21 މާޗް 2019 - 11:51
ރައްޔިތުންގެ މަޖިލީހުގައި، މަހިބަދޫ ދާއިރާގެ އަޑު އިއްވައި، އަސާސީ ހައްގުތައް ހޯދައިދީ ތަރައްގީގެ ރޮނގުން އެ ދާއިރާ އަށް ނަތީޖާ ނެރެދެއްވާނެ ކަމަށް ސަރުކާރުގެ ތާއީދުއޮތް ކެންޑިޑޭޓުގެ ގޮތުގައި އެ ދާއިރާ އަށް ވާދަ ކުރައްވާ އަލީ އާޒިމް ވިދާޅުވެއްޖެ އެވެ.
ސަރުކާރު ކޯލިޝަންގައި ހިމެނޭ މައި ޕާޓީ، އެމްޑީޕީން ވެސް އެ ދާއިރާ އަށް ވާދަކުރަން ނިންމައި ކެންޑިޑޭޓަކު ވެސް ނެރުނެވެ. އެކަމަކު، އެ ޕާޓީގެ ކެންޑިޑޭޓުގެ ނަން ނަގައި، ސަރުކާރު ކެންޑިޑޭޓެއްގެ ގޮތުގައި އާޒިމަށް ތާއީދު ކުރަން ވަނީ ނިންމައިފަ އެވެ.
އާޒިމް ވިދާޅުވީ މަހިބަދޫ ހިމެނޭ ގޮތުން އެ ދާއިރާގެ ހަންޏާމީދު އާއި ކުނބުރުދޫ އޮތީ އަޅާނުލައި އެކަހެރި ކޮށްފައި ކަމަށެވެ. ނަތީޖާ އަކީ އަސާސީ ހައްގުތަކުން ރައްޔިތުން މަހްރޫމްވެ، އެތައް ތަކުލީފެއް ދާއިރާގެ ރައްޔިތުން މިހާރު ވެސް ތަހައްމަލް ކުރަން ޖެހުން ކަމަށް ވިދާޅުވި އެވެ.
"ބަދަލު ކުރަން މި ޖެހެނީ އެ ހާލަތު. ސަރުކާރުގެ ކެންޑިޑޭޓެއްގެ ގޮތުގައި އަޅުގަނޑު ނުކުމެ މިހިރީ ސަރުކާރާ ގުޅިގެން ރައްޔިތުންގެ ބޭނުންތައް ފުއްދައިދޭން. އަސާސީ ބޭނުންތައް ފުދިގެން، ހިތްހަމަޖެހުމާ އެކު ދިރިއުޅޭވޭނެ ގޮތެއް ހޯދައިދޭން. އެ ބަދަލު ގެނެވޭނެ ކަމުގެ ޔަގީންކަން އެބައޮތް. ސަރުކާރުގެ ފުރިހަމަ ތާއީދު އަޅުގަނޑަށް އެބައޮތް،" އާޒިމް ވިދާޅުވި އެވެ.
އޭނާ ވިދާޅުވި ގޮތުގައި މަހިބަދު އާއި ކުނބުރުދޫ ތޮއްޖެހި، އާއިލާތަކަށް ދަތިތަކަކާ ވަނީ ކުރިމަތިލާން ޖެހިފަ އެވެ. އެއާއެކު، ހަންޏާމީދޫގައި ރައްޔިތުން ފެންވަރަން ޖެހެނީ ނަޖިސް ފެނުން ކަމަށް ވިދާޅުވި އެވެ.
އެއީ، ދުވަސްތަކެއް ވަންދެން ރައްޔިތުން ތަކުލީފު އުފުލާފައިވާ މިހާރުން މިހާރަށް ވެސް އަވަސް ހައްލުތަކެއް ހޯދަން ޖެހޭ މައްސަލަތަކެއް ކަން ފާހަގަކުރެއްވި އެވެ.
