22 މާޗް 2019 - 07:02
ނިއުޔޯކް، ޔުނައިޓެޑް ސްޓޭޓްސް (މާޗް 22) - ރޭޕުގެ ތުހުމަތުތަކެއް ކުރެވިފައިވާތީ ކްރިސްޓިއާނޯ ރޮނާލްޑޯ އަށް އެމެރިކާ އަށް އެތެރެވުމުގައި ދަތިތަކެއް ކުރިމަތިވުމުގެ ފުރުސަތު އޮތުމުން ޕްރީ ސީޒަނުގައި ކުޅޭ އިންޓަނޭޝަނަލް ޗެމްޕިއަންސް ކަޕް (އައިސީސީ)ގައި ޔުވެންޓަސް ބައިވެރިވާނީ އޭޝިއާގައި ކުޅޭ މުބާރާތުގައި ކަމަށް ރިޕޯޓްތައް ބުނެފި އެވެ.
މިދިޔަ އަހަރު އެމެރިކާގެ ފުލުހުން ވަނީ، ރޮނާލްޑޯގެ މައްޗަށް އެމެރިކާގެ ކުރީގެ މޮޑެލް ކެތަރިން މަޔޯގާ ކުރި ރޭޕުގެ ތުހުމަތުގެ ތަހުގީގު އަލުން ފަށާފައިވާ ކަމަށް ބުނެފަ އެވެ. ލަސް ވެގަސްގެ ހޮޓަލެއްގައި 2009 ވަނަ އަހަރުގެ ޖޫން މަހު އޭނާ ރޭޕްކުރި ކަމަށް މަޔޯގާ ކުރާ ތުހުމަތުތައް ރޮނާލްޑޯ ވަނީ ދޮގުކޮށްފަ އެވެ.
މަޔޯގާ ބުނީ ރޭޕުގެ ވާހަކަތައް ސިއްރުކުރަން އޭނާ ލައްވައި 2010 ވަނަ އަހަރު މަޖުބޫރުން ސޮއިކުރުވާފައިވާ ކަމަށެވެ. އަދި ރޮނާލްޑޯ ވަނީ އެ ވާހަކަތައް ނުދެއްކުމަށް ޝަރުތުކޮށް 375،000 ޑޮލަރު ދީފައި ކަމަށެވެ. އެކަމަކު މަޔޯގާގެ ވަކީލުންގެ ޓީމުން ވަނީ އެއީ ސައްހަ އެއްބަސްވުމެއްގައި ނުބަލާ ކަމަށް ބުނެފަ އެވެ.
އެ ތުހުމަތުތަކަށް އުމުރުން 34 އަހަރުގެ ރޮނާލްޑޯ އިންކާރުކުރާއިރު، އޭނާގެ ދިފާއުގައި ގިނަ ބަޔަކު އަންނަނީ ވާހަކަ ދައްކަމުންނެވެ. އެކަމަކު ދާދި ފަހުން މިދިޔަ ޖެނުއަރީ މަހު 10 ވަނަ ދުވަހު ލަސް ވޭގަސް ޕޮލިހުން ވަނީ މަޔޯގާގެ ހެދުމުން ފެނުނު ޑީއެންއޭ އާއި ރޮނާލްޑޯއާ ދިމާވޭތޯ ބަލަން ބޭނުންވާ ކަމަށް ބުނެފަ އެވެ. އަދި ރޮނާލްޑޯގެ ޑީއެންއޭ ހޯދުމުގެ ކަންތައް މަގުފަހުކޮށްދިނުމަށް އިޓަލީ ކޯޓުތަކަށް ވެސް ވަނީ ލިޔުން ފޮނުވައިފަ އެވެ.
ރިޕޯޓްތައް ބުނާގޮތުން މި ހުރިހާ ކަމެއް މި ގޮތަށް އޮތުމުން އިންޓަނޭޝަނަލް ޗެމްޕިއަންސް ކަޕް (އައިސީސީ) ހިންގާ ފަރާތްތަކުން ވަނީ ޔުވެންޓަސް ކުޅޭ ސަރަހައްދު ބަދަލުކުރަން ނިންމައިފަ އެވެ. އަދި ރަސްމީކޮށް އެކަން ވަރަށް އަވަހަށް ޔުވެންޓަސް އަށް އަންގާނެ އެވެ. އެ ގޮތުން ޔުވެންޓަސް ކުޅޭނީ އޭޝިއާގެ ސިންގަޕޫރު ނޫނީ ޗައިނާގައި ކުރިއަށްދާ މުބާރާތުގަ އެވެ.
ނިއުޔޯކް ޓައިމްސް އަށް އައިސީސީގެ އިންތިޒާމް ކޮމިޓީގެ މެމްބަރަކު ދިން އިންޓަވިއުއެއްގައި ބުނީ މުބާރާތް އެންމެ ފުރިހަމަ އަށް ކުރިއަށްގެންދެވޭނެ މާހައުލެއް ގާއިމްކުރަން ބޭނުންވާ ކަމަށާއި އެ ގޮތަށް ގެންދަން ބަލާއިރު މި ވަގުތު ރޮނާލްޑޯ އަށް އެމެރިކާ އަށް އެތެރެވުމަކީ ފަސޭހަކަމެއް ނޫން ކަމަށާއި އެހެންވެ ރޮނާލްޑޯ އަށް ކުޅެވޭ ގޮތަށް ހެދުމުގެ ގޮތުން ބަދަލުތަކެއް ގެންނަން ބަލަމުން އަންނަ ކަމަށެވެ.
މި ސީޒަނުގައި ޔުވެންޓަސް އަށް ބަދަލުވުމަށް ފަހު ރޮނާލްޑޯ އަންނަނީ އެ ޓީމުގައި މޮޅު ކުޅުމެއް ދައްކަމުންނެވެ.