19 މާޗް 2019 - 12:46
ޗައިނާގެ ކުންފުންޏެއްގެ އިޖްތިމާއީ ޒިންމާގެ ދަށުން، ގައުމީ ޓޭބަލް ޓެނިސް ހޯލަށް ޖާގަ އާއި ވަސީލަތްތަކުން ބަދަލު ގެނެސް އަލުން އިއްޔެ ހުޅުވައި، އިންޑިއަން އޯޝަން އައިލެންޑް ގޭމްސް (އައިއޯއައިޖީ) ތަމްރީންތައް ފަށައިފި އެވެ.
މުނިއުފާ ޔޫތު ސެންޓަރުގެ ހޯލަށް ގެނައި ބަދަލުތަކުގެ ތެރޭގައި އެއާ ކޮންޑިޝަންކުރުމާއި ޖުމްލަ ފަސް މޭޒު ބެހެއްޓޭ ވަރަށް ޖާގަ ބޮޑުކުރުން ހިމެނެ އެވެ. އެހެންވެ އެތަނުގައި ކުދިކުދި މުބާރާތްތަކާއި ގައުމީ ޓީމާއި ޔޫތު ޑިވެލޮޕްމަންޓް ޕްރޮގްރާމުގެ ތަމްރީންތައް ބޭއްވޭނެ އެވެ.
އެކަމަކު އެތަނުގައި އަދިވެސް އެންމެ އެކަށީގެންވާ ޖާގަ ނެތުމާއި އަދި ސީލިންކޮށްފައިވާލެއް ތިރިކަމުން، ގައުމީ ފެންވަރުގެ މުބާރާތްތަކާއި އިންޓަ ސްކޫލް މުބާރާތް ބާއްވަން ދާން ޖެހޭނީ ސޯޝަލް ސެންޓަރަށެވެ.
ހަގީގަތުގައި މުނިއުފާ ސެންޓަރަކީ ވަގުތީ ގޮތުން ޓީޓީ އަށް ދީފައިވާތަނެކެވެ. ޒަމާނުއްސުރެ ޓީޓީން ބޭނުންކުރަމުން އައި އެކުވެނި އިންޑޯ ބާވެ އެތަން ބޭނުންކުރުމުން 2014 ގައި މަނާކުރުމާ އެކު ދެން ޓީޓީން ބަދަލުވީ ސޯޝަލް ސެންޓަރުގައި ހެދި އިންޑޯ ކޯޓަކަށެވެ. އެކަމަކު ރަސްފަންނުގައި ކޮރަލް ބްލެވާޑް ފްލެޓް އަޅަން ޒުވާނުންގެ މަރުކަޒުގެ އެ ސަރަހައްދު ބޭނުންވާތީ އެތަނުން ނުކުންނަން ޖެހުނީ އެވެ. އަދި ކޮރަލް ބްލެވާޑް ފްލެޓް އަޅާ ފަރާތުން، ބަދަލުގައި ޓީޓީ އަށް ހަ މަސް ތެރޭ ތަނެއް ހަމަޖައްސައިދޭނެ ކަމަށް އޭރުގެ ސަރުކާރުން ބުނި ނަމަވެސް، މުނިއުފާ ހަމަޖައްސައިދިނުމަށް ފަހު ހަބަރެއް ނުވެ އޮތީ އެވެ.
މުނިއުފާ ސެންޓަރުގެ ފުރާޅުން ފެން ލީކުވުމާއި މަދިރި ގިނަކަމުން އަދި ތަޅުން އަޅާފައި އޮތް ތަނަކަށް ވާތީ އެތަނުގައި، މުބާރާތް ބޭއްވުން އެއްކިބައިގައި އޮއްވާ ޕްރެކްޓިސް ކުރުމަކީ ވެސް އިންތިހާ އަށް ދަތިކަމެކެވެ.