"މަހިބަދޫގެ ބިން ހިއްކުމަކީ އިރާދަކުރެއްވިއްޔާ އަޅުގަނޑު ކޮށްދޭނެ ކަމެއް. ހަމައެއާ އެކު ކުނބުރުދޫގެ ބިމުގެ ދަތިކަން ވެސް ހައްލުކޮށްދޭނަން. ހަންޏާމީދު އާއި ކުނބުރުދޫގެ ފެނާއި ނަރުދާމާގެ ނިޒާމް ވެސް ފުރިހަމަކުރަން ޖެހޭ،" އާޒިމް ވިދާޅުވި އެވެ.
"ކުރިއަށް އޮތް ފަސް އަހަރުގެ ތެރޭގައި އެ ކަންކަމަށް ހައްލު ހޯދޭނެ ކެންޑިޑޭޓަކީ އަޅުގަނޑު."
މީގެއިތުރުން، ގެދޮރު އިމާރާތް ކުރާ ފަރާތްތަކަށް އިސްލާމިކް ލޯން ލިބޭނެ ގޮތްތަކެއް ހަމަޖައްސައިދޭން މަސައްކަތް ކުރުމާއި ޓޫރިޒަމްގެ އިސް މަގާމްތަކުގައި މަސައްކަތް ކުރަން ދިވެހިންނަށް ހުރި ހުރަސްތައް ނައްތާލުމާއި އެ މީހަކު ދިރިއުޅޭ ރަށް ކައިރިން ވަޒީފާއެއް ހަމަޖެހޭނެ އިންތިޒާމާއި ކައުންސިލްތަކަށް ބާރުދިނުމަށް މަސައްކަތް ކުރުމަކީ ވެސް އޭނާގެ މެނިފެސްޓޯގައި ހިމެނޭ ކަންކަމެވެ.
ގާނޫނު ހަދާ މަޖިލީހުގައި ތިއްބަން ޖެހޭނީ އެ ދާއިރާގެ އިލްމު ހުރި ގާބިލް ބައެއް ކަން ފާހަގަކުރައްވައި އާޒިމް ވިދާޅުވީ އެ ދާއިރާ އަށް ކުރިއެރުމާއި ފާގަތި މުސްތަގުބަލެއް އޮތީ، އޭނާ އެކު ކުރިއަށް ދިއުމުގެ ވިސްނުން ރައްޔިތުން ކުރިއަށް ނެރެގެން ކަމަށެވެ.
އިނގިރޭސިވިލާތުގެ ކިންގްސްޓަން ޔުނިވާސިޓީން ވިޔަފާރިއާ ގުޅޭ ގާނޫނުން މާސްޓާސް ޑިގްރީ ހާސިލްކުރައްވާފައިވާ އާޒިމް ވަނީ ސަރުކާރުގެ ގިނަ ވަޒީފާތަކެއް އަދާކުރައްވައިފަ އެވެ. އެންޓި ކޮރަޕްޝަން ކޮމިޝަންގައި ކޮރަޕްޝަނާ ދެކޮޅަށް މަސައްކަތް ކުރައްވައި އެޓާނީ ޖެނެރަލް އޮފީހުގައި ވެސް ޚިދުމަތް ކުރައްވާފައިވާ އާޒިމް ވިދާޅުވި ގޮތުގައި، އޭނާ ވެވަޑައިގަންނަވާނީ ނަޒާހަތްތެރި، މަޖިލީހުގައި ނަމޫނާ ނެރެދެއްވާނެ މެމްބަރަކަށެވެ.
"އެކަން ހާސިލްކުރެވެން އޮތީ، މަހިބަދޫ ދާއިރާގެ ރައްޔިތުން އަޅުގަނޑާ އެކު ތިއްބަވައިގެން. ކެންޑިޑޭޓް ނަމްބަރު 3 އަށް ވޯޓު ދެއްވައިގެން،" އާޒިމް ވިދާޅުވި އެވެ.
މިއީ އާންމު އިންތިހާބަށް "މިހާރު"ން ތައާރަފުކުރި ހާއްސަ ޕަކޭޖްގެ ތެރޭގައި ހިމެނޭ ކަވަރޭޖެކެވެ.