05 ފެބުރުއަރީ 2019 - 13:13
ރައްޔިތުންގެ މަޖިލީހުގެ އިންތިޚާބުގައި އެމްޑީޕީ އާއި އަދާލަތުން އެކުގައި ވާދަކުރެވޭނެ ގޮތެއް ހޯދަން، އެމްޑީޕީން ހަ ދާއިރާއެއް ދޫކޮށްލުމުގެ މަޝްވަރާތައް ފަށައިފި އެވެ.
މަޖިލީސް އިންތިޚާބުގައި ގުޅިގެން ވާދަކުރަން ސަރުކާރު ކޯލިޝަނުން ވީ އެއްބަސްވުމާ މެދު ހިޔާލުތަފާތުވެ، ވަކިވަކިން ވާދަކުރަން ނިންމާފައި ވަނިކޮށް އަދާލަތުން ވަނީ އެމްޑީޕީ އަށް ހުށަހެޅުމެއް ހުށަހަޅައިފަ އެވެ. އެއީ، ދެ ޕާޓީން ވެސް ބައެއް ދާއިރާތަކުގައި ދޫ ދީގެން، އެކުގައި ވާދަކޮށް، ސަރުކާރު ކޯލިޝަނަށް އަޣުލަބިއްޔަތު ހޯދައި ދިނުމެވެ.
އެ ހުށަހެޅުމާ ގުޅޭ ގޮތުން އެމްޑީޕީގެ ގައުމީ މަޖިލީހުގެ ނުރަސްމީ ބައްދަލުވުމެއް މާބްލް ހޮޓަލުގައި މިއަދު ވަނީ ބާއްވައިފަ އެވެ.
ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ރިޔާސަތު ބެލެހެއްޓެވި ބައްދަލުވުމުގައި، އަދާލަތުގެ ހުށަހެޅުމާ މެދު ވަނީ ގައުމީ މަޖިލީސް މެމްބަރުންގެ ހިޔާލު ހޯދައިފަ އެވެ. އެ ބައްދަލުވުމުގައި މަޝްވަރާ ކުރީ، މަޖިލީސް އިންތިހާބަށް ޓިކެޓް ދީފައި ވިޔަސް ބައެއް ދާއިރާތައް އަދާލަތަށް ދޫކޮށްލުމަށެވެ.
އެނގިފައިވާ ގޮތުގައި، އޭގެތެރޭގައި ވައިކަރަދޫ ދައިރާ އާއި މަކުނުދޫ ދާއިރާ އާއި ކާށިދޫ ދާއިރާ ހިމެނެ އެވެ.
ގައުމީ މަޖިލީހުގެ ނުރަސްމީ ބައްދަލުވުމުގައި މި މަޝްވަރާތައް ކުރިއިރު، އެމްޑީޕީން ވަނީ 86 ދާއިރާ އަށް ވާދަކުރަން ނިންމައި ޓިކެޓް ވެސް ހަވާލުކޮށްފަ އެވެ. އެހެންކަމުން އަދާލަތަށް ގޮނޑިތައް ދޫކޮށްލުމާ މެދު ގޮތެއް ނިންމާނީ އެ ޕާޓީގެ ގައުމީ މަޖިލީހުންނެވެ.