25 އޯގަސްޓް 2016 - 23:06
އުރީދޫން ކުރިއަށް ގެންދާ ސްޕޯޓް ފްރެންޒީ ކުއިޒްގައި މިދިޔަ މަހު އެންމެ ގިނަ ޕޮއިންޓް ހޯދި މީހާއަށް ހޮންޑާ ސްކޫޕީ އައި ކްލަބް ސައިކަލެއް މިއަދު ހަވާލުކޮށްފި އެވެ.
އުރީދޫން ބުނީ މިދިޔަ ޖުލައި މަހުން ފެށިގެން ކުރިޔަށް ގެންދާ އެ މުބާރާތުގައި 400،000ރ. ގެ އަގުހުރި އިނާމުތަކެއް ލިބިގެންދާ ކަމަށެވެ. އަދި އެ މުބާރާތް މި އަހަރުގެ އޮކްޓޯބަރު މަހާ ހަމައަށް ކުރިއަށް ގެންދާނެ ކަމަށް ވެސް އެ ކުންފުނިން ބުންޏެވެ.
އުރީދޫން ބުނީ އެސްއެމްއެސް މެދުވެރިކޮށް ބައިވެރިވެވޭ ކުއިޒުން ކޮންމެ ދުވަހަކު ވެސް އެންމެ ގިނަ ޕޮއިންޓް ހޯދާ ފަސް ބައިވެރިންނަށް 500 އެމްބީގެ ޑޭޓާ ލިބޭނެ ކަމަށެވެ. އަދި ކޮންމެ ހަޕްތާއެއްގައި ވެސް އެންމެ ގިނަ ޕޮއިންޓް ހޯދާ ދެ ނަސީބުވެރިންނަށް އައިފޯން އެސްސީ ލިބޭއިރު، އަށް މީހަކަށް މިހާތަނަށް އައިފޯނު ދީފައިވާ ކަމަށް ވެސް އުރީދޫން ބުންޏެވެ. އޭގެ އިތުރުން މުޅި ޕްރޮމޯޝަންގެ ތެރޭގައި 24 ބޭފުޅުންނަށް ފޯނު ދޭ ގޮތަށް ވެސް އުރީދޫން ވަނީ ހަމަޖައްސައިފަ އެވެ.
އެ ކުންފުނިން ބުނީ ތިންމަސް ދުވަހަށް ކުރިއަށް ގެންދާ ކުއިޒްގައި މި މަހާ އެއްގޮތަށް ކޮންމެ މަހަކު ވެސް އެންމެ ގިނަ ޕޮއިންޓް ހޯދާ ބައިވެރިޔާއަށް ހޮންޑާ ސްކޫޕީ އައި ކްލަބް ސައިކަލެއް ލިބޭނެ ކަމަށެވެ.
"ސްޕޯޓް ފްރެންޒީ އިން ކޮންމެ މަހަކު ހުށައަޅާ އިނާމު ހައްގުވި ބައިވެރިޔާއަށް މަރުޙަބާ ދަންނަވަން. އުރީދޫގެ ކަސްޓަމަރުންގެ ފަރާތުން މި ކުއިޒްއަށް ހޫނު ތަރުހީބެއް ލިބިފައިވުމީ އަޅުގަނޑުމެންނަށް ލިބޭ އުފަލެއް. މިގޮތުން އަޅުގަނޑުމެންގެ ކަސްޓަމަރުންނަށް ކަމުދާ އަދި ފައިދާކުރާނެ ގިނަ ޕްރޮމޯޝަންތަކެއް ކުރިއަށް އޮތްތަނުގައި ވެސް ފެނިގެންދާނެ." އުރީދޫގެ އެސިސްޓަންޓް މެނޭޖަރު ޕަބްލިކް ރިލޭޝަންސް، ނޫރާ އިބްރާހިމް ޒާހިރު ވިދާޅުވި އެވެ.
ކުއިޒްގައި ބައިވެރިވުމަށް ކަސްޓަމަރުން 4242 އަށް ‘GO’ ޖަހާފައި ފޮނުވަން ޖެހެ އެވެ.
ސްޕޯޓް ޕްރެންޒީއާ ބެހޭ އިތުރު މައުލޫމާތު، ‘HELP’ ޖަހާފައި 4242 އަށް އެސްއެމްއެސް ކުރުމުން ލިބޭނެ ކަމަށް އުރީދޫން ބުންޏެވެ.