27 މެއި 2016 - 21:03
ނިއު ދިއްލީ (މެއި 27) - އިންޑިއާގައި ވިހޭ ތުއްތު ކުއްޖެއްގެ ބަރުދަނުގައި 15 ރާތާ (6.8 ކިލޯ) ހުރުމުން ޑޮކްޓަރުންނަށް ވެސް ވަނީ ބޮޑު ހައިރާން ކަމެއް ލިބިފަ އެވެ. އަދި މިއީ އިންޑިއާގައި އުފަންވި އެންމެ ބަރު ކުއްޖާ އަށް ވެދާނެ ކަމަށް ޑޮކްޓަރުން ވަނީ ބުނެފަ އެވެ.
އިންޑިއާގައި އާއްމުކޮށް ވިހާ ކުދިންގެ ބަރުދަނުގައި ހުންނަނީ 2.5-3.5 ކިލޯ އެވެ. އެހެންކަމުން އެ ކުއްޖާގެ ބަރުދަން ހަ މަހުގެ ކުއްޖެއްގެ ބަރުދަނާ އެއްވަރެވެ. ކުއްޖާ ބަރުވުމުގެ އިތުރުން އެ ކުއްޖާއަކީ އާދަޔާޚިލާފަށް ދިގު ކުއްޖެއް ކަމަށް ވެސް ޑޮކްޓަރުން ބުނެފައިވެ އެވެ. ކުއްޖާ ވިހޭ އިރު އިސްކޮޅުގައި 62 ސެންޓިމީޓަރު (24.1 އިންޗި) ހުއްޓެވެ. އިންޑިއާގައި ވިހާ ކުދިންގެ އެވްރެޖް އިސްކޮޅަކީ 50 ސެންޓި މީޓަރެވެ.
ދެކުނުގެ ސްޓޭޓް ކަރުނާޓަކާގެ ހޮސްޕިޓަލަކުން މި ކުއްޖާގެ މަންމަ އުމުރުން 20 އަހަރުގެ ނަންދިނީގެ ބަނޑުން ކުއްޖާ ނެގީ ސިޒޭރިއަން ހަދައިގެންނެވެ. ޑޮކްޓަރުން ބުނަނީ މި ކުއްޖާ މިހާ ބަރުވި ސަބަބެއް ހޯދުމަށް ޓެސްޓްތައް ހަދަމުންދާ ކަމަށެވެ.
"މިއީ އިންޑިއާގައި ވިހޭ އެންމެ ބަރު ކުއްޖާއޭ ބުނެވިދާނެ. އެކަމަކު މިއީ ދުނިޔޭގައި ވިހޭ އެންމެ ބަރު ކުއްޖާއޭ ބުނާކަށް ނުކެރޭނެ،" ކުއްޖާ ވިހޭ އަވަށުގެ ހެލްތު އޮފިސަރު ޑރ. ވެންޓަކޭޝް އާރު. ބުންޏެވެ.
މިހާ ތަނަށް އިންޑިއާގައި ވިހޭ އެންމެ ބަރު ކުއްޖާގެ ބަރުދަނުގައި ހުރީ 14.77 ރާތާ (6.7 ކިލޯ) އެވެ. އުއްތަރަ ޕްރަދޭޝްގައި އެ ކުއްޖާ ވިހެއީ މިދިޔަ އަހަރުގެ ނޮވެމްބަރު މަހު އެވެ. ދުނިޔޭގައި މިހާތަނަށް ވިހޭ އެންމެ ބަރު ކުއްޖާގެ ބަރުދަނަކީ 22 ރާތާ (10.2 ކިލޯ) އެވެ. އިޓަލީގައި އެ ކުއްޖާ އުފަންވެފައި ވަނީ ސެޕްޓެމްބަރު 1955 ގަ އެވެ.