ރާއްޖޭގައި ޕްރޮޖެކްޓްތަކެއް ހިންގަމުން އަންނަ ޗައިނާ މެޝިނަރީ އިންޖިނިއަރިން ކޯޕަރޭޝަން މެދުވެރިކޮށް ތަން މަރާމާތުކުރުމުގެ ފުރުސަތު ހޯއްދަވައިދެއްވީ ޓީޓީ އެސޯސިއޭޝަނުގެ ކުރީގެ ރައީސް ސީވީޑް އަހުމަދު ލަތީފެވެ. އެ މަސައްކަތުގެ އެއްކޮޅުގައި ސްޕޯޓްސް މިނިސްޓްރީން ވެސް ހިފި އެވެ.
ޓީޓީ އެސޯސިއޭޝަނުގެ ޖެނެރަލް ސެކްރެޓަރީ އިސްމާއިލް ސުޖާއު ވިދާޅުވީ ޓީޓީ އަށް ބޭނުންވަނީ ދާއިމީ، ފެންވަރު ރަނގަޅު ހޯލެއް ކަމަށާއި އެކަމަކު މި ގެނައި ބަދަލުތަކާ އެކު މިވަގުތަށް މި ލިބުނީ ރަނގަޅު ހައްލެއް ކަމަށެވެ. އެހެންވެ ޖުލައި މަހު އޮންނަ އިންޑިއަން އޯޝަން އައިލެންޑް ގޭމްސް އަށް ވަގުތުން ވަގުތަށް ރޭ ޕްރެކްޓިސް ފަށައި ދުވާލަކު ތިން ސެޝަން ކުރިއަށްދާނެ ކަމަށް ކަމަށް އޭނާ ވިދާޅުވި އެވެ.
މިދިޔަ ހަފުތާގައި ނިމުނު ގައުމީ މުބާރަތް މޯބަތީގައި އޮއްވާ ވެސް ސެންޓަރު ބަންދުކޮށް މަރާމާތުކުރުމުގެ މަސައްކަތް ވީހާ ވެސް އަވަހަކަށް ފެށީ ވެސް މި އަހަރު އިންޑިއަން އޯޝަން އައިލެންޑް ގޭމްސް އާއި ސައުތު އޭޝިއަން ގޭމްސް އޮތުމުން ކުރިއާލާ ތައްޔާރުވުމުގެ ފުރުސަތު ހޯދުމަށެވެ. އެއީ އެސޯސިއޭޝަނުން ކާމިޔާބީ ހޯދަން ވަރަށް ބޮޑަށް ޓާގެޓްކޮށްފައިވާ ދެ މުބާރާތެވެ.
ރާއްޖޭގައި ކުޅެވޭ އިންޑިވިޖުއަލް ކުޅިވަރުތަކުގެ ތެރެއިން އެންމެ ރަނގަޅު ނަތީޖާ ހޯދަމުން އަންނަ އެއް ކުޅިވަރަށް، ރަނގަޅު ފެންވަރުގެ، ދާއިމީ ވެނިއުއެއް ނެތުމަކީ ބޮޑު މައްސަލައެއް ކަމަށް ކުޅިވަރުގެ ތަޖުރިބާކާރުން ދެކެ އެވެ. ރާއްޖޭގައި އެއްވެސް ކުޅިވަރެއްގައި މިވަގުތު ތިބި އެންމެ އުއްމީދީ ޖޫނިއާ ދެ ކުޅުންތެރިން ވެސް ތިބީ ޓީޓީގަ އެވެ. އެގޮތުން ސްރީ ލަންކާގައި ކުޅެ އެތައް ކާމިޔާބީތަކެއް ހޯދާފައިވާ ފާތިމަތު ދީމާ އަލީ އާއި ރަފާ ނާޒިމަކީ މި ސަހަރައްދުން ކުރިމަގުގައި މެޑަލް ހޯދާނެ ކަމަށް ބެލެވޭ ދެ ކުޅުންތެރިންނެވެ.