07 ފެބުރުއަރީ 2019 - 08:24
ސްޓާ ޕްލަސް އިން މިހާރު ގެނެސްދޭ އެންމެ ދުވަސްވީ ސިލްސިލާ ކަމަށްވާ "ޔޭ ރިޝްތާ ކިޔާ ކެހެލާތާ ހޭ" ގެ ސްޕިން-އޯފެއް ގެނެސް ދޭން ނިންމައިފި އެވެ.
މިކަން ކަށަވަރުކޮށް ދެމުން ޕްރޮޑިއުސަރު ރަޖަން ޝާހީ ބުނީ ބެލުންތެރިންގެ މަގުބޫލުކަން ވަރަށް ބޮޑަށް ހޯދާފައިވާ އަދި ދައްކާތާ މިހާރު 10 އަހަރުވެފައިވާ ސިލްސިލާން އިން ކުރި ފަޅުވައިގެން ހަދާ ސިލްސިލާގެ މަސައްކަތް މާ ލަސްތަކެއް ނުވެ ފަށާނެ ކަމަށެވެ.
އޭނާ ބުނި ގޮތުގައި "ޔޭ ރިޝްތާ ކިޔާ ކެހެލާތާ ހޭ" ގެ ވާހަކަ އާ ގޮތަކަށް ގެނެސްދޭ އިރު، މިހާރު ދައްކާ ސިލްސިލާގައި ހުރި ބައެއް ކެރެކްޓާތަކަކީ އިތުރަށް ތަރައްގީކޮށް ޝައުގުވެރި ކުރެވިދާނެ ކަހަލަ ކެރެކްތާތަކެވެ. އެހެންވެ ބެލުންތެރިން ވަރަށް ޝައުގުވެރިވާ ކަހަލަ އެއްޗަކަށް އައު ސިލްސިލާ ވެސް ހަދާނެ ކަމަށް ބުންޏެވެ.
ރަޖަން ބުނި ގޮތުގައި މީގެ ނަން ވެސް މާ ލަސްތަކެއް ނުވެ އިއުލާން ކުރާނެ އެވެ. އަދި ސިލްސިލާގެ ލީޑް ބަތަލުގެ ރޯލު ވަނީ ދާދި ފަހުން ކަލާޒުން ނިންމައިލި ތާރީހީ ސިލްސިލާ "ދާސްތާނޭ މުހައްބަތު: ސަލީމް އަނާރްކަލީ" ގެ ތަރި ޝަހީރް ޝެއިހަށް ހުށަހަޅައިފަ އެވެ.
ރަޖަން ބުނީ، ޝަހީރު، 34، ފެނިގެން ދާނީ ވަރަށް ވެސް ތަފާތު ގޮތަކަށް ކަމަށެވެ. "ޔޭ ރިޝްތާ ކިޔާ ކެހެލާތާ ހޭ" ގެ ސްޕިން-އޯފުން ފުރުސަތު ލިބުނުކަން ޔަގީންކޮށް ދިނުމަށް ފަހު، މި ވަގުތު ކަޝްމީރުގައި ހުރި ޝަހީރު ބުނީ އޭނާ މިހާރު ހުރީ އޭގެ މަސައްކަތް ފަށަން ކެތްމަދުވެފައި ކަމަށެވެ.
"ޔޭ ރިޝްތާ ކިޔާ ކެހެލާތާ ހޭ" ސްޓާ ޕްލަސް އިން ދައްކަން ފެށީ ޖެނުއަރީ، 12، 2009 ގަ އެވެ. މި ސިލްސިލާގެ 2،800 އަށް ވުރެ ގިނަ އެޕިސޯޑް މިހާތަނަށް ގެނެސް ދީފައިވެ އެވެ.
ކުރިން އެ ސިލްސިލާގައި ލީޑް ރޯލް ކުޅުނު ހީނާ ހާން (އަކްޝަރާ) އާއި ކަރަން މެހެރާ (ނައިތިކް) 2015 ގައި "ޔޭ ރިޝްތާ ކިޔާ ކެހެލާތާ ހޭ" އިން ވަކުވެފައިވާ އިރު، މިހާރު އޭގެ ލީޑް ތަރިންނަކީ ޝިވާންގީ ޖޯޝީ (ނައިރާ) އާއި މުހްސިން ހާން (ކާތިކް) އެވެ.
ސްޓާ ޕްލަސް އިން މިހާރު އަންނަނީ ކުރިން ގެނެސް ދިން ސިލްސިލާ "ކަސޯޓީ ޒިންދަގީ ކޭ" ގެ އައު ސީޒަނެއް ވެސް މުޅިން ތަފާތު ކާސްޓަކާ އެކު ގެނެސް ދެމުންނެވެ.
ޒީޓީވީން އަންނަނީ އެ ޗެނެލްގެ ސިލްސިލާ "ކުމްކުމް ބަގިޔާ" އިން ކުރި ފަޅުވައިގެން "ކުންދަލީ ބަގިޔާ" ގެ ނަމުގައި ސްޕިން-އޮފްއެއް ގެނެސް ދެމުންނެވެ.