26 ޖެނުއަރީ 2019 - 13:04
ވޮޝިންޓަން (ޖެނުއަރީ 26) - ބަޖެޓް ފާސްނުވެ އެމެރިކާ ސަރުކާރުގެ ބޮޑު ބައި ހުއްޓިފައި އޮންނަތާ 35 ދުވަސް ފަހުން މައްސަލަ އަށް ވަގުތީ ހައްލެއް ހޯދިއްޖެ އެވެ.
ސިޔާސީ ޕްރެޝަރު ބޮޑުވުމުން ރައީސް ޑޮނަލްޑް ޓްރަމްޕް ގޮތް ދޫކުރައްވާ އެންމެ ފަހުން ވަނީ ފެޑެރަލް އެޖެންސީތަކަށް ބޭނުންވާ ތިން ހަފުތާގެ ފައިސާ ދޫކުރަން އެއްބަސްވެވަޑައިގެންފަ އެވެ. ބަޖެޓް އެޕްރޫވް ކުރަން ޓްރަމްޕް ދެކޮޅު ހައްދަވަމުން ގެންދެވީ މެކްސިކޯ ބޯޑަރުގައި ރާނާ ފާރަށް ބޭނުންވާ 5.7 ބިލިއަން ޑޮލަރު ހިމަނާފައިނުވާތީ އެވެ. ޓްރަމްޕް ކުރިން ވިދާޅުވަމުން ގެންދެވީ އެ ފައިސާ ނެތި ބަޖެޓަށް ހުއްދަ ނުދެއްވާނެ ކަމަށެވެ. އެކަމަކު ސަރުކާރު ހުއްޓިފައި އޮތް އޮތުމަށް ވަގުތީ ހައްލެއް ގެނައުމަށް ހައުސް އާއި ސެނެޓުން ރޭ ފާސްކުރުމާ އެކު ޓްރަމްޕް ވަނީ އެ ބިލުގައި ސޮއިކުރައްވައިފަ އެވެ.
ކޮންގްރެސްގެ ވޯޓަށް ފަހު ޓްރަމްޕް ވިދާޅުވެފައި ވަނީ ބިލްގައި ސޮއިކުރައްވަނީ އެއްބަސްވުމަކަށް އާދެވިގެން ނޫން ކަމަށާއި ސަރުކާރު ހުއްޓިފައި އޮތުމުން ގެއްލުން ލިބެމުންދާ އެތައް މިލިއަން މީހުންގެ ހައްގުގައި ކަމަށެވެ.
ކޮންގްރެސްގެ ފާސްކުރުމާ ގުޅިގެން ފެބްރުއަރީ 15 އާ ހަމައަށް ސަރުކާރުގެ އެޖެންސީތަކަށް ފައިސާ ލިބޭނެ އެވެ. ޓްރަމްޕް ވިދާޅުވީ ފެޑެރަލް ހުރިހާ މުވައްޒަފުންނަށް ވެސް ނުދެވި ހުރި ހުރިހާ ފައިސާއެއް ދޭނެ ކަމަށެވެ.
ސަރުކާރު ހުއްޓިފައި އޮތް ފަސް ހަފުތާ ތެރޭ 800،000 އަށް ވުރެ ގިނަ ސިވިލް ސާވަންޓުންނަށް ވަނީ އެކަމުގެ ގެއްލުން ލިބިފަ އެވެ. ސްޓާފުން ނެތިގެން ބައެއް އެއާޕޯޓްތައް ހުކުރު ދުވަހު ވަނީ ވަގުތީ ގޮތުން ބަންދު ކުރަން ވެސް ޖެހިފަ އެވެ.