައި ކަނޑައަޅާނެ.
- ބޯހިޔާވަހިކަން ބިނާކުރާނެ ތަނަވަސްކަމެއް ނެތް ފަރާތްތަކަށް ދިގު މުއްދަތުން ދައްކާ ޚަލާސްކުރާ އުސޫލުން ކުޑަ އިންޓްރެސްޓެއްގައި ލުއި ލޯނު ލިބޭނެ ގޮތް ފަހިކޮށްދޭން ގާނޫނުގައި ލާޒިމްކުރާނެ. އެ ލޯނު ދޫކުރުމުގައި މާލެ އާއި ރަށްތަކުގައި މެދުގައި ތަފާތެއް ނުކުރާނެ.
- ބިން ދަތިވެފައިވާ ރަށްރަށުގައި ބިން ހިއްކުމުގެ މަސައްކަތް ހިނގާނެ ގޮތްތަކުގެ އުސޫލް ވެސް އެ ގާނޫނުގައި ކަނޑައެޅޭނެ.
- ހުޅުމާލޭގައި މިހާރު ހިއްކާފައިވާ ބިން މާލޭގައި ދިރިއުޅޭ ރައްޔިތުންގެ ބޯހިޔާވަހިކަމަށް ފޯރުކޮށްދިނުމަށް ބޭނުންކުރާނެ އުސޫލްތައް ކަނޑައެޅޭނެ.
- ބޯހިޔާވަހިކަމަށް ޝަރުތު ހަމަވާ ގޮތް ވެސް ސާފުކޮށް ބަޔާންކުރާނެ.
- އެއްވެސް މީހަކު ބާކީ ނުވާނެ ހެން ބޯހިޔާވަހިކަން ކަށަވަރުކޮށްދޭން ރައްޔިތުންނަށް ފުރިހަމަ އަށް އިތުބާރު ކުރެވޭނެ، ދެ ފުށް ފެންނަ އުސޫލެއް، ހާމަކަން ބޮޑު ގޮތެއްގައި ހިންގުމަށް މި ގާނޫނުން ލާޒިމްކުރާނެ.
- މުޖުތަމައުގެ އާއްމު ހާލަތަށް ވުރެ ނިކަމެތި ކަމެއް ލިބިފައިވާ މީހުންނާއި ނުވަތަ އިޖުތިމާއީ ގޮތުން ޚާއްސަ ރައްކާތެރިކަމެއް ލިބިދޭން ޖެހޭ މީހުންނަށް ބޯހިޔާވަހިކަން ފޯރުކޮށްދިނުމުގައި އިސްކަމެއް ދިނުމަށް ކަނޑައަޅާނެ.
- މާލޭގެ ރަށްވެއްސަކަށް ވެ އަމިއްލަ ބޯހިޔާވަހިކަމެއް ނެތް މީހުންނަށް ބޯހިޔާވަހިކަން ފޯރުކޮށްދިނުމުގެ އުސޫލްތައް ބަޔާންކުރާނެ.
މިއީ އާންމު އިންތިހާބަށް "މިހާރު"ން ތައާރަފުކުރި ހާއްސަ ޕެކޭޖްގެ ތެރޭގައި ހިމެނޭ ކަވަރޭޖެކެވެ.