28 ޖެނުއަރީ 2019 - 07:36
"ބާހްބަލީ" ގެނެސް ދިން ޑައިރެކްޓަރު އެސްއެސް ރާޖަމޯލީ މިހާރު ޝޫޓް ކުރަމުން އަންނަ ފިލްމުގެ ބަތަލާގެ ރޯލް، ބޮލީވުޑްގެ ބަތަލާ ޕަރިނީތީ ޗޯޕްޅާ އަށް ހުށަހަޅައިފި އެވެ.
އިންޑިިއާ ޓުޑޭ އިން ބުނި ގޮތުގައި ޕަރިނީތީ އަށް ފިލްމުގެ ބަތަލާގެ ރޯލް ހުށަހެޅި ނަމަވެސް، އޭނާ ވަނީ ފިލްމަށް ބޮޑު އަގެއް ކިޔައިފަ އެވެ. ނަމަވެސް ޕަރިނީތީ ކީ އަގު، ރާޖަމޯލީ އަށް މައްސަލައަކަށް ނުވާތީ، އޭނާ ފިލްމަށް ނަގައި، އޭނާ ކާސްޓަށް ވަރަށް އަވަހަށް ގެންނަން ވަނީ ނިންމައިފަ އެވެ.
ވޯކިން ޓައިޓްލްއެއްގެ ގޮތުގައި މި ވަގުތު "އާރްއާރްއާރް" ގެ ނަން ދީފައިވާ މި ފިލްމުގެ ލީޑް ބަތަލުންނަކީ ސައުތުގެ މަޝްހޫރު ދެ ތަރިން ކަމަށްވާ ރާމް ޗަރަން އާއި އެންޓީއާރް ޖޫނިއާ އެވެ. ޗަރަންއަކީ މީގެ ކުރިން ޕަރިނީތީގެ ކަޒިން ދައްތަ ޕްރިޔަންކާ ޗޯޕްޅާއާ އެކު ހިންދީ ފިލްމެއް ވެސް ކުޅެފައިވާ އެކްޓަރެކެވެ. އެއީ 2013 ގެ "ޒަންޖީރު" އެވެ.
މިދިޔަ ނޮވެމްބަރު މަހުގެ ތެރޭގައި ޝޫޓިން ފެށި ރާޖަމޯލީގެ އައު ފިލްމަކީ 1920 ގެ ހާދިސާއެއް ކިޔައިދޭ ފިލްމެއް ކަމަށް މީޑިއާތަކުން ބުނި ނަމަވެސް، މި ފިލްމާ ބެހޭ މާ ބޮޑު މައުލޫމާތެއް މިހާތަނަކަށް ދީފައެއް ނުވެ އެވެ. އަދި ރިލީޒް ކުރާނެ ތާރީހެއް ވެސް އިއުލާންކޮށްފައި ނުވާ ފިލްމަކީ 300 ކްރޯޑްގެ ބަޖެޓަކުން ހަދާ ފިލްމެކެވެ.
މިދުޔަ އަހަރު ފްލޮޕް ފިލްމު "ނަމަސްތޭ އިންގްލެންޑް" އިން ފެނިގެން ދިޔަ ބަތަލާ ދެން އެންމެ އަވަހަށް ފެނިގެން ދާނީ އަންނަ މާޗް 1 ގައި ރިލީޒް ކުރާ "ސަންދީޕް އޯރް ޕިންކީ ފަރާރް" އިންނެވެ. އަދި ހަމަ އެ މަހުގެ 21 ގައި އޭނާގެ "ކޭސަރީ" ވެސް ރިލީޒް ކުރާނެ އެވެ.