23 މާޗް 2019 - 11:05
ޕެރިސް (މާޗް 23) - އަންނަ އަހަރު ފުޓްބޯޅަ އަށް އެނބުރި އަންނާނެ ކަމަށާއި އެންމެ ބޮޑު އަމާޒަކީ ކޯޗިން ކެރިއަރު ނިންމާލުމުގެ ކުރިން ޗެމްޕިއަންސް ލީގު ތިން ވަނަ ފަހަރަށް ކާމިޔާބު ކުރަން ކަމަށް މަޝްހޫރު ކޯޗު ހޯސޭ މޮރީނިއޯ ބުނެފި އެވެ.
މިދިޔަ ޑިސެމްބަރު މަހު މެންޗެސްޓާ ޔުނައިޓެޑްގެ ކޯޗުކަމުން ވަކިކުރި ފަހުން މޮރީނިއޯ މަސައްކަތްކުރަމުން އަންނަނީ ބީން ސްޕޯޓްސްގެ ފުޓްބޯޅަ އެނަލިސްޓެއްގެ ގޮތުގަ އެވެ. ރެއާލް މެޑްރިޑާ މޮރީނިއޯ ހަވާލުވާން އުޅޭކަމުގެ އަޑުތައް ފެތުރިފައި އޮއްވައި އެ ޓީމުން އަލުން ކުރީގެ ކޯޗު ޒިނެދިން ޒިދާން ގެނައީ މޮރީނިއޯ ގެންނަން ކުޅުންތެރިން ދެކޮޅު ހެދުމުންނެވެ.
މޮރީނިއޯގެ ވިދުން އެންމެ ބޮޑަށް ގަދަވީ 2004 ވަނަ އަހަރު ޕޯޓޯއާ އެކު ޔުއެފާ ޗެމްޕިއަންސް ލީގު ކާމިޔާބު ކުރުމުންނެވެ. އޭނާ އަށް ދެ ވަނަ ފަހަރަށް އެ މުބާރާތް ކާމިޔާބުކުރެވުނީ 2010 ވަނަ އަހަރު އިންޓަ މިލާނާ އެކުގަ އެވެ. ޗެލްސީ އާއި ރެއާލް މެޑްރިޑް އަދި މެންޗެސްޓާ ޔުނައިޓެޑާ އެކު މޮރީނިއޯ އަށް އެކަން ނުކުރެވުނެވެ.
ޗެމްޕިއަންސް ލީގުގެ ތާރީހުގައި އެ މުބާރާތް ތިން ފަހަރު ކާމިޔާބުކުރީ ތިން ކޯޗުންނެވެ. އެއީ ރެއާލް މެޑްރިޑަށް ތިން ފަހަރު މުބާރަތް ކާމިޔާބުކޮށްދިން ޒައިނުއްދީން ޒިދާނާއި އޭސީ މިލާނާއި ރެއާލް މެޑްރިޑަށް މުބާރާތް ކާމިޔާބުކޮށްދިން ކާލޯ އަންޗެލޮޓީ އަދި ލިވަޕޫލަށް ތިން ފަހަރު ތަށި އުފުލައިދިން ބޮބް ޕެއިސްލީ އެވެ. މޮރީނިއޯ ބުނީ އަލުން ކޯޗިން އަށް އެނބުރި އައިސް އެންމެ ބޮޑަށް އަމާޒުހިފާނީ ޗެމްޕިއަންސް ލީގަށް ކަމަށެވެ.
"އަހަންނަށް ތިން ވަނަ ޗެމްޕިއަންސް ލީގެއް ހޯދިއްޖެނަމަ ވަރަށް ފުރިހަމަވާނެ. އަހަރެން ބޭނުމީ ވެސް އެ ލެވެލްގައި ކޯޗުކޮށްދޭން. ޗެމްޕިއަންސް ލީގަކީ އަހަރެންގެ ލެވެލް. ބައެއް ފަހަރު އެ ރޭހުން ބޭރުގައި ގިނަ ދުވަސްތަކެއް ހޭދަކުރީމަ އަލުން އެ ހިސާބަށް ދާން ފެންބޮވައިގަންނާނެ،" އޭއެފްޕީ އަށް ދިން އިންޓަވިއުއެއްގައި މޮރީނިއޯ ބުންޏެވެ.
ޕޯޗުގަލްގެ އިތުރުން މޮރީނިއޯ މީގެ ކުރިން މަސައްކަތްކުރީ އިޓަލީ އާއި އިންގްލެންޑް އަދި ސްޕެއިންގަ އެވެ. އަލުން ކުރިން ކޯޗުކަންކުރި ލީގެއްގައި ކުރުމުގެ ވިސްނުން ވެސް އެބަހުރި ކަމަށާއި އެކަމަކު އާ ޗެލެންޖެއް ނަގައި މުޅިން އެހެން ލީގެއްގައި ވެސް މަސައްކަތްކުރެވިދާނެ ކަމަށް މޮރީނިއޯ ވަނީ ބުނެފަ އެވެ.
"އަހަރެން މަސައްކަތްކުރި ކޮންމެ ގައުމެއްގައި ވެސް ކުރީ ވަރަށް ކުރާހިތުން. އެހެންވީމަ އަލުން އެނބުރި އެ ގައުމަަކަށްދާން ވެސް މައްސަލައެއް ނެތް. އެކަމަކު ފުޓްބޯޅައިގައި އަހަރެން އަބަދުވެސް އާ ޗެލެންޖުތަކަށް މަރުހަބާ ކިޔަން،" މި ސީޒަނަށް ފަހު ޕީއެސްޖީއާ ހަވާލުވެދާނެތޯ ކުރި ސުވާލަށް މޮރީނިއޯ ޖަވާބުދިނެވެ.
މި ފަހަރުގެ ޗެމްޕިއަންސް ލީގުގެ ކުއާޓާ ފައިނަލުގައި އިނގިރޭސި ހަތަރު ޓީމެއް ހިމެނުމަކީ އެ ލީގުގެ ވަރުގަދަކަން ފެނިގެންދާ ކަމެއް ކަމަށާއި ޕްރިމިއާ ލީގުގެ ހައިބަތު ހިފެހެއްޓެނީ މާކެޓް ކުރުމާއި އެ ހުރިހާ ކަމެއް އެންމެ ޕްރޮފެޝަނަލްކޮށް ދާތީ ކަމަށް މޮރީނިއޯ ވަނީ ބުނެފަ އެވެ.